ឆ្កែយន្តប្រភេទនេះមានទំហំប៉ុនឆ្កែពិត អាចប្រើបញ្ញាសិប្បនិម្មិត ដើម្បីប្រាស្រ័យជាមួយអ្នកដោះស្រាយ ក៏ដូចជាគូសផែនទីផ្លូវធ្វើដំណើរ និងចាប់ភ្លើងសញ្ញាចរាចរណ៍។ វាមានជើងចំនួន៦ ដែលជួយឱ្យវាដើរបានស្រាល និងរឹងមាំ។ នេះបើតាមការបញ្ជាក់ពីអ្នកស្រាវជ្រាវ។ 

 

សាស្ត្រាចារ្យ លោក Gao Feng ប្រធានក្រុមស្រាវជ្រាវនៅសាលាវិស្វកម្មមេកានិកនៃសាកលវិទ្យាល័យ Jiaotong ក្នុងទីក្រុងសៀងហៃបានលើកឡើងថា ៖« នៅពេលដែលវាលើកជើងទាំង៣ ឡើងលើ វានៅតែមានជើង៣ ទៀតសម្រាប់ទប់លំនឹងដូចជើងកាមេរ៉ា។ នេះជាទីតាំងដែលមានស្ថិរភាពបំផុត»។ នេះបើតាមសារព័ត៌មាន Reuters ចុះផ្សាយនៅថ្ងៃទី១ ខែកក្កដា។

 

ប្តីប្រពន្ធមួយគូ គឺលោក Zhu Sibin អាយុ ៤២ឆ្នាំ និងលោកស្រី Li Fei អាយុ ៤១ឆ្នាំ ស្ថិតក្នុងចំណោមជនពិការភ្នែកដែលជួយក្រុមស្រាវជ្រាវសាកល្បងមនុស្សយន្តដោយប្រើពាក្យបញ្ជាជាភាសាចិន។ លោកស្រី Li ខ្វាក់ភ្នែកទាំងាសងខាង ចំណែកលោក Zhu មើលឃើញតែភាពងងឹត ជារឿយៗត្រូវប្រើបងឈើរំពត់នៅពេលដើរ។

 

«ប្រសិនបើឆ្កែយន្តនាំផ្លូវមនុស្សនេះ ត្រូវបានបញ្ចេញទៅកាន់ទីផ្សារ វានឹងជួយខ្ញុំដោះស្រាយបញ្ហាមួយចំនួននៅពេលធ្វើដំណើរតែម្នាក់ឯង ។ សម្រាប់ពេលនេះ ខ្ញុំមិនអាចទៅធ្វើការ មន្ទីរពេទ្យ ឬផ្សារទំនើបដោយខ្លួនឯងបានទេ ខ្ញុំត្រូវទៅជាមួយសាច់ញាតិ ឬអ្នកស្ម័គ្រចិត្ត»។ លោកស្រី Li បានបញ្ជាក់បែបនេះ។ 

 

ឆ្កែយន្តនាំមនុស្សយន្តក៏កំពុងត្រូវបានអភិវឌ្ឍនៅក្នុងប្រទេសជាច្រើនផងដែរ ដូចជាអង់គ្លេស និងអូស្ត្រាលីជាដើម។ បើតាមសាស្ត្រាចារ្យ Gao តម្រូវការឆ្កែយន្តនៅចិនមានអត្រាខ្ពស់ណាស់ ដោយសារតែប្រទេសនេះមានសត្វឆ្កែនាំផ្លូវជាង ៤០០ក្បាលសម្រាប់មនុស្សពិការភ្នែកជិត២០លាននាក់។

 

ចំនួនសត្វឆ្កែនាំផ្លូវ ជាធម្មតាមានការលំបាកក្នុងការបង្កាត់ពូជ និងបង្ហាត់។ យ៉ាងណាមិញ លោក Gao បានបញ្ជាក់ថា ឆ្កែយន្តនាំផ្លូវអាចផលិតបានយ៉ាងច្រើនដូចជារថយន្ត។ «ខ្ញុំគិតថានេះជាទីផ្សារដ៏ធំមួយ ពីព្រោះមនុស្សរាប់សិបលាននាក់នៅជុំវិញពិភពលោកប្រហែលជាត្រូវការឆ្កែយន្តនាំផ្លូវ»។ នេះបើតាមការបញ្ជាក់របស់លោក Gao៕