ជាតិ
សេដ្ឋកិច្ច
ធនាគារពិភពលោកផ្តល់កម្ចី៤០លានដុល្លារដល់កម្ពុជា ដើម្បីលម្អការបណ្តុះបណ្តាលជំនាញពលរដ្ឋ លោកស្រី ម៉ារីយ៉ាម សាលីម ប្រធានគ្រប់គ្រងនៃធនាគារពិភពលោកប្រចាំនៅកម្ពុជា។ រូបថត៖ ទំព័រហ្វេសប៊ុកធនាគារពិភពលោកប្រចាំកម្ពុជា
× ក្រុមប្រឹក្សានាយកប្រតិបត្តិរបស់ធនាគារពិភពលោកបានអនុម័តឥណទានតម្លៃ ៤០លានដុល្លារ លើគម្រោងបង្កើនជំនាញដល់ពលរដ្ឋកម្ពុជា ដើម្បីរកការងារបានកាន់តែល្អ។ គម្រោងនេះមានរយៈពេល៥ឆ្នាំ នឹងផ្តល់អត្ថប្រយោជន៍ដល់ពលរដ្ឋខ្មែរប្រមាណ៣៣០០០នាក់ តាមរយៈការកែលម្អការបណ្តុះបណ្តាលជំនាញ និងសេវាកម្មទីផ្សារការងារ។
សេចក្ដីប្រកាសព័ត៌មានធនាគារពិភពលោក((World Bank)នាថ្ងៃទី២៤ឧសភា បានបញ្ជាក់ថា កម្ចី៤០លានដុល្លារដែលកម្ពុជានឹងទទួលបាននេះ គឺត្រូវប្រើប្រាស់សម្រាប់លើកកម្ពស់គុណភាព និងជំនាញពាក់ព័ន្ធការងារនៅក្នុងចំណោមកម្លាំងពលកម្មរបស់ប្រទេស។ លើសពីនេះ កម្ចីនេះនឹងជួយបង្កើនលក្ខណៈសម្បត្តិទទួលបានការងារ និងរកប្រាក់ចំណូលបានរបស់កម្មករ។
« កម្ចីនេះ នឹងជួយទ្រទ្រង់ដល់គម្រោង ជំនាញសម្រាប់ទទួលបានការងារកាន់តែប្រសើរ (Skills for Better Jobs) ដែលពង្រឹងការអប់រំ និងបណ្តុះបណ្តាលបច្ចេកទេស និងវិជ្ជាជីវៈ, កែលម្អការណែនាំអំពីអាជីព និងការជួយរកការងារធ្វើ, និងធ្វើការពាក់ព័ន្ធជាមួយនិយោជក ឲ្យបានកាន់តែប្រសើរនៅក្នុងការរៀបចំបង្កើតកម្មវិធីបណ្តុះបណ្តាល»។ នេះបើតាមធនាគារពិភពលោក។
សេដ្ឋកិច្ច និងការងាររបស់កម្ពុជាមានការរីកចម្រើនយ៉ាងឆាប់រហ័សក្នុងប៉ុន្មានទសវត្សរ៍ចុងក្រោយនេះ ដោយសារស្ថិរភាពម៉ាក្រូសេដ្ឋកិច្ច ការបើកចំហពាណិជ្ជកម្ម រួមទាំងភាពអនុគ្រោះសម្រាប់ចូលទីផ្សារលោកខាងលិចបានជួយកម្ពុជាក្នុងការទាក់ទាញការវិនិយោគផ្ទាល់ពីក្រៅ។ ទោះជាយ៉ាងណាក៏ដោយ គុណភាពនៃការងារនៅតែមានកម្រិតទាប ក្នុងនោះ ៩៨ភាគរយនៃការងារនៅក្នុងប្រទេសសុទ្ធតែជាការងារមានជំនាញទាប ហើយក្នុងនោះទៀត មួយផ្នែកធំ គឺជាការងារក្រៅប្រព័ន្ធផ្លូវការ។
គម្រោង «ជំនាញសម្រាប់ទទួលបានការងារកាន់តែប្រសើរ»នេះ ត្រូវបានរៀបចំឡើងដើម្បីជួយកម្ពុជា ធ្វើពិពិធកម្មសេដ្ឋកិច្ចរបស់ខ្លួននៅតាមវិស័យនានា ដែលទាមទារឲ្យមានជំនាញកម្រិតមធ្យមថែមទៀត។ គម្រោងនេះ នឹងអនុវត្តដោយក្រសួងការងារ និងបណ្តុះបណ្តាលវិជ្ជាជីវៈ និងមូលនិធិអភិវឌ្ឍន៍ជំនាញ។
លោកស្រី ម៉ារីយ៉ាម សាលីម ប្រធានគ្រប់គ្រងនៃធនាគារពិភពលោកប្រចាំនៅកម្ពុជា បានលើកឡើងថា៖ «នៅពេលកម្ពុជាខិតខំបោះជំហានឈានឡើងនៅក្នុងខ្សែច្រវាក់តម្លៃ និងធ្វើពិពិធកម្មផលិតកម្មរបស់ខ្លួន ការបង្កើនជំនាញកម្លាំងពលកម្មបច្ចុប្បន្ន និងនាពេលខាងមុខនឹងក្លាយជាកិច្ចការគន្លឹះមួយ សម្រាប់ទាក់ទាញការវិនិយោគផ្ទាល់ពីបរទេសកាន់តែច្រើន និងកាន់តែប្រសើរឡើង និងឆ្លើយតបបានកាន់តែល្អទៅនឹងតម្រូវការរបស់និយោជក»។ បើតាមអ្នកជំនាញរូបនេះ ការបណ្តុះបណ្តាលជំនាញបច្ចេកទេស នឹងឆ្លើយតបបានទៅនឹងតម្រូវការ បន្ថែមដោយការបណ្តុះបណ្តាលជំនាញ ដូចជា ជំនាញឌីជីថល និងជំនាញឥរិយាបថ ជាដើម អាចជួយកម្ពុជាឈានទៅសម្រេចគោលបំណងរបស់ខ្លួនបាន។
ធនាគារពិភពលោកបានរំពឹងថាគម្រោងខាងលើនេះ នឹងធ្វើឱ្យនិយោជកពេញចិត្តជាងមុនជាមួយនឹងជំនាញរបស់និយោជិកដែលបានបញ្ចប់ការបណ្តុះបណ្តាល, ការកើនឡើងនូវអ្នកបញ្ចប់ការសិក្សាដែលរកការងារបានប្រាក់ឈ្នួលក្នុងកម្រិតខ្ពស់ជាងប្រាក់ឈ្នួលមធ្យមជាតិ។ គម្រោងនេះ ក៏នឹងលើកកម្ពស់មតិយោបល់របស់ឧស្សាហកម្មនានានៅក្នុងការរចនា ការផ្តល់ការបណ្តុះបណ្តាល ការសម្របសម្រួលកិច្ចសន្ទនា ការសហការរវាងស្ថាប័នបណ្តុះបណ្តាល និងនិយោជក ជាពិសេស គឺលើកកម្ពស់ប្រព័ន្ធព័ត៌មានទីផ្សារការងារ និងបង្កើនចំនួនបុគ្គលដែលទទួលបានការប្រឹក្សាការងារ និងការណែនាំអំពីការងារ៕
© រក្សាសិទ្ធិដោយ thmeythmey.com