ថ្លែងនៅក្នុងទីក្រុង Frankfurt អាល្លឺម៉ង់ នៅថ្ងៃទី២១ ខែឧសភា លោកស្រី Janet Yellen បានអំពាវនាវឱ្យអឺរ៉ុបឆ្លើយតបទៅនឹងគោលនយោបាយឧស្សាហកម្មរបស់ចិនតាមរបៀប «វិធីបង្រួបបង្រួម » ដើម្បីជួយក្រុមហ៊ុនផលិតនៅលើភាគីទាំងសងខាងនៃមហាសមុទ្រអាត្លង់ទិកអាចបន្តដំណើរការអាជីវកម្ម។ 

 

ដោយលើកឡើងពីសារៈសំខាន់នៃសម្ព័ន្ធភាពអាម៉េរិក-អឺរ៉ុប លោកស្រី Yellen បានចោទប្រកាន់លើផលិតកម្មឧស្សាហកម្មលើសចំណុះរបស់ចិន ថាបានគំរាមកំហែងទាំងក្រុមហ៊ុនរបស់សម្ព័ន្ធភាព និងទីផ្សារដែលកំពុងរីកចម្រើន។

 

ការលើកឡើងរបស់លោកស្រី Yellen ធ្វើឡើងមួយសប្តាហ៍បន្ទាប់ពីរដ្ឋបាលលោក ចូ បៃឌិន បានប្រកាសពន្ធថ្មីលើរថយន្តអគ្គិសនី បន្ទះសូឡា សឺមីកុងឌុចទ័រ ដែកថែប និងផលិតផលឧស្សាហកម្មយុទ្ធសាស្ត្រផ្សេងៗទៀតដែលនាំចូលពីចិន។

 

កាលពីខែមេសា លោកស្រី Yellen បានប្រាប់មន្ត្រីចិនថា អាម៉េរិកនឹងមិនទទួលយកការផលិតច្រើនហួសហេតុរបស់ប្រទេសនេះទេ ដោយធ្វើឱ្យទីផ្សារពិភពលោកពោរពេញដោយទំនិញថោកៗ។

 

អាម៉េរិករំពឹងថា សម្ព័ន្ធភាពជាមួយ EU នឹងបញ្ចុះបញ្ចូលថា ដៃគូពាណិជ្ជកម្មដ៏ធំបំផុតរបស់ខ្លួន ត្រៀមខ្លួនជាស្រេចក្នុងការដំឡើងរបាំងការពារ ដើម្បីទប់ស្កាត់រថយន្តអគ្គិសនី អាគុយ និងទំនិញផ្សេងទៀតពីការត្រួតត្រាទីផ្សារលោកខាងលិច។ ទោះបីជាយ៉ាងណាក៏ដោយ លោកស្រីបាននិយាយថា អាម៉េរិកមិនព្យាយាមអនុវត្តគោលនយោបាយប្រឆាំងនឹងរដ្ឋាភិបាលទីក្រុងប៉េកាំងនោះទេ។

 

និន្នាការ​គាំពារនិយម​ទំនង​ជា​ក្លាយ​ជា​ចំណុច​នៃ​ជម្លោះ​រវាង​រដ្ឋាភិបាល​ក្រុង​ប៉េកាំង និង​ប្រទេស​ជឿនលឿន​ខាង​លិច។ កាលពីសប្តាហ៍មុន បន្ទាប់ពីលោក បៃឌិន បានប្រកាសដំឡើងពន្ធដល់ ១៨ពាន់លានដុល្លារលើផលិតផលចិន អ្នកនាំពាក្យស្ថានទូតចិនប្រចាំនៅទីក្រុង Washington លោក Liu Pengyu បានចេញសារប្រឆាំងភ្លាមៗ។

 

លោក Liu បាននិយាយថា ៖« យើងរំពឹងថា អាម៉េរិកអាចទទួលយកទស្សនៈវិជ្ជមាននៃការអភិវឌ្ឍរបស់ចិន និងបញ្ឈប់ការប្រើប្រាស់ពាក្យលើសចំណុះជាលេសសម្រាប់ការគាំពារនិយមពាណិជ្ជកម្ម»។

 

ពន្ធគយថ្មីរបស់អាម៉េរិកអាចដាក់សម្ពាធបន្ថែមទៀតលើអឺរ៉ុបឱ្យបង្កើតរបាំងពាណិជ្ជកម្មដើម្បីការពារទីក្រុងប៉េកាំងពីការផ្លាស់ប្តូរការនាំចេញកាន់តែច្រើននៅទីនោះ។ មន្ត្រីអឺរ៉ុបកំពុងពិចារណាដាក់ពន្ធបន្ថែមលើរថយន្តចិន ដែលបង្កការគំរាមកំហែងពិសេសដល់អាល្លឺម៉ង់។

 

ប្រហែល ៣៧ភាគរយនៃយានជំនិះអគ្គិសនីទាំងអស់ដែលនាំចូលទៅអឺរ៉ុបត្រូវបានផលិតនៅចិន រួមទាំងម៉ាកក្នុងស្រុកដូចជា ក្រុមហ៊ុន Tesla និងក្រុមហ៊ុនផលិតរថយន្តអាល្លឺម៉ង់ដែលមានរោងចក្រនៅទីនោះ។ អឺរ៉ុប ជាទីផ្សាររថយន្តអគ្គិសនីធំទីពីររបស់ពិភពលោក ហើយការនាំចូលបានកើនឡើងកាលពីឆ្នាំមុនដល់ ១១,៥ ពាន់លានដុល្លារ ពី ១,៦ពាន់លានដុល្លារក្នុងឆ្នាំ២០២០ ។

 

គណៈកម្មការអឺរ៉ុបកំពុងស៊ើបអង្កេតថាតើការឧបត្ថម្ភធនរបស់ទីក្រុងប៉េកាំងដល់ក្រុមហ៊ុនរបស់ខ្លួនកំពុងធ្វើឱ្យប៉ះពាល់ដល់ឧស្សាហកម្មរថយន្តក្នុងតំបន់ដែរឬយ៉ាងណា។ វិស័យនេះផ្តល់ការងារដោយផ្ទាល់ និងដោយប្រយោលជិត ១៤លាននាក់នៅអឺរ៉ុប ដោយបាននាំចេញរថយន្តចំនួន ៦លានគ្រឿងកាលពីឆ្នាំមុន៕