ទាក់ទងនឹងករណីលួចឆ្លងដែនខុសច្បាប់ចូលកម្ពុជាវិញ លោក សុឃៈ បានអះអាងថា មានភាពថយចុះ គួរឱ្យកត់សម្គាល់។ «សម្រាប់កម្ពុជាវិញ មួយរយៈចុងក្រោយនេះ យើងសង្កេតឃើញថា (លួចឆ្លងដែនចូលកម្ពុជា) មានការថមថយ បន្ទាប់ពីយើងអនុវត្តច្បាប់អន្តោប្រវេសន៍ បន្ទាប់ពីយើងរឹតបន្តឹងតាមច្រកទ្វារទាំងគោក ទឹក និងអាកាសជាដើម។ ប៉ុន្តែយើងទទួលស្គាល់ថា ជនល្មើស និងអ្នកដែលមានបំណង នៅក្នុងការលបលួចឆ្លងដែននៅតែមាន ដើម្បីគេចវេះពីសមត្ថកិច្ចជំនាញ ពីព្រោះព្រំដែនយើង មិនបានធ្វើរបងដូចផ្ទះរបស់យើងទេ ព្រោះវាតែងតែមានច្រកនេះ ច្រកនោះ ដែលអាចឆ្លងកាត់បាន»។ លោក សុឃៈ បន្ថែម។
 

បើតាមអ្នកនាំពាក្យរូបនេះ សមត្ថកិច្ច នឹងបន្តអនុវត្តច្បាប់អន្តោប្រវេសន៍ និងរឹតបន្តឹងតាមច្រកព្រំដែនបន្ថែមទៀត។ លោក សុឃៈ បានបន្ថែមថា ដោយសារតែក្រសួងមហាផ្ទៃ យកចិត្តទុកដាក់ខ្លាំង លើករណីឆ្លងដែនខុសច្បាប់នេះហើយ ទើបបានជាបង្កើតគណៈកម្មការចំពោះកិច្ចមួយ ក្នុងការស៊ើបអង្កេតស្រាវជ្រាវ លើការដោះលែងជនជាតិចិន ទាំង៨នាក់ នៅក្នុងខេត្តស្ទឹងត្រែង។