ភ្នំពេញ៖ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានជំរុញឱ្យ មន្ត្រីជំនាញរបស់កម្ពុជា និងវៀតណាម បន្តកិច្ចសហការនិងពង្រីកតំបន់សហការជាមួយគ្នា ឱ្យកាត់តែទូលាយ ពិសេសគិតគូរដល់ការដោះដូរបទពិសោធន៍ ក្នុងវិស័យឧស្សាហកម្មវប្បធម៌។ លោកស្រី ភឿង សកុណា មានប្រសាសន៍ដូច្នេះនៅក្នុងពិធីបើកព្រឹត្តិការណ៍«សប្ដាហ៍វប្បធម៌វៀតណាមនៅកម្ពុជា ឆ្នាំ២០២៤» ដែលប្រារព្ធកាលពីល្ងាចថ្ងៃទី២១ ខែឧសភា។
សម្រាប់លោកស្រីរដ្ឋមន្ត្រី វិស័យសិល្បៈវប្បធម៌ ជាវិស័យកំពុងតែមានសក្តានុពល ទាំងផ្នែកសេដ្ឋកិច្ច និងសង្គម ហើយក៏ជាយានរឹតចំណងមិត្តភាពរវាងប្រទេសកម្ពុជានិងវៀតណាម។ លោកស្រី ភឿង សកុណា បន្ថែមថា អស់រយៈពេលជាង៥៧ឆ្នាំកន្លងទៅ នៃទំនាក់ទំនងការទូត ប្រទេសកម្ពុជា និងវៀតណាម តែងមានទំនាក់ទំនងល្អ ក្នុងស្មារតីអ្នកជិតខាងល្អ សាមគ្គីភាព និងការយោគយល់គ្នាខ្ពស់។
![](https://image.thmeythmey.com/pictures/2024/05/22/ac__2_.jpg)
កាលពីចុងឆ្នាំ២០២៣ គណៈប្រតិភូនៃក្រសួងវប្បធម៌ និងវិចិត្រសិល្បៈកម្ពុជា បានរៀបចំសប្ដាហ៍វប្បធម៌កម្ពុជា នៅប្រទេសវៀតណាម យ៉ាងអធិកអធម និងជោគជ័យ។ រដ្ឋមន្ត្រី វប្បធម៌កម្ពុជា លោកស្រី ភឿង សកុណា ថាដើម្បីជាការចូលរួមចំណែក ដល់ការរឹតបន្តឹង ចំណងមិត្តភាព ក្រសួងវប្បធម៌នៃប្រទេសទាំងពីរ បានបន្តចុះហត្ថលេខា និងអនុវត្តន៍ កិច្ចព្រមព្រៀង ផែនការសហប្រតិបត្តិការ ស្ដីពីវប្បធម៌និងសិល្បៈ សម្រាប់ឆ្នាំ២០២៣-២០២៧។
កិច្ចព្រមព្រៀងនេះ បាននិងកំពុងដើរតួនាទីយ៉ាងសំខាន់ ក្នុងការផ្សារភ្ជាប់ ទំនាក់ទំនងលើវិស័យវប្បធម៌ រវាងប្រទេសទាំងពីរ។ នេះបើតាមរដ្ឋមន្ត្រីក្រសួងវប្បធម៌ ដោយលោកស្រី ភឿង សកុណា បន្ថែមថា ការរៀបចំព្រឹត្តិការណ៍សប្ដាហ៍វប្បធម៌លើកទី១៩នេះ មិនត្រឹមតែបង្ហាញឱ្យឃើញពីការប្រឹងប្រែងរួមគ្នានោះទេ ប៉ុន្តែជាវេទិការំឭក និងជំរុញប្រជាជននៃប្រទេសទាំងពីរ ឱ្យស្វែងយល់វប្បធម៌គ្នាទៅវិញទៅមក និងរួមចំណែកផ្សារភ្ជាប់កិច្ចសហប្រតិបត្តិការមិត្តភាព ក្នុងនាមបងប្អូនភូមិផងរបងជាមួយគ្នា។
![](https://image.thmeythmey.com/pictures/2024/05/22/ac__2_.jpg)
សូមបញ្ជាក់ថា សប្ដាហ៍វប្បធម៌វៀតណាមនៅកម្ពុជាឆ្នាំ២០២៤នេះ ដឹកនាំដោយលោក តា ក្វាងដូង (Ta Quang Dong) អនុរដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាម។ ប្រទេសទាំង២បានរៀបចំព្រឹត្តិការណ៍វប្បធម៌រួមរួមគ្នា លើទឹកដីកម្ពុជា ចាប់តាំងពីឆ្នាំ២០០៦មក។
ក្រៅពីព្រឹត្តការណ៍សប្ដាហ៍វប្បធម៌ ក្រសួងវប្បធម៌ ក៏ដូចជាស្ថាប័នពាក់ព័ន្ធ របស់ប្រទេសទាំងពីរ បានខិតខំរួមគ្នា ពង្រឹងកិច្ចសហការទូទៅ ដោយរាប់បញ្ចូលទាំង ការផ្លាស់ប្ដូរបទពិសោធ ជំនាញទាំងរូបី និងអរូបី ការគាំទ្របេក្ខភាពគ្នាទៅវិញទៅមក សម្រាប់ជាសមាជិកនៃយន្តការអន្តរជាតិ ក៏ដូចជាការគាំទ្រដល់ដំណើរការចុះបញ្ជីបេតិកភណ្ឌពិពភលោក។ និងការសិក្សាស្រាវជ្រាវ បណ្ដុះបណ្ដាលធនធានមនុស្ស សម្រាប់វិស័យវប្បធម៌ផងដែរ។
