ការវាយប្រហាររបស់អុីស្រាអែល លើតំបន់ Rafah ដែលស្ថិតនៅក្នុងតំបន់ភាគខាងត្បូងកាហ្សា នៅយប់ថ្ងៃទី២៦ ខែឧសភា បានសម្លាប់មនុស្សជាច្រើន ក្នុងនោះរួមទាំងមន្រ្តីជាន់ខ្ពស់ក្រុមហាម៉ាស ២នាក់ផង។ មន្រ្តីនៅក្នុងតំបន់ Rafah បានបញ្ជាក់ថា មនុស្សចំនួន ៤៥នាក់ ត្រូវបានសម្លាប់ ដោយភាគច្រើនជាស្រ្តី និងកុមារ។ 

 

ក្រោយការវាយប្រហារខាងលើ ប្រទេសលោកខាងលិចបានរិះគន់រដ្ឋាភិបាលក្រុង Tel Aviv យ៉ាងខ្លាំង​ ខណៈ​ប្រទេសអារ៉ាប់ បានចាត់ទុកការវាយប្រហារ ជាការសម្លាប់រង្គាល។ ចំណែកប្រមុខអង្គការសហប្រជាជាតិ បានជំរុញដដែលៗឱ្យអុីស្រាអែល បញ្ឈប់ប្រតិបត្តិការយោធារបស់ខ្លួនជាបន្ទាន់។ 

 

«វាគ្មានកន្លែងមានសុវត្ថិភាពនៅតំបន់កាហ្សាឡើយ។ សេចក្តីរន្ធត់បែបនេះ ត្រូវតែបញ្ឈប់»។ លោក អាន់តូនីញ៉ូ ហ្គូតេរ៉េស អគ្គលេខាធិការអង្គការសហប្រជាជាតិ បានសង្កត់ធ្ងន់បែបនេះ នៅលើបណ្តាញសង្គម។ បន្ទាប់ពីហេតុការណ៍ខាងលើ ក្រុមប្រឹក្សាសន្តិសុខ អង្គការសហប្រជាជាតិ នឹងបើកកិច្ចប្រជុំមួយពាក់ព័ន្ធនឹងប៉ាឡេស្ទីន នៅថ្ងៃទី២៨ ខែឧសភា។ 

 

ចំណែកបារាំង និងអាល្លឺម៉ង ក៏ចូលរួមរិះគន់អុីស្រាអែល ក្រោយមានការសម្លាប់មនុស្ស ៤៥នាក់ នៅក្នុងតំបន់កាហ្សាផងដែរ។

 

មុនពេលបើកកិច្ចប្រជុំ អង្គការផ្តល់ជំនួយសកលមួយចំនួន បានស្នើឱ្យក្រុមប្រឹក្សាសន្តិសុខចាប់បង្ខំឱ្យអនុវត្តសេចក្តីសម្រេចរបស់តុលាការយុត្តិធម៌អន្តរជាតិ (ICJ) ដើម្បីបញ្ឈប់សកម្មភាពយោធា នៅតំបន់ Rafah។ នៅថ្ងៃទី២៤ ខែឧសភា កន្លងមក តុលាការយុត្តិធម៌អន្តរជាតិ បានបញ្ជាឱ្យអុីស្រាអែលផ្អាកសកម្មភាពយោធានៅតំបន់ Rafah ប៉ុន្តែមិនបានបញ្ជាឱ្យមានបទឈប់បាញ់ឡើយ។ 

 

ក្រោយហេតុការណ៍ខាងលើ លោកនាយករដ្ឋមន្រ្តី បេនចាមីន ណេតាន់យ៉ាហ៊ូ បានបញ្ជាឱ្យមានការស៊ើបអង្កេតទៅក្នុងប្រតិបត្តិការនោះ។ ចំណែកអ្នកនាំពាក្យក្រុមប្រឹក្សាសន្តិសុខជាតិអាម៉េរិក បានទទូចឱ្យអុីស្រាអែល ធ្វើគ្រប់យ៉ាង និងដាក់ចេញវិធានការជាមុន ដើម្បីការពារប្រជាជនស៊ីវិល នៅក្នុងតំបន់ Rafah។ 

 

តំបន់ Rafah ជាតំបន់ដ៏ធំ និងចុងក្រោយនៅក្នុងតំបន់កាហ្សា ដែលមានប្រជាជនស៊ីវិលភៀសខ្លួនជាច្រើនលាននាក់។ ស្របពេលអុីស្រាអែលចោទថា Rafah ជាកន្លែងលាក់ខ្លួនរបស់ក្រុមហាម៉ាស អាម៉េរិក បានជំរុញអុីស្រាអែលមានផែនការជម្លៀសប្រជាជនស៊ីវិលច្បាស់លាស់បង្ហាញខ្លួនជាមុន បើចង់វាយប្រហារ។ 

 

ក្នុងប្រតិបត្តិការយោធាជាច្រើនខែមកនេះ តំបន់កាហ្សា កាន់តែមានស្ថានភាពអាក្រក់ទៅៗ ដោយប្រជាជនប៉ាឡេស្ទីនជាច្រើននាក់ ជាពិសេសស្រ្តី​ និងកុមារ បានស្លាប់បាត់បង់។ តាមការបញ្ជាក់របស់ក្រសួងសុខាភិបាលប្រចាំនៅតំបន់កាហ្សា មនុស្សប្រមាណ ៣៦០៥០ បានស្លាប់បាត់បង់ជីវិត ក្នុងការវាយប្រហារសងសឹងពីសំណាក់អុីស្រាអែលលើក្រុមហាម៉ាស៕