ចំពោះការងារស្នូលរបស់ក្រសួងមុខងារសាធារណៈ លោក ហ៊ុន ម៉ានី មានប្រសាសន៍ថា តាំងពីដើមអាណត្តិមក គឺបានរៀបចំការកែសម្រួលរចនាសម្ព័ន្ធក្រសួង ដោយបង្រួមមិនឱ្យជាន់តួនាទីភារកិច្ច ដើម្បីធានាប្រសិទ្ធភាពនៃការអនុវត្តតួនាទីភារកិច្ច ជាពិសេសកែសម្រួលនិយាម នៃការផ្ដល់សេវារបស់ក្រសួងមុខងារសាធារណៈផងដែរ។ 
 

បើតាមរដ្ឋមន្រ្តីរូបនេះ នាពេលកន្លងទៅ ក្រសួងបានធ្វើបច្ចុប្បន្នភាពទីប្រឹក្សា និងជំនួយការ របស់ក្រសួង ស្ថាប័ន ដើម្បីរៀបចំការតែងតាំងឡើងវិញ។ លោក ហ៊ុន ម៉ានី បន្ថែមថាក្នុងរយៈពេល៩ខែនេះ ក្រសួងមុខងារសាធារណៈ បន្តអនុវត្តការងារស្នូលរបស់ខ្លួនប្រកប ដោយប្រសិទ្ធភាព និងភាពរលូន ដែលធានាបាននូវការបើកបៀវត្សមន្រ្តីរាជការស៊ីវិលជាទៀងទាត់។ 
 

ដោយឡែក ក្នុងក្របខណ្ឌគណៈកម្មការកែទម្រង់សាធារណៈវិញ ក្រសួងកំពុងរៀបចំសេចក្ដីព្រាងកម្មវិធីជាតិកែទម្រង់រដ្ឋបាលសាធារណៈ ឆ្នាំ២០២៤-២០៣៥ និងជំរុញក្រសួងស្ថាប័ន ឱ្យរៀបចំការវិភាគមុខងារ និងរចនាសម្ព័ន្ធ ដែលជាវិធានការគន្លឹះទី២ របស់រាជ រដ្ឋាភិបាលកម្ពុជា។ ត្រង់ចំណុចនេះ លោក ហ៊ុន ម៉ានី សង្ងត់ធ្ងន់ថា ការវិភាគមុខងារ និងរចនាសម្ព័ន្ធច្បាស់លាស់របស់ក្រសួងស្ថាប័ន នឹងអនុញ្ញាតឱ្យក្រសួងស្ថាប័ន អាចបង្កើនប្រសិទ្ធភាព និងប្រសិទ្ធផលការងារ តាមរយៈការប្រើប្រាស់ធនធានថវិកា និងធនធានមនុស្សកាន់តែមានប្រសិទ្ធភាព ចំគោលដៅ ចំទីកន្លែងស្របតាមតួនាទីភារកិច្ចរបស់ក្រសួងស្ថាប័ននីមួយៗ។