អន្តរជាតិ
ព្រះមហាក្សត្រម៉ាឡេស៊ី Sultan Ibrahim Iskandar ។ រូបភាព ៖ AFP
×![]()
ប៉ូលិសម៉ាឡេស៊ីបានចាប់ខ្លួនមនុស្ស ៨នាក់ សង្ស័យថាមានទំនាក់ទំនងជាមួយក្រុមរដ្ឋឥស្លាមទាក់ទងការរៀបគម្រោងវាយប្រហារព្រះមហាក្សត្រ និងនាយករដ្ឋមន្ត្រី។ 
រដ្ឋមន្ត្រីមហាផ្ទៃម៉ាឡេស៊ី Saifuddin Nasution Ismail បាននិយាយនៅថ្ងៃទី២៤ ខែមិថុនាថា បុរស ៦នាក់ និងស្ត្រី២ នាក់ត្រូវបានចាប់ខ្លួននៅក្នុងតំបន់ផ្សេងៗគ្នាក្នុងប្រទេសនេះកាលពីសប្តាហ៍មុន ដោយសង្ស័យមាននទំនាក់ទំនងជាមួយអង្គការរដ្ឋឥស្លាម។
បើតាមលោក Saifuddin ការស៊ើបអង្កេតបឋមរបស់ប៉ូលិសបានបង្ហាញថា ជនសង្ស័យទាំងនេះកំពុងរៀបចំគម្រោងប្រឆាំងនឹងព្រះមហាក្សត្រ នាយករដ្ឋមន្ត្រី មន្ត្រីជាន់ខ្ពស់ជាមួយថ្នាក់ដឹកនាំរបស់កងកម្លាំងប៉ូលិសម៉ាឡេស៊ីមួយចំនួន។ លោកបន្ថែមថា ប៉ូលិសត្រូវតែចាត់វិធានការដើម្បីពង្រឹងសន្តិសុខប្រទេស។
បើតាមរដ្ឋមន្ត្រីមហាផ្ទៃម៉ាឡេស៊ី អាជ្ញាធរកំពុងស៊ើបអង្កេតដើម្បីកំណត់ពីទំនាក់ទំនងរវាងជនសង្ស័យដែលសុទ្ធតែមានមនោគមវិជ្ជាដូចគ្នា។ ជនសង្ស័យទាំងនេះ មានអាយុចាប់ពី២៥ដល់៧០ឆ្នាំ ហើយមកពីមជ្ឈដ្ឋានផ្សេងគ្នាពីអ្នកអត់ការងារធ្វើរហូតដល់មានការអប់រំខ្ពស់។
លោកបញ្ជាក់ថា រដ្ឋាភិបាលម៉ាឡេស៊ីនឹងមិនសម្របសម្រួលជាមួយបក្សពួកណាដែលចូលរួម ឬគាំទ្រក្រុមដែលមានមនោគមវិជ្ជាជ្រុលនិយមឡើយ។ រដ្ឋមន្ត្រី Saifuddin សង្កត់ធ្ងន់ថា អាជ្ញាធរនឹងមិនស្ទាក់ស្ទើរក្នុងការចាត់វិធានការតឹងរ៉ឹងបំផុតប្រឆាំងនឹងក្រុមមនុស្សទាំងនេះទេ។
រដ្ឋមន្ត្រីរូបនេះក៏បានធានាដែរថា ម៉ាឡេស៊ីនៅតែមានសុវត្ថិភាព ហើយប្រជាជនមិនចាំបាច់ព្រួយបារម្ភអំពីស្ថានភាពសន្តិសុខក្នុងប្រទេសឡើយ។
កាលពីខែមីនា បុរសម្នាក់កាន់កាំបិតបានចូលប៉ុស្តិ៍ប៉ូលីសក្នុងរដ្ឋ Johor ដោយកាប់មន្ត្រីម្នាក់ មុនពេលប្រើកាំភ្លើងបាញ់សម្លាប់មន្ត្រីពីរនាក់។ ជនសង្ស័យនាពេលនោះ មានទំនាក់ទំនងជាមួយក្រុម Jemaah Islamiyah (JI) ដែលជាអង្គការភេរវករជិតស្និទ្ធនឹងក្រុមអាល់កៃដា។
ក្រុម JI ទទួលខុសត្រូវចំពោះភេរវកម្មបង្ហូរឈាមជាបន្តបន្ទាប់នៅក្នុងតំបន់ រួមទាំងឧបទ្ទវហេតុនៅលើកោះបាលីរបស់ឥណ្ឌូណេស៊ី ដែលបានសម្លាប់មនុស្ស ២០២នាក់ក្នុងឆ្នាំ ២០០២ រួមទាំងពលរដ្ឋអូស្ត្រាលី ៨៨នាក់៕
Tag:
ម៉ាឡេស៊ី
© រក្សាសិទ្ធិដោយ thmeythmey.com
