ព្រឹត្តិការណ៍ Euro 2024 ក៏ទំនងនឹងក្លាយជាពេលវេលាចុងក្រោយមួយ សម្រាប់ De Bruyne ក្នុងភារកិច្ចជាមួយបែលហ្ស៊ិក ដ្បិតរូបគេមិនទាន់ត្រៀមខ្លួនប្រកាសថានឹងព្យួរស្បែកជើង ក្រោយពីបញ្ចប់ការប្រកួតនេះទៅ។ ក្តីសង្ឃឹមរបស់ក្រុមបែលហ្ស៊ិក​ បានវិលត្រឡប់មកវិញ នៅពេលពួកគេបានបំបាក់ក្រុមរូម៉ានី លទ្ធផល ២​-០ ក្នុងជំនួបជុំទី២ វគ្គចែកពូល ដោយដណ្តើមបាន ៣ពិន្ទុ ធ្វើឱ្យពូល ​E កាន់តែប្រទាញប្រទង់គ្នាខ្លាំង ដោយក្រុមទាំង ៤ មានលទ្ធផល៣ពិន្ទុដូចគ្នា។
 

២គ្រាប់ជ័យជម្នះរបស់បែលហ្ស៊ិក ធ្វើបានដោយកីឡាករ Youri Tielemans តាំងពីនាទី២ ហើយខ្សែបម្រើ Kevin De Bruyne ជាអ្នកស៊ុតបញ្ចប់គ្រាប់ទី២ នៅនាទី៨០។ បន្ទាប់ពីរកគ្រាប់បាល់ជួយនាំជ័យជម្នះដល់ក្រុម កីឡាករវ័យ ៣២ឆ្នាំ លេងនៅ Manchester City បានរៀបរាប់ថា រូបគេទំនងនឹងផ្តល់ឱកាសដល់យុវជនមានសមត្ថភាពជំនាន់ក្រោយ ចូលប្រកួតប្រជែងបន្តបន្ទាប់ ពីកីឡាករមានវ័យចាស់ដូចរូបគេ។ ប៉ុន្តែ De Bruyne នៅមិនទាន់ចង់គិតពីការចូលនិវត្តន៍ ពីជម្រើសជាតិនៅឡើយ។ កីឡាករប្រធានក្រុមបែលហ្ស៊ិកបាននិយាយដូច្នេះថា៖«នៅពេលខ្ញុំចាកចេញពីក្រុម នោះវានឹងត្រូវស្ថិតលើពួកគេ ដើម្បីបង្ហាញពីការតាំងចិត្តរបស់ពួកគេដោយផ្ទាល់។ ខ្ញុំធ្លាប់បានគិតពីការពិត ដែលថាកីឡាករមានសមត្ថភាពវ័យក្មេងជាច្រើនកំពុងតែមកដល់ ហើយខ្ញុំបានលេងជាមួយក្រុម ១០ឆ្នាំហើយ ខ្ញុំទទួលស្គាល់ថា ខ្ញុំត្រូវតែចែករំលែកជាមួយពួកគេ ប៉ុន្តែខ្ញុំមិនគិតថារឿងនេះ នឹងក្លាយជាចុងបញ្ចប់នៃផ្លូវរបស់ខ្ញុំនោះទេ។ ខ្ញុំមិនធ្លាប់គិតទេថាក្នុងការគិតអំពីនៅពេលដែលខ្ញុំនឹងត្រូវចូលនិវត្តន៍ ឬក៏អនាគតបែបណាទៀតសម្រាប់ខ្ញុំ។»។
 

ដោយឡែកសម្រាប់បែលហ្ស៊ិកវិញ ការប្រកួតបន្ទាប់របស់ពួកគេ នឹងត្រូវបន្តដំណើរប្រជែងទល់នឹងក្រុមអ៊ុយក្រែន ខណៈក្នុងពូល E ក្រុមទាំង ៤ លទ្ធផល ៣ពិន្ទុដូចគ្នាតែម្តង ដែលត្រូវកាត់សេចក្តីនាការប្រកួតចុងក្រោយ។ ចំណែករូម៉ានី ដែលចាញ់ការប្រកួត នឹងបន្តទៅប៉ះស្លូវ៉ាគី៕