![](https://image.thmeythmey.com/pictures/2024/05/22/ac__3_.jpg)
ទោះជាយ៉ាងណា លោកស្រី សកុណា ជំរុញឱ្យប្រទេសទាំងពីរ មានកម្មវិធីដោះដូរ បទពិសោធន៍គ្នាទៅវិញទៅមក ក្នុងវិស័យឧស្សាហកម្មវប្បធម៌ ដ្បិតអីនេះជាវិស័យកំពុងមានសក្តានុពល ទាំងទៅលើសេដ្ឋកិច្ច និងសង្គម។
លោកស្រី ពន្យល់បន្ថែម៖ «វប្បធម៌ជួយឱ្យប្រទេសនិងប្រទេស កាន់តែមានការសហការគ្នាល្អ។ បច្ចុប្បន្ន ជាសម័យសកលភាវូបនីយកម្ម និងការរីកចម្រើនផ្នែកបច្ចេកវិទ្យា។ គ្រប់ប្រទេសបានចាត់ទុកវិស័យសិល្បៈវប្បធម៌ ជាកាតាលីករ នៃការជំរុញសេដ្ឋកិច្ចសង្គម និងការពង្រឹងអត្តសញ្ញាណជាតិ។ កម្ពុជា គឺជាប្រទេសដែលឱ្យតម្លៃខ្ពស់លើវប្បធម៌»។
រដ្ឋមន្ត្រីវប្បធម៌ ដែលមានស្នាដៃច្រើនក្នុងការជំរុញឱ្យមានការដាក់សម្បត្តិជាតិ ស្នើចុះបញ្ជីក្នុងបេតិកភណ្ឌពិភពលោករូបនេះ បន្តថារាជរដ្ឋាភិបាលកម្ពុជា តែងតែចាត់ទុក វប្បធម៌គឺជាព្រលឹងជាតិ ជាអត្តសញ្ញាណជាតិ ជាប្រភពមិនចេះរីងស្ងួត សម្រាប់ជាមូលដ្ឋានគ្រឹះ ក្នុងការពង្រឹងសេចក្ដីស្រឡាញ់ចំពោះជាតិ ពង្រឹងសាមគ្គីភាពផ្ទៃក្នុង ជំរុញការទទួលស្គាល់ របស់ពិភពលោកលើវប្បធម៌ អរិយធម៌ដ៏ចំណាស់របស់ជាតិ ជាពិសេសប្រភពនៃការអភិវឌ្ឍសេដ្ឋកិច្ច ប្រកបដោយចីរភាព។
![](https://image.thmeythmey.com/pictures/2024/05/22/ac__4_.jpg)
លោកស្រី ភឿង សកុណា សង្កត់ធ្ងន់ថា ទស្សនទាន “អភិរក្សដើម្បីអភិវឌ្ឍ និងអភិវឌ្ឍដើម្បីអភិរក្ស” បានក្លាយជាគោលការណ៍យុទ្ធសាស្ត្រដ៏ច្បាស់ សម្រាប់វិស័យវប្បធម៌នៅកម្ពុជា។ បន្ថែមលើអ្វីដែលវប្បធម៌ បានចូលរួមក្នុងការ ធ្វើឱ្យប្រជាជនផ្ទាល់របស់ប្រទេស កាន់តែមានលក្ខណៈសាមគ្គី និងការស្រឡាញ់ជាតិ រាជរដ្ឋាភិបាល បានចាត់ទុកវិស័យវប្បធម៌ គឺជាប្រភពមិនចេះរីងស្ងួត នៃចំណូលជាតិ។
«ក្រៅពីនោះ តាមរយៈទេសចរណ៍និងវប្បធម៌សេដ្ឋកិច្ច កម្ពុជាបាននឹងកំពុងចូលរួមយ៉ាងសកម្ម ក្នុងយន្តការអន្តរជាតិ និងតំបន់ ក្នុងការពង្រឹងសាមគ្គីភាព និងសន្តិភាពដោយយកវប្បធម៌ជាយាន។ ជាអាទិ៍ យន្តការក្នុងតំបន់ ក្នុងក្របខណ្ឌអាស៊ាន អាស៊ានបូក AMCA SOMCA និងវេទិកានៃក្រុមប្រឹក្សាវប្បធម៌អាស៊ី (ACC) ជាដើម សុទ្ធតែជាសកម្មភាពចូលរួមពង្រឹងកិច្ចសន្ទនា កិច្ចសហប្រតិបត្តការ ដើម្បីភាពរីកចម្រើនទាំងអស់គ្នា ដោយយកវិស័យវប្បធម៌ជាគោល»។ នេះជាការពន្យល់បន្ថែម របស់លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ៕
![](https://image.thmeythmey.com/pictures/2024/05/22/ac__5_.jpg)
![](https://image.thmeythmey.com/pictures/2024/05/22/ac__6_.jpg)