អន្តរជាតិ
នយោបាយអន្តរជាតិ
ចូលកាន់តំណែងអាណត្តិថ្មី លោក ពូទីន បំពេញទស្សនកិច្ចនៅចិនមុនគេ ប្រធានាធិបតីរុស្ស៊ី វ៉្លាឌីមៀ ពូទីន និងប្រធានាធិបតីចិន ស៊ី ជីនពីង ក្នុងជំនួបឆ្នាំ ២០២៣ ។ រូបភាព ៖ AFP
× វិមានក្រឹមឡាំងបានប្រកាសថា ប្រធានាធិបតីរុស្ស៊ីលោក វ៉្លាឌីមៀ ពូទីន នឹងទៅបំពេញទស្សនកិច្ចផ្លូវរដ្ឋនៅចិនចាប់ពីថ្ងៃទី១៦ ដល់ថ្ងៃទី១៧ ខែឧសភា។ នេះជាដំណើរទស្សនកិច្ចបរទេសលើកដំបូងរបស់លោក ពូទីន ចាប់តាំងពីចូលកាន់តំណែងជាប្រធានាធិបតីនៅអាណត្តិថ្មី។
ប្រធានាធិបតីរុស្ស៊ី លោក វ្ល៉ាឌីមៀ ពូទីន និងប្រធានាធិបតីចិន លោក ស៊ី ជិនភីង នឹងពិភាក្សាលម្អិតអំពីបញ្ហាទាំងអស់ជុំវិញភាពជាដៃគូលើគ្រប់ជ្រុងជ្រោយ និងអន្តរកម្មយុទ្ធសាស្ត្រ ដោយកំណត់ទិសដៅសំខាន់ៗសម្រាប់ការអភិវឌ្ឍបន្ថែមទៀត។ ទន្ទឹមនេះ ភាគីទាំង២នឹងមានផ្លាស់ប្តូរទស្សនៈគ្នាយ៉ាងហ្មត់ចត់លើបញ្ហាអន្តរជាតិ និងបញ្ហាក្នុងតំបន់។
លើសពីនេះ ថ្នាក់ដឹកនាំកំពូលនៃប្រទេសទាំងពីរនឹងចូលរួមនៅក្នុងពិធីរំលឹកខួបលើកទី៧៥ នៃការបង្កើតទំនាក់ទំនងការទូតរវាងប្រទេសទាំងពីរ និងក្នុងឱកាសនៃការបើកឆ្នាំនៃទិវាវប្បធម៌រុស្ស៊ី និងចិនផងដែរ។
នេះជាដំណើរទស្សនកិច្ចទៅបរទេសលើកដំបូងរបស់លោកប្រធានាធិបតីរុស្ស៊ី វ្ល៉ាឌីមៀ ពូទីន ចាប់តាំងពីបានស្បថចូលកាន់តំណែងជាអាណត្តិទី ៥ នៅថ្ងៃទី ៧ ខែឧសភា។
ក្នុងប៉ុន្មានឆ្នាំថ្មីៗនេះ ចិនបានពង្រឹងទំនាក់ទំនងពាណិជ្ជកម្ម និងយោធាជាមួយរុស្ស៊ី ស្របពេលមានការដាក់ទណ្ឌកម្មដោយអាម៉េរិក និងសម្ព័ន្ធមិត្តលើទីក្រុងប៉េកាំង និងទីក្រុងម៉ូស្គូ។
មេដឹកនាំរុស្ស៊ី និងចិនបានជួបគ្នាមិនតិចជាង ៤០ដង។ ជំនួបចុងក្រោយនៅខែមីនា ឆ្នាំ២០២៣ លោក ស៊ី បានទៅបំពេញទស្សនកិច្ចនៅទីក្រុងមូស្គូ ហើយភាគីទាំងពីរបានចុះហត្ថលេខាលើកញ្ចប់ឯកសារស្តីពីកិច្ចសហប្រតិបត្តិការសេដ្ឋកិច្ច។ នៅខែតុលាឆ្នាំដដែល លោក ពូទីន បានចូលរួមវេទិកាខ្សែក្រវ៉ាត់ និងផ្លូវនៅទីក្រុងប៉េកាំង ហើយបានពិភាក្សាជាមួយលោកស៊ី៕
© រក្សាសិទ្ធិដោយ thmeythmey.com