ជាតិ
អាជ្ញាធរ រកឃើញសារធាតុគីមីលើខ្ញី ដែលដាក់លក់នៅភ្នំពេញ ![មន្រ្តីជំនាញបង្រ្កាបការក្លែងបន្លំ រកឃើញសារធាតុគីមី ឈ្មោះថា Sodium Hydrosulfite លើខ្ញី នៅតាមទីតាំងកែច្នៃ និងចែកចាយមួយកន្លែង នៅភ្នំពេញ។ រូបភាព៖ ក.ប.ប](https://image.thmeythmey.com/pictures/2023/11/15/c.png)
មន្រ្តីជំនាញបង្រ្កាបការក្លែងបន្លំ រកឃើញសារធាតុគីមី ឈ្មោះថា Sodium Hydrosulfite លើខ្ញី នៅតាមទីតាំងកែច្នៃ និងចែកចាយមួយកន្លែង នៅភ្នំពេញ។ រូបភាព៖ ក.ប.ប
×![]()
ភ្នំពេញ៖ មន្រ្តីជំនាញបង្រ្កាបការក្លែងបន្លំ បានរកឃើញសារធាតុគីមីឈ្មោះថា Sodium Hydrosulfite លើខ្ញី នៅតាមទីតាំងកែច្នៃ និងចែកចាយមួយក្នុងចំណោម៣កន្លែង ស្ថិតក្នុងភូមិសាស្រ្ត បឹងសាឡាង ផ្សារនាគមាស និងសង្កាត់ផ្សារដើមគរ។ គីមីប្រភេទនេះ មិនត្រូវបានអនុញ្ញាតឱ្យប្រើប្រាស់ជាសារធាតុបន្ថែមក្នុងម្ហូបអាហារនោះទេ ព្រោះវាអាចបង្កផលប៉ះពាល់ដល់សុខភាពធ្ងន់ធ្ងរ និងឈានដល់ការបាត់បង់ជីវិត។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម នៅថ្ងៃទី១៤ ខែវិច្ឆិកា បានរកឃើញទីតាំងមួយកន្លែងប្រើប្រាស់សារធាតុគីមីគ្មានស្លាកសញ្ញា ជាម្សៅស ចំនួន៨៥គីឡូក្រាម និងសាជូរ២៨បាវ ស្មើនឹង ៨៣០គីឡូក្រាម។ សារធាតុនេះ ត្រូវបានគេយកទៅប្រើប្រាស់ដោយលាយជាមួយទឹក ហើយដាក់ខ្ញីដែលហាន់រួចត្រាំជាមួយ មុននឹងចែកចាយលក់។
ការវិភាគបឋមទៅលើគំរូម្សៅសនេះ បង្ហាញថា វាគឺជាសារធាតុគីមីម្យ៉ាងមានឈ្មោះ Sodium Hydrosulfite ដែលជាប្រភេទសារធាតុគីមី មិនត្រូវបានអនុញ្ញាតឱ្យប្រើប្រាស់ជាសារធាតុបន្ថែមក្នុងម្ហូបអាហារនោះទេ។ ការទទួលទានម្ហូបអាហារដែលចេញពីសារធាតុគីមីនេះ អាចបណ្តាលឱ្យពិបាកដកដង្ហើម សម្ពាធឈាមចុះទាប វិលមុខ ឈឺពោះ ក្អួតចង្អោរ រាគរូស។ ចំពោះ អ្នក Allergic និងអ្នកមានជំងឺហឺត អាចបណ្តាលឱ្យពិបាកដកដង្ហើម និងអាចឈានដល់ការបាត់បង់ជីវិត។
![](https://image.thmeythmey.com/pictures/2023/11/15/c__1_.jpg)
សារធាតុគីមី Sodium Hydrosulfite ត្រូវបានម្ចាស់កែច្នៃ និងចែកចាយខ្ជី បញ្ជាទិញពីផ្សារច្បារអំពៅ។ នេះបើតាមការបញ្ជាក់របស់ ក.ប.ប.។
ជាវិធានការ មន្ត្រីជំនាញបង្រ្កាបការក្លែងបន្លំ បានដកហូតនូវសារធាតុគីមី Sodium Hydrosulfite ចំនួន៨៥គីឡូក្រាម យកមករក្សាទុកបណ្តោះអាសន្ននៅសាខា ក.ប.ប. រាជធានីភ្នំពេញ។ ឃាត់បានខ្ញី ដែលកំពុង ត្រាំក្នុងធុងជ័រចំនួន៣ធុង ស្មើនឹង២៥០គីឡូក្រាម ព្រមទាំងឃាត់បានសារធាតុសាច់ជូរ៨៣០គីឡូក្រាម ដើម្បីតាមដានអំពីគោលដៅប្រើប្រាស់។
ដោយឡែក គំរូសំណាក ត្រូវបានទៅវិភាគនៅមន្ទីរពិសោធន៍របស់អគ្គនាយកដ្ឋាន ក.ប.ប. បន្ត។ ក្នុងករណីរកឃើញមានសារធាតុគីមីហាមឃាត់ធ្វើឱ្យប៉ះពាល់ដល់សុខភាព អគ្គនាយកដ្ឋាន ក.ប.ប. នឹងចាត់វិធានការតាមផ្លូវច្បាប់។
ជាមួយគ្នានេះ ក.ប.ប. បានអំពាវនាវដល់បុគ្គលធ្វើធុរកិច្ចម្ហូបអាហារ ជាអាទិ៍ អ្នកនាំចូល ផលិតករ សិប្បករ អ្នកកែច្នៃ អ្នកស្តុកទុក អ្នកចែកចាយ អ្នកលក់ដូរម្ហូបអាហារទាំងអស់ កុំប្រើប្រាស់សារធាតុគីមីហាមឃាត់ក្នុងចំណីអាហារ ដែលធ្វើឱ្យប៉ះពាល់ដល់សុខភាពអ្នកទទួលទាន។ ករណីធ្ងន់ធ្ងរ វាអាចបណ្ដាលឱ្យបាត់បង់ជីវិតភ្លាមៗ បង្ករជាជំងឺរ៉ាំរ៉ៃ ឬជំងឺប្រចាំកាយរយៈពេលជាយូរអង្វែង៕
![](https://image.thmeythmey.com/pictures/2023/11/15/c__2_.jpg)
Tag:
ក្រសួងពាណិជ្ជកម្ម
Sodium Hydrosulfite
© រក្សាសិទ្ធិដោយ thmeythmey.com