ចំនួនអ្នកមានទ្រព្យសុទ្ធលើសពី១លានដុល្លារបានកើនឡើងដល់ ២២,៨លាននាក់កាលពីឆ្នាំ២០២៣ ដោយសារពួកគេទទួលផលចំណេញពីការិនិយោគលើទីផ្សារភាគហ៊ុន។
ចំនួនអ្នកមានទ្រព្យសម្បត្តិសុទ្ធលើសពី១លានដុល្លារ (High Net Worth Individuals - HNWI) បានកើនឡើង៥,១ភាគរយកាលពីឆ្នាំមុនដល់ ២២,៨លាននាក់។ នេះបើតាមសារព័ត៌មាន AFP នៅថ្ងៃទី៥ ខែមិថុនា ដោយដកស្រង់ពីរបាយការណ៍ប្រចាំឆ្នាំរបស់ក្រុមហ៊ុនប្រឹក្សា Capgemini មានមូលដ្ឋាននៅទីក្រុងប៉ារីស។
របាយការណ៍នេះ បានកត់ត្រាទ្រព្យសម្បត្តិសរុបនៃក្រុមអ្នកមានបំផុតរបស់ពិភពលោកកើនដល់ ៨៦៨០០ពាន់លានដុល្លារក្នុងឆ្នាំ២០២៣ ពោលគឺកើនឡើង ៤,៧ភាគរយបើធៀបនឹងឆ្នាំមុន។
បច្ចុប្បន្ន ទ្រព្យសម្បត្តិសរុបរបស់ក្រុម HNWI បានកើនឡើងដល់កម្រិតខ្ពស់បំផុតចាប់តាំងពីក្រុមហ៊ុនបានចាប់ផ្តើមធ្វើរបាយការណ៍ប្រចាំឆ្នាំក្នុងឆ្នាំ ១៩៩៧។
ការកើនឡើងទ្រព្យសម្បត្តិរបស់មហាសេដ្ឋីពិភពលោកនេះ ដោយសារមានសញ្ញាវិជ្ជមានពី ទីផ្សារភាគហ៊ុនដូចជា សន្ទស្សន៍ Nasdaq នៅញូវយ៉កកើនឡើង ៤៣ភាគរយនៅឆ្នាំ២០២៣ ខណៈសន្ទស្សន៍ S&P 500 (២៤ភាគរយ), Paris CAC (១៦ភាគរយ), Frankfurt DAX (២០ភាគរយ) ។
របាយការណ៍ខាងលើក៏បង្ហាញដែរថា ទ្រព្យសម្បត្តិរបស់ក្រុម HNWI ក្នុងឆ្នាំ២០២២ បានថយចុះជាង ៣ភាគរយ ជាការធ្លាក់ចុះយ៉ាងទាបបំផុតក្នុងទសវត្សរ៍នេះដោយសារតែភាពតានតឹងភូមិសាស្ត្រនយោបាយ និងអស្ថិរភាពម៉ាក្រូសេដ្ឋកិច្ចទូទាំងពិភពលោក។
យ៉ាងណាមិញ នៅឆ្នាំ ២០២៣ ទ្រព្យសម្បិត្តិរបស់ក្រុមនេះបានកើនមកវិញ ដោយសារមានកំណើនសេដ្ឋកិច្ច និងការកើនឡើងនៃទ្រព្យសកម្មដែលបានមកពីលទ្ធផលនៃការវិនិយោគនៅក្នុងទីផ្សារភាគហ៊ុន។
យ៉ាងណាក៏ដោយ ចំនួនអ្នកមានកាន់តែច្រើនឡើងៗ ហើយវិសមភាពក្នុងពិភពលោក បាននាំឱ្យមានការជជែកវែកញែកយ៉ាងខ្លាំងអំពីរបៀបដែលអ្នកមានត្រូវបង់ពន្ធឱ្យបានត្រឹមត្រូវ។
គួរបញ្ជាក់ថា ប្រេស៊ីល និងបារាំងកំពុងដាក់សម្ពាធដល់ក្រុមប្រទេស G20 ឱ្យបង្កើតអត្រាពន្ធលើប្រាក់ចំណូលអប្បបរមាជាសកលសម្រាប់អ្នកមានបំផុតនៅលើពិភពលោក៕