អសីលធម៌! រឿងរ៉ាវទុក្ខសោកអ្នកដទៃ ក្លាយជាសារកំប្លែងលេងសើចរបស់បុគ្គលមួយចំនួន

ជាតិ

អសីលធម៌! រឿងរ៉ាវទុក្ខសោកអ្នកដទៃ ក្លាយជាសារកំប្លែងលេងសើចរបស់បុគ្គលមួយចំនួន

27, May 2024 , 4:19 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភាសាចំអាសចំអូង អាសអាភាស សារកំប្លែងលេងសើច តែងតែត្រូវបានបង្ហោះព្រោងព្រាតពេញបណ្តាញសង្គម។ ទង្វើអសីលធម៌ទាំងនេះ ផុសផុលខ្លាំង ជាពិសេសក្រោយមានករណីទាក់ទងនឹងកេរខ្មាសស្ត្រី ដូចជារំលោភ ការបៀតបៀនផ្លូវភេទ ឬរឿងរ៉ាវស្នេហា។

នៅខែឧសភានេះ នៅលើបណ្ដាញសង្គម មានការជជែកវែកញែកច្រើនលើករណីតារាចម្រៀងរ៉េបរំលោភនារីម្នាក់ ដែលក្នុងនោះ អ្នកប្រើប្រាស់បណ្តាញសង្គមមួយចំនួន លើកយកជនរងគ្រោះ ទៅនិយាយលេងសើច ដោយគ្មានក្តីអាណិតអាសូរក្នុងខ្លួន។

បន្ទាប់ពីមានករណី ឬបញ្ហាអ្វីមួយកើតឡើង វីដេអូដែលពាក់ព័ន្ធនឹងរឿងនោះ បានបែកធ្លាយនៅតាមក្រុមផ្សេងៗ។ អ្នកបានទស្សនាវីដេអូបែកធ្លាយនោះ បន្តចែករំលែកទៅឱ្យអ្នកដែលចង់មើល ឯអ្នកខ្លះទៀត ដែលមិនបានមើលក៏ឆាតសុំមើលតាមរូបភាពផ្សេងៗ។

សម្រាប់អ្នកបានមើលវីដេអូបែកធ្លាយអាសអាភាសមួយចំនួន បានយកចំណុចអ្វីមួយដែលពួកគេបានឃើញមកបង្ហោះលើបណ្ដាញសង្គម។ ចំពោះអ្នកមិនបានដឹង ក៏បញ្ចេញមតិថា «រឿងអ្វីទៀតហើយ តាមមិនទាន់ទេ» ប៉ុន្តែសម្រាប់អ្នកបានមើលវិញ ក៏បញ្ចេញមតិបកស្រាយដូចជារឿងកំប្លែងទៅវិញ។

លេងសើច ព្រោះរឿងគេ សាច់គេ ចុះបើរឿងឯង សាច់ឯងវិញ?

ចង់ដឹងរឿងអ្នកដទៃ ជាធម្មជាតិរបស់មនុស្សមួយចំនួន។ នៅពេលមានរឿងអ្វីមួយមានការចាប់អារម្មណ៍ខ្លាំងនៅលើបណ្ដាញសង្គម គេតែងឃើញវត្តមានអ្នកបញ្ចេញមតិ មិនថាស្រី ឬបុរសនោះទេ។ ចំពោះរឿងអាស្រូវដែលបានបែកធ្លាយវិញ ត្រូវបានអ្នកប្រើប្រាស់បណ្ដាញសង្គមខ្លះ ឆ្លៀតផលិតវីដេអូសើចសប្បាយនឹងរឿងអាសអាភាសនោះទៀតក៏មាន។

តើការលេងសើចលើទុក្ខអ្នកដទៃ បន្តឱ្យមាននៅក្នុងសង្គមកម្ពុជាទៀតឬទេ? អ្នកប្រើប្រាស់បណ្ដាញសង្គមគ្រប់រូប ជាពិសេសយុវជន គួរតែប្រើប្រាស់បណ្ដាញសង្គមដោយសេចក្ដីថ្លៃថ្នូរ និងទាញប្រយោជន៍ពីវា ជាជាងការប្រមូលតែបញ្ហារបស់អ្នកដទៃមកដាក់ក្នុងខ្លួន។

រឿងរ៉ាវដែលជនរងគ្រោះឆ្លងកាត់លើការរំលោភបំពាន គឺជាទុក្ខដ៏ធំរបស់ពួកគេ។ ក្ដីសោកសៅមួយនេះ មិនមែនជារឿងដែលអ្នកទាំងអស់ត្រូវយកមកលេងសើចលើបណ្ដាញសង្គមនោះទេ។ តើអារម្មណ៍ក្រុមគ្រួសាររងគ្រោះទទួលយកបានទេ នៅពេលកូនស្រីរបស់ខ្លួន ក្លាយជាប្រធានបទលើរឿងកំប្លែងនោះ?

