កាលពីជំនួបបើកឆាកពូល C អង់គ្លេសទទួលបាន៣ពិន្ទុរួចហើយ តាមរយៈការយកឈ្នះស៊ែប៊ី ១-០ ស្រពេលដាណឺម៉ាក ស្មើស្លូវេនី ១-១។ ក្រុមតោកំណាចអង់គ្លេស ត្រូវការឈ្នះដាណឺម៉ាកនៅជំនួបទី២នេះ ដើម្បីឡើងទៅវគ្គខ្វែងដោយស្វ័យប្រវត្តិ ស្របពេលដាណឺម៉ាកក៏ត្រូវការពិន្ទុបន្ថែមចាំបាច់សម្រាប់ឱកាសឆ្លងផុតវគ្គចែកពូល។
 

ស៊ែប៊ី ដែលមិនទាន់មានពិន្ទុរាប់នៅឡើយ ត្រូវធ្វើយ៉ាងណារកឱ្យបានពិន្ទុពីស្លូវេនីដែលមាន១ពិន្ទុក្នុងដៃ សម្រាប់ជំនួបជុំទី២ ក្នុងពូល។ ឆ្លងកាត់មួយប្រកួតដំបូងក្នុងពូល C មានតែអង់គ្លេសមួយគត់ជាក្រុមមានប្រៀបជាងគេក្នុងការបានកៅអីទៅវគ្គបន្ត ខណៈដាណឺម៉ាក ស្លូវេនី និងស៊ែប៊ី ប្រទាញប្រទង់។
 

ដោយឡែកជំនួបគូពិសេសរវាងអ៊ីតាលី និងអេស្ប៉ាញ ក្នុងពូល B ជាជំនួបសងសឹកផង និងដើម្បីកាត់សេចក្តីថាក្រុមណា នឹងឈរកំពូលតារាងផង ក្នុងជុំទី២នេះ។ អ៊ីតាលី ដែលធ្លាប់ផ្តល់ការខកចិត្តឱ្យអេស្ប៉ាញធ្លាក់វគ្គពាក់កណ្តាលផ្តាច់ព្រ័ត្រ កាលពី Euro 2020 ទទួលបាន៣ពិន្ទុ ពីការឈ្នះអាល់បានី ២-១ ខណៈអេស្ប៉ាញ ឈ្នះក្រូអាស៊ី ៣-០។ អេស្ប៉ាញឈរកំពូលតារាងបណ្តោះអាសន្ន តាមពីក្រោយដោយអ៊ីតាលី។
 

ដោយសារក្រូអាស៊ី បានត្រឹមស្មើអាល់បានី ២-២ នៅជំនួបទី២ ដូច្នេះក្នុងពូល B នេះ អ៊ីតាលី និងអេស្ប៉ាញ មានភាគរយខ្ពស់ ក្នុងការក្លាយជាក្រុមលេខ១​ និងលេខ២៕