ពីក្រៅវេទិកា Shangri-La Dialogue រៀបចំនៅសិង្ហបុរី លោក ឡយ អូស្ទីន រដ្ឋមន្រ្តីការពារជាតិអាម៉េរិក និងលោក ដុង ជុន រដ្ឋមន្រ្តីការពារជាតិចិន បានជួបគ្នាដោយផ្ទាល់លើកដំបូង ក្នុងរយៈពេល ១៨ខែ ដោយភាគីទាំងពីរ បានចុចយកបញ្ហាកោះតៃវ៉ាន់ យកទៅជជែក។ 

 

«លោករដ្ឋមន្រ្តីបានបង្ហាញពីក្តីបារម្ភពីសកម្មភាពយោធាចិននៅជុំវិញកោះតៃវ៉ាន់»។ អ្នកនាំពាក្យក្រសួងការបរទេសអាម៉េរិក លោក Patrick Ryder បានបញ្ជាក់បែបនេះ នៅក្នុងសេចក្តីថ្លែងការណ៍មួយចេញនៅថ្ងៃទី៣១ ខែឧសភា ដោយបន្តអំពាវនាវកុំឱ្យយោធាចិន ប្រើហេតុផលការផ្លាស់ប្តូរមេដឹកនាំតៃវ៉ាន់ សម្រាប់វិធានការបង្ករឿង។ 

 

ជាការឆ្លើយតប អ្នកនាំពាក្យក្រសួងការពារជាតិចិន លោក Wu Qian បានបញ្ជាក់ថា លោកដុង ជុន បានប្រាប់លោកអូស្ទីនឱ្យឈប់ជ្រៀតជ្រែកកិច្ចការផ្ទៃក្នុងចិន តាមរយៈតៃវ៉ាន់។ បើតាមអ្នកនាំពាក្យក្រសួងការពារជាតិចិន សកម្មភាពអាម៉េរិកលើកោះតៃវ៉ាន់ ជាការបំពានគោលការណ៍ចិនតែមួយយ៉ាងខ្លាំង។ 

 

មិនតែប៉ុណ្ណោះ ប្រមុខការពារជាតិប្រទេសទាំងពីរ ក៏បានសង្កត់ធ្ងន់ពីការរក្សាទំនាក់ទំនងយោធា និងយោធា ឱ្យមានលក្ខណៈបើកចំហរផងដែរ។ 

 

ក្រៅពីបញ្ហាកោះតៃវ៉ាន់ ប្រមុខការពារទាំងពីរ ក៏បានជជែកពីបញ្ហាជម្លោះនៅតំបន់កាហ្សាផងដែរ។ លោក ដុង ជុន បានអំពានាវឱ្យភាគីអាម៉េរិកជួយដោះស្រាយបញ្ហាសន្តិភាពនៅតំបន់មជ្ឈិមបូព៌ា។ នេះបើតាមការចុះផ្សាយរបស់ទូរទស្សន៍ CNA។ 

 

សូមបញ្ជាក់ថា ក្នុងជំនួបប្រមាណជាង ១ម៉ោងនេះ អ្នកនាំពាក្យការពារជាតិចិន បានចាត់ទុកថា មានលទ្ធភាពវិជ្ជមាន និងប្រកបដោយការស្ថាបនា៕