សីលធម៌សង្គម

កម្ពុជា ជាប្រទេសកាន់ព្រះពុទ្ធសាសនា ដែលប្រជាពលរដ្ឋខ្មែរ មានសីលធម៌ថ្លៃថ្នូរ។ សុជីវធម៌ សីលធម៌ និងគុណធម៌ អាចចាត់ទុកជាកន្សោមនៃសុភាវធម៌ ដែលមនុស្សមិនអាចខ្វះបាន។ ប៉ុន្តែបច្ចុប្បន្ន មនុស្សមួយចំនួន ហាក់មិនសូវខ្វល់ខ្វាយលើសីលធម៌សង្គម ជាពិសេសសីលធម៌ក្នុងខ្លួនរបស់ពួកគេតែម្ដង។

វាជាអំពើអសីលធម៌ និងមិនសមរម្យដែលពលរដ្ឋខ្មែរមួយចំនួន លេងសើចមិនយល់ពីអារម្មណ៍អ្នករងគ្រោះលើការរំលោភបំពានផ្សេងៗ។ ពលរដ្ឋខ្មែរ គួរបញ្ឈប់សកម្មភាពចង់ដឹងរឿងមិនមានប្រយោជន៍ ដោយងាកមករងយុត្តិធម៌ដល់បុគ្គលរងគ្រោះវិញទើបជាការល្អ។ ម៉្យាងវិញទៀត ការលេងសើចដើម្បីបម្រើផលប្រយោជន៍របស់ខ្លួន ក៏ជាទង្វើមិនគប្បីផងដែរ។

លើសពីនេះ ការបញ្ចេញមតិដែលល្អ វាធ្វើឱ្យគេសប្បាយចិត្ត ប៉ុន្តែការបញ្ចេញមតិដែលអាក្រក់ វាក៏ធ្វើឱ្យប៉ះពាល់ដល់ផ្លូវចិត្តអ្នករងគ្រោះដូចគ្នា។ ដូច្នេះមុនវាចា ឬសរសេរពាក្យពេចន៍ខ្លឹមសារចេញពីបបូរមាត់ គួរតែគិតឱ្យបានវែងឆ្ងាយ។

ទម្លាប់បន្ទោសជនរងគ្រោះ...

នៅពេលមានបញ្ហាអ្វីមួយកើតឡើង គេសង្កេតឃើញបុគ្គលមួយចំនួន ចូលចិត្តបន្ទោសជនរងគ្រោះ ជាពិសេសរឿងរ៉ាវកើតលើស្រ្តីភេទ។ «ផឹកស៊ីជាមួយគេ ដាច់យប់ ចូលដេកអូតែលនឹងគេសោះ ថា Rapper ចាប់រំលោភ + (ក្មេងស្រីអីឡូវមួយចំនួន អាស រមាស់ណាស់ បើមិនចង់ មិនមែនព្រមឡើងអូតែលទេ) ទះដៃម្ខាង មិនលឺទេ នាង...»។ នេះសាររបស់បុគ្គលម្នាក់ដែលមានប្រជាប្រិយភាពបង្ហោះលើបណ្ដាញសង្គម។

ចំណែកអ្នកខ្លះទៀត បន្ទោសជនរងគ្រោះ ដោយសារការស្លៀកពាក់ ឬមកពីសេពជាតិស្រវឹងជាដើម។ ទម្លាប់បន្ទោសជនរងគ្រោះបែបនេះ បានធ្វើឱ្យជនរងគ្រោះមួយចំនួន មិនហ៊ានចេញមុខប្ដឹង ឬប្រាប់រឿងរ៉ាវដែលគេជួបប្រទះ។ ជនរងគ្រោះខ្លះ សំងំទុកនៅក្នុងចិត្ត រហូតកើតជំងឺផ្លូវចិត្តជាដើម។

ផ្ទុយទៅវិញ ពលរដ្ឋគ្រប់រូប គួរចេះឈឺឆ្អាល និងរកដំណោះស្រាយល្អសម្រាប់សង្គម ជាពិសេសលុបបំបាត់ការរំលោភបំពានគ្រប់ទម្រង់។ ជាមួយគ្នានេះ ពលរដ្ឋកម្ពុជា មិនគួរបន្តទម្លាប់បន្ទោសជនរងគ្រោះលើករណីរំលោភបំពានណាមួយឡើយ៕