កីឡាករ-កីឡាការិនី៦រូប ដែលត្រូវត្រៀមប្រកួតនោះ មានដូចជា៖ ឈឿង ល្វៃ, លន បញ្ញា, កីឡាការិនី ទួន ស្រីភីន, ឃីម បូរ៉ា, ឈុត សេរីវាន់ថង, និង កីឡាករ ធីម សៀងហៃ ដែលបង្ហាត់គុនខ្មែរប្រចាំក្លិបប្រដាល់ The Temple នាទឹកដី Bordeau។
 

លោក ស៊ីថូ ណាថាន់ យល់ឃើញថា នេះ គឺជាជំហានល្អ ក្នុងការបង្ហាញទៅកាន់អន្ដរជាតិពីវិស័យកីឡាប្រដាល់គុនខ្មែរ ដែលជាក្បាច់គុនដូខតាខ្មែរ។ «ការប្រកួតកីឡាប្រដាល់នេះ គឺជាការនាំគុនខ្មែរទៅកាន់ពិភពលោក។ នេះ គឺជារឿងមួយ ដែលយើងតែងតែចង់បានគ្រប់ៗគ្នា។»។ អ្នកអត្ថាធិប្បាយប្រដាល់រូបនេះ បាននិយាយដូច្នេះ។
 

គួរបញ្ជាក់ផងដែរថា កីឡាករ ឈឿង ល្វៃ ត្រូវប្រកួតជាមួយ Omar Samb ចំណែក លន បញ្ញា ត្រូវប៉ះជាមួយ Oumar Bathily។ រីឯកីឡាការិនី ទួន ស្រីភីន ត្រូវប្រកួតជាមួយ Alexandra Chatenet។ ឃីម បូរ៉ា និង ឈុត សេរីវាន់ថង​ ត្រូវប្រកួតជម្រុះជាមួយកីឡាករបរទេស២រូបផ្សេងទៀត។ ក្នុងលក្ខខ័ណ្ឌ កីឡាករកម្ពុជា ២រូបនេះឈ្នះ ពួកគេ នឹងត្រូវប្រកួតជាមួយគ្នា ដណ្ដើមឡាន៕