តាមរយៈសារសំឡេងតាមប្រព័ន្ធតេឡេក្រាម នៅព្រឹកថ្ងៃទី៨ ខែតុលា សម្ដេច ហ៊ុន ម៉ាណែត បានលើកឡើងថា រដ្ឋាភិបាលកម្ពុជា ពិតជាសោកស្ដាយយ៉ាងខ្លាំងចំពោះករណីនិស្សិតកម្ពុជាស្លាប់ ក្នុងហេតុការណ៍ប្រយុទ្ធគ្នារវាងកងទ័ពអ៊ីស្រាអែល និងក្រុមហាម៉ាស់។ យ៉ាងណា តាំងពីសភាពការណ៍ផ្ទុះឡើង កាលថ្ងៃទី៧ តុលាមក រដ្ឋាភិបាលកម្ពុជា បានទំនាក់ទំនងជាមួយអាជ្ញាធរអ៊ីស្រាអែល ជាប់ជាប្រចាំ ដើម្បីធានាដល់ការជួយសង្រោះពលរដ្ឋខ្មែរ។ តាមរយៈកិច្ចសហការ អាជ្ញាធរអ៊ីស្រាអែល បានជួយសង្រ្គោះនិស្សិត៣រូប ស្ថិតក្នុងចំណោមអ្នកដែលបានស្លាប់ចេញពីតំបន់ក្រហម និងបានបញ្ជូនពួកគេទៅតំបន់សុវត្ថិភាព។ 
 

លោក ថ្លែងដូច្នេះថា៖«នេះគឺជាកិច្ចការសំខាន់ក្នុងការធានាសុវត្ថិភាពពលរដ្ឋខ្មែរនៅអ៊ីស្រាអែល។ ក្នុងន័យនេះ ក្រសួងពាក់ព័ន្ធបានធ្វើការជាប់ជាប្រចាំ ជាមួយដៃគូររបស់ខ្លួន នៅអ៊ីស្រាអែល ដើម្បីធ្វើយ៉ាងណា សហការជាមួយអាជ្ញាធរអ៊ីស្រាអែល ដើម្បីផ្ដល់ការការពារសុវត្ថិភាព និងអាយុជីវិត ពលរដ្ឋខ្មែរយើង ដែលនៅទីនោះ»។ 
 

ជាមួយគ្នានេះ សម្ដេច ហ៊ុន ម៉ាណែត បានណែនាំឱ្យនិស្សិត និងពលរដ្ឋខ្មែរ ស្ដាប់តាមការណែនាំរបស់អាជ្ញាធរអាស្រាអែល ដើម្បីធានាបានសុវត្ថិភាព ខណៈសភាពការណ៍កំពុងតានតឹង។