កីឡាជាតិ
ជាតិ
គោព្រៃកម្ពុជា ត្រូវប៉ះកាតា ក្នុងជំនួបមិត្តភាព ថ្ងៃទី៣១ ធ្នូ មុន Asian Cup ![](https://image.thmeythmey.com/pictures/2023/12/21/front.jpg)
×![]()
ក្រុមកីឡាបាល់ទាត់ជម្រើសជាតិកាតា នឹងត្រូវទទួលជម្រើសជាតិកម្ពុជា និងហ្សកដានី ក្នុងការប្រកួតមិត្តភាព ដើម្បីត្រៀមខ្លួនមុនព្រឹត្តិការណ៍ Asian Cup ឆ្នាំ២០២៣។
ជំនួបរវាងកាតា និងកម្ពុជា នឹងធ្វើនៅថ្ងៃទី៣១ ខែធ្នូ ឆ្នាំ២០២៣ មុនបន្តជួបហ្សកដានីនៅថ្ងៃទី៥ ខែមករា ឆ្នាំ២០២៤។ មិត្តភាពទាំងពីរប្រកួតនេះ ធ្វើឡើងដើម្បីជាការកំដៅសាច់ដុំរបស់កាតា ក្នុងការត្រៀមខ្លួនការពារតំណែងជើងឯក Asian Cup របស់ខ្លួន។ នេះបើតាមការចុះផ្សាយរបស់សហព័ន្ធកីឡាបាល់ទាត់កាតា (QFA) នៅលើបណ្តាញសង្គម X ផ្លូវការរបស់ខ្លួន ដោយមិនបញ្ជាក់ទីតាំងប្រកួតនៅឡើយ។
យ៉ាងណាក៏ដោយ កាលពីខែតុលា សហព័ន្ធកីឡាបាល់ទាត់កម្ពុជា (FFC) នៅលើទំព័រហ្វេសប៊ុកផ្លូវការ បានផ្សាយថា QFA អញ្ជើញក្រុមគោព្រៃកម្ពុជាទៅប្រកូតមិត្តភាពទល់ក្រុមជម្រើសជាតិពួកគេ នៅក្រុងដូហា នៅថ្ងៃទី៣១ ខែធ្នូ ដោយជំនួបនេះ ធ្វើឡើងដើម្បីចែករំលែកបច្ចេកទេសរវាងក្រុមទាំងពីរ។
កាតា ដែលទើបតែងតាំងគ្រូបង្វឹកថ្មីលោក Marquez Lopez ជំនួសគ្រូចាស់លោក Carlos Queiroz នៅខែធ្នូនេះ នឹងត្រូវដឹកនាំធ្វើម្ចាស់ផ្ទះ Asian Cup ឆ្នាំ២០២៣ ដែលចាប់ផ្តើមពីថ្ងៃទី១២ ខែមករា ដល់ថ្ងៃទី១០ ខែកុម្ភៈ ឆ្នាំ២០២៤។ ម្ចាស់ការពារជើងឯកនេះ ស្ថិតនៅក្នុងពូល A ជាមួយ ចិន លីបង់ និងតាហ្ស៊ីគីស្ថាន។ កាតា នឹងប្រើប្រាសកីឡដ្ឋានចំនួន៩ រៀបចំព្រឹត្តិការណ៍តំបន់អាស៊ីមួយនេះ។
សម្រាប់ជំនួបមិត្តភាពនេះ លោកគ្រូបង្វឹក Felix Dalmas បានកោះហៅកីឡាករ២៤នាក់ ក្នុងនោះអ្នកចាំទី អ៊ុំ វិចិត្រ ខ្សែការពារ ទេស សម្បត្តិ និងម៉ាត់ នូរុណ សុទ្ធតែមានឈ្មោះក្នុងបញ្ជីសារជាថ្មី។
![](https://image.thmeythmey.com/pictures/2023/12/21/inside.jpg)
កាតា សព្វថ្ងៃស្ថិតនៅចំណាត់ថ្នាក់ទី៥៩ ពិភពលោក ក្នុងតារាង FIFA Ranking និងទើបទទួលការរៀបចំធ្វើម្ចាស់ផ្ទះ FIFA World Cup ឆ្នាំ២០២២ ផងដែរ។ ដោយឡែកកម្ពុជា ដែលមិនអាចឆ្លងផុតវគ្គជម្រុះកីឡាបាល់ទាត់ពិភពលោកឆ្នាំ២០២៦ តំបន់អាស៊ី ស្ថិតនៅចំណាត់ថ្នាក់ទី១៧៩៕
Tag:
ជម្រើសជាតិកម្ពុជា
កាតា
FFC
© រក្សាសិទ្ធិដោយ thmeythmey.com