ជាតិ
សេដ្ឋកិច្ច
កំពង់ផែពហុបំណងកំពត ដំណាក់កាលទី១ តម្លៃជាង១៤០លានដុល្លារ ត្រូវបានដាក់ឱ្យប្រើប្រាស់ផ្លូវការ
× កំពង់ផែពហុបំណងកំពត ដែលស្ថាបនារួចដំណាក់កាលទី១ ដោយចំណាយទឹកប្រាក់ប្រមាណ ១៤០លានដុល្លារ ត្រូវបានសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី៦មិថុនានេះ ក្រោមវត្តមាន សម្តេច ហ៊ុន ម៉ាណែត នាយករដ្ឋមន្ត្រីកម្ពុជា។ កំពង់ផែពហុបំណងកំពតនេះ ស្ថិតនៅភូមិគីឡូ១២ សង្កាត់កោះតូច និងសង្កាត់បឹងទូក ក្រុងបូកគោ។
លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ក្នុងពិធី បើកសម្ពោធនេះថា ហេដ្ឋារចនាសម្ព័ន្ធរូបវន្តសំខាន់ៗ ដែលត្រូវបានស្ថាបនានៅក្នុងដំណាក់កាលទី១ នេះមានចំណតនាវា មានបណ្តោយប្រវែង ៤៥០ម៉ែត្រ និងទទឹងប្រវែង ៦០ម៉ែត្រ, ទីលានកុងតឺន័រ ទំហំផ្ទៃសរុប ៥,៥ម៉ឺនម៉ែត្រការ៉េ, ឃ្លាំងស្តុកទំនិញមានទំហំ ៨ ៨០០ម៉ែត្រការ៉េ, អគារត្រួតពិនិត្យទំនិញមានទំហំ ១ ៣៣០ម៉ែត្រការ៉េ និងអគាររដ្ឋបាលជាដើម។
ចំពោះដែនទឹករបស់កំពង់ផែ គឺជាសម្បត្តិរបស់រដ្ឋដែលរាជរដ្ឋាភិបាល បានកំណត់ផ្តល់សិទ្ធិប្រើប្រាស់ក្នុងទំហំសរុប ៦៧៨ហិកតា រួមជាមួយការស្ថាបនាប្រឡាយនាវាចរណ៍ មានបណ្តោយ ២ ៦០០ម៉ែត្រ ទទឹងប្រវែង ១៧០ម៉ែត្រ និងជម្រៅទឹក ១០ម៉ែត្រ ដែលអាចអនុញ្ញាតឱ្យនាវាចំណុះ ១០ ០០០តោន ឬស្មើនឹង ៦៦៦TEU ចូលចតបាន។ នេះបើតាមលោក ប៉េង ពោធិ៍នា រដ្ឋមន្ត្រីក្រសួងសាធារណការ ដោយលោក បន្ថែមទៀតថា ហេដ្ឋារចនាសម្ព័ន្ធរបស់កំពង់ផែ ក៏គ្រោងនឹងពង្រីកបន្ថែមដែរ ដោយនៅដំណាក់កាលទី២ និងដំណាក់កាលទី៣ គ្រោងសាងសង់ឡើងដោយមានជម្រៅទឹករហូតដល់ ១៣ម៉ែត្រ ដែលអាចអនុញ្ញាតឱ្យនាវាចំណុះ ២០ ០០០តោន អាចចេញ-ចូលបាន។
បើតាមលោករដ្ឋមន្ត្រី កំពង់ផែនេះ ត្រូវបានរំពឹងថា នឹងក្លាយជាសរសៃឈាមដ៏សំខាន់ សម្រាប់ការដឹកជញ្ជូនតាមផ្លូវសមុទ្ររបស់កម្ពុជា និងជួយជំរុញសេដ្ឋកិច្ចបន្ថែមទៀត។ «កំពង់ផែពហុបំណងកំពតនេះ ត្រូវបានរំពឹងថា នឹងក្លាយជាសរសៃឈាមដ៏សំខាន់សម្រាប់ការដឹកជញ្ជូនតាមផ្លូវសមុទ្ររបស់កម្ពុជា ដែលនឹងចូលរួមចំណែកជំរុញសេដ្ឋកិច្ចកម្ពុជា ឱ្យមានកំណើនបន្ថែមទៀត ហើយនឹងក្លាយជាកំពង់ផែទឹកជ្រៅមួយបន្ថែមទៀតរបស់កម្ពុជា ដែលនឹងជួយបំពេញបន្ថែមឱ្យកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ»។ លោក ប៉េង ពោធិ៍នា បញ្ជាក់ដូច្នេះ មុននឹងបន្តថា ការដឹកជញ្ជូនតាមផ្លូវសមុទ្រ ពីកំពង់ផែនេះទៅកាន់ប្រទេសក្នុងតំបន់អាស៊ីប៉ាស៊ីហ្វិក ក៏អាចដំណើរការទៅបាន ដោយពុំចាំបាច់ប្តូរនាវាលើកលែងតែការដឹកជញ្ជូនទំនិញទៅកាន់សហរដ្ឋអាម៉េរិក និងអឺរ៉ុបប៉ុណ្ណោះ។
សូមបញ្ជាក់ថា គម្រោងសាងសង់មណ្ឌលភស្តុភារកម្ម និងកំពង់ផែពហុបំណង នៅខេត្តកំពត មានទុនវិនិយោគចំនួន ១ ៣០០លានដុល្លារ អភិវឌ្ឍន៍ដោយក្រុមហ៊ុន KAMPOT LOGISTICS AND PORT COMPANY LIMITED។ ក្រសួងសាធារណការ និងដឹកជញ្ជូន ផ្ដល់លិខិតអនុញ្ញាតឱ្យកំពង់ផែនេះ ធ្វើប្រតិបត្តិការអាជីវកម្ម កាលពីថ្ងៃទី២៩ ខែកញ្ញា ឆ្នាំ២០២១ ដែលមានសេវាកម្មសំខាន់ៗ ដូចជាសេវាកម្មនាវាចរ កណ្ណធារ, សេវាកម្មផ្ទេរផ្ទុក លើកដាក់ និងដឹកជញ្ជូនទំនិញ, សេវាកម្មស្ដុក និងថែរក្សាទំនិញ, សេវាកម្មនាវាទេសចរណ៍អន្តរជាតិ និងតំបន់សេដ្ឋកិច្ចពិសេស៕
© រក្សាសិទ្ធិដោយ thmeythmey.com