ជាតិ
បេក្ខជនជិត ៤ម៉ឺននាក់ ត្រូវប្រឡងជ្រើសរើសគ្រូបង្រៀនថ្នាក់ «បឋមសិក្សា» ![រូបភាពតំណាង។](https://image.thmeythmey.com/pictures/2024/06/08/4620241657a.jpg)
រូបភាពតំណាង។
×![]()
ភ្នំពេញ៖ បេក្ខជនជិត ៤ម៉ឺននាក់ ត្រូវបានអនុញ្ញាតឱ្យចូលប្រឡងប្រជែងជ្រើសរើសគ្រូបង្រៀននៅ «បឋមសិក្សា» ក្រោយចុះឈ្មោះ និងបំពេញតាមលក្ខខណ្ឌគ្រប់គ្រាន់។ នេះបើតាមសេចក្ដីសម្រេចរបស់ក្រសួងមុខងារសាធារណៈ ស្ដីពីការទទួលស្គាល់បេក្ខជនសម្រាប់ការប្រឡងប្រជែងជ្រើសរើសគ្រូបង្រៀននៅបឋមសិក្សា។
ក្រោយប្រកាសទទួលពាក្យប្រឡងប្រជែងជ្រើសរើសគ្រូបង្រៀននៅបឋមសិក្សា កាលពីចុងខែមេសា ក្រសួងមុខងារសាធារណៈ បានប្រកាសទទួលស្គាល់បេក្ខជនចំនួន ៣៨ ១៦៨នាក់ ដែលមានសិទ្ធិប្រឡង។ ដំណើរការប្រឡងប្រជែងជ្រើសរើសគ្រូបង្រៀននៅបឋមសិក្សា ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា នឹងចាប់ផ្ដើមនាពេលឆាប់ៗនេះ។
បេក្ខជនប្រឡង មានចំនួន ៣៨ ១៦៨នាក់ ក្នុងនោះស្រីចំនួន ២៨ ៤៥៦នាក់ ដែលមកពី២៥រាជធានី-ខេត្ត។ បើតាមសេចក្ដីសម្រេចទួលស្គាល់បេក្ខជនរបស់ក្រសួងមុខងារសាធារណៈ ចេញផ្សាយថ្ងៃទី១ មិថុនា ខេត្តសៀមរាប មានបេក្ខជនចុះឈ្មោះប្រឡងច្រើនជាងគេ រហូតដល់ជាង ៤ពាន់នាក់។ ដោយឡែកខេត្តបាត់ដំបង មានបេក្ខជនជាង ៣ពាន់នាក់ និងខេត្តព្រៃវែង មានបេក្ខជនជិត៣ពាន់នាក់។
ការប្រឡងនេះ នឹងសម្រេចជ្រើសរើសគ្រូបង្រៀននៅបឋមសិក្សា ចំនួន ១៣៤៧នាក់ ក្នុងនោះជ្រើសរើសគ្រូបង្រៀនបឋមសិក្សា ១២+៤ ចំនួន ៣០០នាក់ និងគ្រូបង្រៀនបឋមសិក្សា ១២+២ ចំនួន ១០៤៧នាក់។ បន្ទាប់ពីប្រឡងជាប់ បេក្ខជនទាំងអស់ នឹងទទួលបានការបណ្ដុះបណ្ដាល រយៈពេល៤ឆ្នាំ និង២ឆ្នាំ ដោយចាប់ផ្ដើមនៅក្នុងឆ្នាំ២០២៤ នៅតាមវិទ្យាស្ថានគរុកោសល្យ និងសាលាគរុកោសល្យ និងវិក្រឹតការខេត្ត៕
Tag:
ក្រសួងមុខងារសាធារណៈ
អប់រំ
គ្រូបង្រៀន
បឋមសិក្សា
© រក្សាសិទ្ធិដោយ thmeythmey.com