FIFA
កីឡាអន្តរជាតិ
អន្តរជាតិ
FIFA សង់មជ្ឈមណ្ឌលហ្វឹកហ្វឺនឱ្យឡាវ ដើម្បីជំរុញការអភិវឌ្ឍន៍វិស័យបាល់ទាត់ ![](https://image.thmeythmey.com/pictures/2024/02/29/29220241624front.jpg)
×![]()
សហព័ន្ធបាល់ទាត់ឡាវ (LFF) បើកដំណើរការមជ្ឈមណ្ឌលហ្វឹកហ្វឺនកីឡាបាល់ទាត់ថ្មី ក្នុងក្រុងវៀងចន្ទន៍ នៅថ្ងៃទី២៤ ខែកុម្ភៈ ក្រោមជំនួយរបស់សហព័ន្ធកីឡាបាល់ទាត់អន្តរជាតិ (FIFA)។ មជ្ឈមណ្ឌលនេះ បង្កើតឡើងក្នុងគោលបំណងបណ្តុះទេពកោសល្យកីឡាករយុវជន និងពង្រឹងសមត្ថភាពក្រុមបាល់ទាត់ជម្រើសជាតិឡាវ។
មជ្ឈមណ្ឌលបណ្តុះបណ្តាលកីឡាបាល់ទាត់ ដែលមានឈ្មោះថា ចំប៉ី-ចំប៉ា បានសាងសង់ក្នុងបរិវេណពហុកីឡដ្ឋានជាតិឡាវ ស្ថិតក្នុងវៀងចន្ទន៍ ប្រទេសឡាវ។ មជ្ឈមណ្ឌលហ្វឹកហ្វឺននេះ នឹងបម្រើសម្រាប់សកម្មភាពអភិវឌ្ឍន៍កីឡាបាល់ទាត់ឡាវ និងសម្រាប់ហ្វឹកហាត់កីឡាផ្សេងៗមួយចំនួនទៀត។ នេះបើតាមការផ្សាយរបស់កាសែត Vientiane Times។
ក្រោមជំនួយរបស់ FIFA តាមរយៈគម្រោងពិសេសដែលមានឈ្មោះថា FIFA Forward មជ្ឈមណ្ឌលនេះសាងសង់ឡើង ដោយផ្តោតសំខាន់លើការអភិវឌ្ឍន៍វិស័យបាល់ទាត់ឡាវ ទាំងក្រុមថ្នាល និងឈុតធំ រួមទាំងក្រុមស្ត្រីផង។ តាមរយៈជំនួយគាំទ្រនេះ LFF បានដាក់គោលដៅធ្វើយ៉ាងណា នាំក្រុមជម្រើសជាតិឡាវរីកមុតមាត់លើឆាកអន្តរជាតិ ដោយពង្រឹកចាប់ពីយុវជនថ្នាលទៅ។
![](https://image.thmeythmey.com/pictures/2024/02/29/inside.jpg)
បើតាមការអះអាងរបស់លោក Kunya Keomany អនុប្រធាន LFF និងជាសមាជិកក្រុមប្រឹក្សា FIFA៖ «ទីលានទាំងនេះ ជាកន្លែងសម្រាប់កីឡាករ-ការិនី រួមទាំងក្រុមជម្រើសជាតិទាំងបុរស-ស្ត្រី និងយុវជន ពង្រឹងសមត្ថភាព។ ទីតាំងហ្វឹកហាត់នេះ មានបំពាក់សម្ភារបរិក្ខាទំនើបៗ អន្តេវាសិកដ្ឋាន អាហារដ្ឋាន និងកន្លែងហាត់ប្រាណជាដើម»។
លោក Kunya បាននិយាយថា "យើងមានអំណរគុណចំពោះ FIFA សម្រាប់ការគាំទ្រដ៏មិនគួរឱ្យជឿនេះ និងសម្រាប់ការប្តេជ្ញាចិត្តរបស់ FIFA ក្នុងការអភិវឌ្ឍន៍បាល់ទាត់ [នៅក្នុងប្រទេសឡាវ] នៅគ្រប់កម្រិតទាំងអស់" ។
ប្រធាន LFF លោក Viphet Sihachakr បង្ហាញក្តីរីករាយ និងអរគុណ FIFA ចំពោះគម្រោងគាំទ្រកែលម្អហេដ្ឋារចនាសម្ព័ន្ធកីឡាបាល់ទាត់នៅក្នុងប្រទេសឡាវនេះ។ លោក Viphet នឹងយកអត្ថប្រយោជន៍ដែល LFF ទទួលបានពី FIFA Forward ទៅបណ្តុះធនធានកីឡាករ-ការិនីឱ្យកាន់តែមានផ្លែផ្កា។
បើតាមតំណាង FIFA លោក Kenny Jean-Marie មជ្ឈមណ្ឌលបណ្តុះបណ្តាលកីឡាបាល់ទាត់ ចំប៉ី-ចំប៉ា ជាគម្រោងទី១ ក្នុងទីក្រុងវៀងច័ន្ទ ប្រទេសឡាវ និងគ្រោងបង្កើតមជ្ឈមណ្ឌលស្រដៀងនេះបន្ថែមចំនួន ៣ទៀត នៅក្នុងខេត្តចំប៉ាសាក់ លួងប្រាបាំង និង Luang Namtha៕
© រក្សាសិទ្ធិដោយ thmeythmey.com