អ្នកធ្វើធម្មយាត្រាជាង៥៥០នាក់បានស្លាប់ក្នុងអំឡុងពិធីបុណ្យ Hajj ក្នុងទីក្រុង Mecca ដែលភាគច្រើនដោយសារជំងឺដាច់សរសៃឈាមខួរក្បាល។ ការស្លាប់នេះ ដោយសារកម្តៅនៅទីក្រុងរបស់អារ៉ាប៊ីសាអូឌីតកើនដល់លើសពី៥០អង្សា។
មន្ត្រីអារ៉ាប៊ីសាអូឌីតបានកត់ត្រាចំនួនមនុស្សស្លាប់យ៉ាងហោចណាស់៥៥០នាក់ ដែលចូលរួមក្នុងធម្មយាត្រាពិធីបុណ្យ Hajj នៅទីក្រុង Mecca ។ ជនរងគ្រោះ ៣២៣នាក់ជាប្រជាជនអេហ្ស៊ីប។ នេះបើយោងតាមអ្នកការទូតអារ៉ាប់ពីរនាក់ដែលសម្របសម្រួលអ្នកធ្វើធម្មយាត្រាប្រាប់សារព័ត៌មាន The Guardian។
អ្នកការទូតបានទទួលទិន្នន័យពីកន្លែងបញ្ចុះសពរបស់មន្ទីរពេទ្យនៅតំបន់ Al-Muaisem ក្នុងទីក្រុង Mecca ។ ការស្លាប់ស្ទើរតែទាំងអស់ក្នុងចំណោមអ្នកធ្វើធម្មយាត្រាអេហ្ស៊ីប ដោយសារតែជំងឺដាច់សរសៃឈាមខួរក្បាល ដោយមានករណីតែមួយប៉ុណ្ណោះដែលស្លាប់ដោយសាររបួស បន្ទាប់ពីត្រូវបានបុកនៅក្នុងហ្វូងមនុស្ស។
ជនរងគ្រោះផ្សេងទៀតមានជនជាតិហ្ស៊កដានីចំនួន ៦០នាក់បានស្លាប់ក្នុងរដូវធម្មយាត្រាឆ្នាំនេះ ដែលកើនឡើងជិត ២០នាក់បើធៀបនឹងចំនួនដែលបានប្រកាសដោយរដ្ឋាភិបាលហ្ស៊កដានីមួយថ្ងៃមុន។
ការិយាល័យស្ថិតិទូទៅរបស់អារ៉ាប៊ីសាអូឌីតបានប៉ាន់ប្រមាណថានៅឆ្នាំនេះ មានអ្នកធ្វើធម្មយាត្រាជាង១,៨លាននាក់នឹងធ្វើដំណើរទៅកាន់ទីក្រុង Mecca ដើម្បីចូលរួមក្នុងពិធីបុណ្យ Hajj ដែលជាធម្មយាត្រាដ៏ធំបំផុតមួយរបស់ពិភពលោក។
ពិធីបុណ្យនេះ ត្រូវបានចាត់ទុកថាជាកាតព្វកិច្ចសាសនាដែលប្រជាជនម៉ូស្លីមពេញវ័យត្រូវតែអនុវត្តយ៉ាងហោចណាស់ម្តងក្នុងជីវិត ប្រសិនបើមានលក្ខខណ្ឌសុខភាព និងហិរញ្ញវត្ថុគ្រប់គ្រាន់។
ការរត់ជាន់គ្នា ភ្លើងឆេះតង់ កំដៅ និងកត្តាជាច្រើនទៀតបានបណ្តាលឱ្យមនុស្សរាប់រយនាក់ស្លាប់ក្នុងអំឡុងពេលធ្វើធម្មយាត្រាទៅកាន់ទីក្រុង Mecca ក្នុងរយៈពេល៣០ឆ្នាំកន្លងមកនេះ។ ពិធីជាច្រើនត្រូវបានអនុវត្តនៅខាងក្រៅ និងតម្រូវឱ្យដើរ ដែលបង្កការលំបាកបន្ថែមសម្រាប់អ្នកធ្វើធម្មយាត្រា ជាពិសេសមនុស្សចាស់។
សីតុណ្ហភាពក្នុងរដូវធម្មយាត្រាច្រើនតែលើស៤០អង្សា។ ប៉ុន្តែរដូវធម្មយាត្រាឆ្នាំនេះនៅទីក្រុង Mecca មានអាកាសធាតុកាន់តែអាក្រក់ឡើងដល់ ៤៧អង្សានៅថ្ងៃទី១៦ ខែមិថុនា និងលើសពី៥០អង្សាសេនៅថ្ងៃទី១៧ ខែមិថុនា។ សីតុណ្ហភាពនៅព្រះវិហារធំនៅ Mecca នៅថ្ងៃទី១៧ ខែមិថុនា មានដល់ ៥១,៨អង្សា។
កាលពីថ្ងៃទី១៧ ខែមិថុនា ក្រសួងការបរទេសអេហ្ស៊ីបបានប្រកាសថា ខ្លួនកំពុងសម្របសម្រួលជាមួយរដ្ឋាភិបាលអារ៉ាប៊ីសាអូឌីត ដើម្បីស្វែងរកពលរដ្ឋដែលបាត់ខ្លួននៅទីក្រុង Mecca ។ មន្ត្រីអេហ្ស៊ីបបានបញ្ជាក់ថា មានអ្នកស្លាប់ច្រើននាក់ក្នុងរដូវធម្មយាត្រា ប៉ុន្តែមិនបានបញ្ជាក់ថាមានពលរដ្ឋអេហ្ស៊ីបឬអត់។
កន្លងមក ក្រសួងសុខាភិបាលអារ៉ាប៊ីសាអូឌីតបាននិយាយថា ខ្លួនបានជួយអ្នកធ្វើធម្មយាត្រាជាង២៧០០នាក់ ដែលទទួលរងពីជំងឺដាច់សរសៃឈាមខួរក្បាលក្នុងទីក្រុង Mecca តែក៏មិននិយាយពីចំនួនអ្នកស្លាប់នោះទេ។
ជារៀងរាល់ឆ្នាំ អ្នកធម្មយាត្រារាប់ម៉ឺននាក់ចូលរួមក្នុងពិធីបុណ្យ Hajj ប៉ុន្តែមិនបានស្នើសុំទិដ្ឋាការពិសេសពីរដ្ឋាភិបាលអារ៉ាប៊ីសាអូឌីត ព្រោះដើម្បីសន្សំការចំណាយ។ អ្នកដែលមិនមានទិដ្ឋាការប្រភេទនេះ នឹងមិនអាចទៅដល់កន្លែងដែលមានម៉ាស៊ីនត្រជាក់ និងកន្លែងឈប់សម្រាកដែលរៀបចំដោយអាជ្ញាធរមូលដ្ឋានតាមផ្លូវធម្មយាត្រាបានទេ៕