ដោយ៖ លុយ សិរីរក្សា
សៀមរាប៖ ស្ថានកុងស៊ុល កិត្តិយសអាល្លឺម៉ង់ប្រចាំខេត្តសៀមរាប ត្រូវបានសម្ពោធជាផ្លូវការ កាលពីថ្ងៃទី១៧មិថុនា ដើម្បីពង្រីកវិសាលភាពការផ្ដល់សេវាទៅកាន់តែប្រជាជនខ្លួន ក៏ដូចជាពលរដ្ឋកម្ពុជា។
ថ្លែងក្នុងពិធីសម្ពោធដាក់ឱ្យដំណើរការនេះ លោក Stefan Messerer ឯកអគ្គរដ្ឋទូតអាល្លឺម៉ង់ បានបញ្ជាក់ថា ស្ថានអគ្គកុងស៊ុលកិត្តិយសនេះ នឹងគ្របដណ្ដប់ការផ្ដល់សេវានៅក្នុងខេត្តសៀមរាប បន្ទាយមានជ័យ ឧត្តរមានជ័យ និងខេត្តព្រះវិហារ។
(ឈរកណ្ដាល) លោក Stefan Messerer ឯកអគ្គរដ្ឋទូតអាល្លឺម៉ង់ ថ្លែងក្នុងពិធីសម្ពោធកុងស៊ុលកិត្តិយសអាល្លឺម៉ង់ប្រចាំកម្ពុជា កាលពីថ្ងៃទី១៧ មិថុនា ២០២៤។
ជាមួយគ្នានេះ លោក Torsten Münther ត្រូវបានតែងតាំងជាកុងស៊ុលកិត្តិយសទីមួយរបស់អាល្លឺម៉ង់ប្រចាំនៅកម្ពុជា។ លោក Torsten Münther បានចំណាយពេលបំពេញការងារជាង ២០ឆ្នាំមកហើយ ក្នុងប្រទេសកម្ពុជា។ លោកបានចូលរួមយ៉ាងសកម្មក្នុងភាពរីកចម្រើននៃវិស័យឯកជន និងក្នុងការងារប្រឹក្សាយោបល់លើគោលនយោបាយសេដ្ឋកិច្ចក្នុងប្រទេស។
«ការិយាល័យថ្មីនេះ នឹងចាប់ដៃគ្នាជាមួយស្ថានទូតអាល្លឺម៉ង់ប្រចាំទីក្រុងភ្នំពេញ ហើយជំហានដ៏សំខាន់មួយនេះ ត្រូវបានបង្កើតឡើង ដើម្បីពង្រីក និងធ្វើឱ្យទំនាក់ទំនងរវាងព្រះរាជាណាចក្រកម្ពុជា និងសាធារណរដ្ឋសហព័ន្ធអាល្លឺម៉ង់ កាន់តែស៊ីជម្រៅ។» លោក Torsten Münther បានថ្លែងដូច្នេះក្នុងកម្មពិធីសម្ពោធ។
លោក Torsten Münther កុងស៊ុលកិត្តិយសទីមួយរបស់អាល្លឺម៉ង់ប្រចាំនៅកម្ពុជា ថ្លែងក្នុងពិធីសម្ពោធកុងស៊ុលកិត្តិយសអាល្លឺម៉ង់ប្រចាំខេត្តសៀមរាប កាលពីថ្ងៃទី១៧ មិថុនា ២០២៤។
លោក យុន លីនណេ អភិបាលរងខេត្តសៀមរាប បានមានប្រសាសន៍ថា ស្ថានកុងស៊ុលកិត្តិយសថ្មីនេះ ជាជំហានដ៏សំខាន់ឆ្ពោះទៅកាន់ចំណង និងភាពជាដៃគូដ៏រឹងមាំជាងមុន ក្នុងវិស័យនានារវាងកម្ពុជា និងអាល្លឺម៉ង់។
លោក យុន លីនណេ អភិបាលរងខេត្តសៀមរាប ថ្លែងក្នុងពិធីសម្ពោធកុងស៊ុលកិត្តិយសអាល្លឺម៉ង់ប្រចាំខេត្តសៀមរាប កាលពីថ្ងៃទី១៧ មិថុនា ២០២៤។
កន្លងមក ប្រទេសអាល្លឺម៉ង់បានផ្តល់ថវិកាប្រមាណ ៥៤០លានអឺរ៉ូ ក្នុងកិច្ចសហប្រតិបត្តិការអភិវឌ្ឍន៍ និងការគាំទ្ររយៈពេលវែងដល់រាជរដ្ឋាភិបាលកម្ពុជា។ ទំនាក់ទំនងទ្វេភាគីនេះ បានបង្ហាញពីយកចិត្តទុកដាក់ខ្ពស់លើការដោះស្រាយបញ្ហាសំខាន់ៗដូចជា ការអភិវឌ្ឍន៍ការងារ ,ការអភិរក្សវប្បធម៌ ,ការបោសសម្អាតមីន ,សុខភាព និងស្ថិរភាពសង្គម ព្រមទាំងបរិស្ថាន និងនិរន្តរភាពផងដែរ៕