ជាតិ
ឆ្នាំ២០២៣ កម្ពុជាទទួលអំណោយឈាមជាង១៤ម៉ឺនប្លោក ពីសាធារណជន ![ពលរដ្ឋចូលរួមបរិច្ឆាគឈាម នៅមជ្ឈមណ្ឌលជាតិផ្តល់ឈាម។ រូបភាព៖ ទំព័រហ្វេសប៊ុកក្រសួងសុខាភិបាល](https://image.thmeythmey.com/pictures/2024/06/14/14620241729untitled-2.jpg)
ពលរដ្ឋចូលរួមបរិច្ឆាគឈាម នៅមជ្ឈមណ្ឌលជាតិផ្តល់ឈាម។ រូបភាព៖ ទំព័រហ្វេសប៊ុកក្រសួងសុខាភិបាល
×![]()
ដោយ៖ ជ ដារី
ក្នុងឆ្នាំ២០២៣ កម្ពុជាទទួលបានអំណោយឈាម ចំនួន ១៤៣,១៤៣ប្លោក ពីសាធារណជន ដែលចំនួននេះ កើនឡើង ២៥.០៥ភាគរយ ធៀបកាលពីឆ្នាំ២០២២។ នេះបើតាមលោក ឈាង រ៉ា រដ្ឋមន្រ្តីក្រសួងសុខាភិបាល។
នៅក្នុងពិធីអបអរទិវាពិភពលោក នៃអ្នកបរិច្ចាគឈាម ១៤ មិថុនា ២០២៤ ដែលកម្ពុជា ប្រារព្ធឡើង ក្រោមប្រធានបទ«ខួប២០ឆ្នាំ នៃការបរិច្ចាគឈាម សូមអរគុណសប្បុរសជនបរិច្ចាគឈាម» នៅមជ្ឈមណ្ឌលជាតិផ្តល់ឈាម រដ្ឋមន្ត្រីក្រសួងសុខាភិបាល បានឱ្យដឹង ទៀតថា នៅក្នុងឆ្នាំ២០២៣ដដែល មជ្ឈមណ្ឌលជាតិផ្តល់ឈាម ក៏បានផ្គត់ផ្គង់ឈាម និងសមាសភាពឈាមមានចំនួន ១៤៩,២៧៤ប្លោក ដល់មន្ទីរពេទ្យនានាដែលមានតម្រូវការ ផងដែរ ដែលចំនួននេះកើនឡើង ២៩.៨១ភាគរយ ធៀបនឹងឆ្នាំ២០២២។
លោក ឈាង រ៉ា រដ្ឋមន្ត្រីក្រសួងសុខាភិបាល។ រូបភាព៖ ទំព័រហ្វេសប៊ុកក្រសួងសុខាភិបាល
ប្រឈមមុខនឹងតម្រូវការដែលបន្តមានកំណើននេះ លោក ឈាង រ៉ា បានអំពាវនាវឱ្យប្រជាពលរដ្ឋ និងសាធារណជន បន្តចូលរួមបរិច្ចាគឈាមឱ្យបានច្រើនបន្ថែមទៀត ដើម្បី ធានាដល់បរិមាណផ្គត់ផ្គង់ឈាម គ្រប់គ្រាន់តាមតម្រូវការសង្គ្រោះអ្នកជំងឺ។ «អ្នកផ្តល់ឈាម គឺជាវីរៈបុរស ហើយការផ្តល់ឈាម គឺជាការ ជួយសង្រ្គោះជីវិត ផ្តល់ជីវិត ផ្តល់ការស្រឡាញ់ និងការសាមគ្គី»។ លោក ឈាង រ៉ា បន្ថែមដូច្នេះ។
ក្រៅពីទទូចទៅដល់ប្រជាពលរដ្ឋ លោករដ្ឋក្រសួងសុខាភិបាល ក៏បានបញ្ជាក់បន្ថែមដែរថា ក្រសួងសុខាភិបាលបានជំរុញ ឱ្យមជ្ឈមណ្ឌលជាតិផ្តល់ឈាម មជ្ឈមណ្ឌលផ្តល់ឈាមខេត្ត បង្កើនយុទ្ធនាការអប់រំផ្សព្វផ្សាយលើកកម្ពស់ការបរិច្ចាគឈាមស្ម័គ្រចិត្ត ជាពិសេសពីក្នុង ចំ ណោមយុវជន និងលើកកម្ពស់វរប្បធម៌ នៃការបរិច្ចាគឈាមទៀងទាត់ ដែលនេះគឺ ជាផ្នែក មួយនៃការយកចិត្ដទុកដាក់របស់រាជរដ្ឋាភិបាល ចំពោះសុខភាពសុខុមាលភាពពលរដ្ឋ។
ក្រសួងសុខាភិបាល ក៏លើកទឹកចិត្តឱ្យបន្តរៀបចំប្រារព្ធទិវាពិភពលោកនៃអ្នកបរិច្ចាគឈាមជារៀងរាល់ឆ្នាំ ដើម្បីអរគុណដល់សប្បុរសជនបរិច្ចាគឈាមគ្រប់រូប ក៏ដូចជាធ្វើនវានុវត្តន៍បច្ចេកវិទ្យា ក្នុងសេវាកម្មទទួលអំណោយឈាម និងផ្គត់ផ្គង់ឈាម សមាសភាពឈាម ឱ្យបានគ្រប់គ្រាន់ គាំទ្រដល់និរន្តរភាព និងសុវត្ថិភាព នៃសេវាព្យាបាល និងថែទាំជំងឺនៅគ្រប់មន្ទីរពេទ្យ៕
Tag:
សុខភាព
សុខាភិបាល
បរិច្ចាគឈាម
© រក្សាសិទ្ធិដោយ thmeythmey.com