វីដេអូដែលចេញផ្សាយដោយទីក្រុងម៉ានីល បានបង្ហាញនាវិកឆ្មាំឆ្នេរសមុទ្រចិន កាន់កាំបិត ពូថៅ និងអាវុធផ្សេងទៀតនៅក្នុងការប៉ះទង្គិចគ្នាកាលពីថ្ងៃទី១៧។ នាវិកហ្វីលីពីនម្នាក់បានបាត់បង់មេដៃក្នុងការប៉ះទង្គិច ដែលកើតឡើងពេលយោធចិនប៉ុនប៉ងបង្អាក់ដំណើររបស់កងទ័ពជើងទឹកហ្វីលីពីនដើម្បីផ្គត់ផ្គង់គ្រឿងបរិក្ខារនានាឱ្យយោធាខ្លួននៅសមុទ្រចិនខាងត្បូង។

 

ការប៉ះទង្គិចនេះ នៅមិនទាន់ដល់កម្រិតដែលហ្វីលីពីនផ្ដើមអនុវត្តសន្ធិសញ្ញាការពារទៅវិញទៅមកជាមួយអាម៉េរិកឆ្នាំ១៩៥១ ដែលចែងថា ភាគីម្ខាងទៀតទៀតត្រូវចេញជួយ នៅពេលភាគីម្ខាងរងការវាយប្រហារដោយអាវុធ។

 

លេខាធិការប្រតិបត្តិរបស់ប្រធានាធិបតី Ferdinand Marcos លោក Lucas Bersamin បានប្រាប់អ្នកយកព័ត៌មានថា ទីក្រុងម៉ានីលមិនទាន់បានត្រៀមខ្លួនរួចរាល់ដើម្បីចាត់ទុករឿងនេះជាការវាយប្រហារដោយប្រដាប់អាវុធទេឡើយ។

 

សន្ធិសញ្ញាការពារទៅវិញទៅមករវាងអាម៉េរិក និងហ្វីលីពីន តម្រូវឱ្យភាគីទាំងពីរចូលមកការពារភាគីម្ខាងទៀត ក្នុងករណីមានការវាយប្រហារប្រដាប់អាវុធប្រឆាំងនឹងនាវា យន្តហោះ យោធា និងឆ្មាំឆ្នេរសមុទ្រគ្រប់ទីកន្លែងនៅក្នុងប៉ាស៊ីហ្វិក។ ទីក្រុងវ៉ាស៊ីនតោននិយាយថា ដែនយុត្តាធិការក៏រួមមានសមុទ្រចិនខាងត្បូងដែរ។

 

រដ្ឋមន្ត្រីការបរទេសអាម៉េរិកលោក អាន់តូនី ប្លីងខិន ក៏បានជជែកជាមួយសមភាគីហ្វីលីពីនលោក Enrique Manalo នៅថ្ងៃទី១៩ ខែមិថុនា ពីសកម្មភាពរបស់ចិន។ បើតាមក្រសួងការបរទេសអាម៉េរិក លោក ប្លីងខិន និយាយថា សកម្មភាពរបស់ចិនធ្វើឱ្យខូចដល់សន្តិភាព និងស្ថិរភាពក្នុងតំបន់ ហើយលោកបានគូសបញ្ជាក់ការប្តេជ្ញាចិត្តរបស់អាម៉េរិកចំពោះហ្វីលីពីនក្រោមសន្ធិសញ្ញាការពារទៅវិញទៅមក។