ជាតិ
ស្ពានមិត្តភាពកម្ពុជា-កូរ៉េ តម្លៃជិត២៥០លានដុល្លារ នឹងបើកការដ្ឋានសាងសង់នៅឆ្នាំ២០២៥ ![](https://image.thmeythmey.com/pictures/2024/06/07/c__1_.jpg)
×![]()
ភ្នំពេញ៖ ស្ពានមិត្តភាពកម្ពុជា-កូរ៉េ ដែលតភ្ជាប់រាជធានីភ្នំពេញ ទៅតំបន់អរិយក្សត្រ ក្នុងស្រុកល្វាឯម ខេត្តកណ្តាល គ្រោងបើកការដ្ឋានសាងសង់នៅក្នុងឆ្នាំ២០២៥ ខាងមុខ។ នេះបើតាមការបញ្ជាក់ របស់ លោក ផាក ជុងវុក (Park Jung-wook) ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា នៅ គ្រាដែលលោកជួបពិភាក្សាការងារ ជាមួយសម្តេច ហ៊ុន សែន ប្រធានព្រឹទ្ធសភា កាលពីថ្ងៃទី៦ មិថុនា។
«ការរៀបចំសាងសង់ស្ពាននេះ មានដំណើរការទៅរលូន ហើយនឹងចុះបឋមសិលាចាប់ផ្ដើមសាងសង់នៅឆ្នាំ២០២៥ខាងមុខនេះ»។ លោក ផាក ជុងវុក ថ្លែងដូច្នេះ តបនឹងបំណងរបស់សម្តេច ហ៊ុន សែន ប្រចាំកម្ពុជា នៅ គ្រាដែលលោកជួបពិភាក្សាការងារ ជាមួយសម្តេច ហ៊ុន សែន ប្រធាន ដែលចង់ឃើញស្ពានឆ្លងកាត់ទន្លេមេគង្គថ្មីមួយទៀតនេះ ក្នុងពេលឆាប់ៗ។
គម្រោងសាងសង់ស្ពានមិត្តភាពកម្ពុជា-កូរ៉េ (ផ្សារចាស់-ជ្រោយចង្វារ ជ្រោយចង្វារ-អរិយក្សត្រ) មានតម្លៃជិត ២៥០លានដុល្លារ ដែលគម្រោងនេះ នឹងជួយសម្រួលដល់ការដឹកជញ្ជូនទំនិញ និងការធ្វើដំណើររបស់ពលរដ្ឋ ក៏ដូចជាការតភ្ជាប់រាជធានីភ្នំពេញទៅទីក្រុង អរិយក្សត្រ និងតំបន់ជុំវិញ។
សម្តេច ហ៊ុន សែន ប្រធានព្រឹទ្ធសភា(ស្តាំ) ក្នុងជំនួបពិភាក្សាការងារជាមួយ លោក Park Jung-wook ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា(ឆ្វេង) កាលពីថ្ងៃទី៦ មិថុនា។ (រូបភាព៖ ទំព័រហ្វេសប៊ុកសម្តេច ហ៊ុន សែន)
ក្រៅពីបង្ហាញពីវឌ្ឍនភាព នៃគម្រោងសាងសង់ស្ពានមិត្តភាពកម្ពុជា-កូរ៉េ ឯកអគ្គរដ្ឋទូតផាក ជុងវុក ក៏គូសបញ្ជាក់ពីការប្តេជ្ញាចិត្តរបស់ខ្លួន ក្នុងការបន្តធ្វើការយ៉ាងជិតស្និទ្ធ ជាមួយគណៈកម្មាធិការចម្រុះ CKFTA និងក្រុមប្រឹក្សាអភិវឌ្ឍន៍កម្ពុជា ដើម្បីពិនិត្យរួមគ្នាលើគម្រោងនានាផ្សេងទៀត ដែលប្រទេសទាំង២ និងឯកភាពគ្នាកន្លងមក ឱ្យមានដំណើរការកាន់តែរលូន។
គួររំឭកដែរថា កម្ពុជា-កូរ៉េ បានឯកភាពដំឡើងកម្រិតទំនាក់ទំនងទៅជា «ភាពជាដៃគូយុទ្ធសាស្រ្ត» នៅក្នុងដំណើរទស្សនកិច្ចរបស់ សម្តេច ហ៊ុន ម៉ាណែត ទៅកាន់កូរ៉េខាងត្បូងនាអំឡុងខែឧសភា ឆ្នាំ២០២៤កន្លងទៅ។ នៅក្នុងឱកាសនេះ ភាគីទាំង២ ក៏បានចុះហត្ថលេខាលើកិច្ចព្រមព្រៀង និងអនុស្សរណៈនៃការយោគយល់គ្នាសំខាន់ៗជាច្រើន ដើម្បីលើកកម្ពស់នូវកិច្ចសហប្រតិបត្តិការ ផ្នែកសេដ្ឋកិច្ច វិនិយោគ ទេសចរណ៍ ទំនាក់ទំនងប្រជាជន និងប្រជាជននិងកិច្ចសហប្រតិបត្តិការកម្រិតតំបន់ឱ្យកាន់តែស៊ីជម្រៅថែមទៀត។
សូមបញ្ជាក់ថា ទំហំពាណិជ្ជកម្មរវាងកម្ពុជា និងកូរ៉េខាងត្បូងមានទំហំប្រមាណ៧៥១លានដុល្លារ នៅក្នុងឆ្នាំ២០២៣។ កម្ពុជានាំចេញទៅកូរ៉េខាងត្បូងមានចំនួន ២៨១លានដុល្លារ និងនាំចូលពីប្រទេសមួយនេះមានទំហំ ៤៧០លានដុល្លារ៕
សម្តេច ហ៊ុន សែន ប្រធានព្រឹទ្ធសភា(ស្តាំ) ក្នុងជំនួបពិភាក្សាការងារជាមួយ លោក Park Jung-wook ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា(ឆ្វេង) កាលពីថ្ងៃទី៦ មិថុនា។ (រូបភាព៖ ទំព័រហ្វេសប៊ុកសម្តេច ហ៊ុន សែន)
© រក្សាសិទ្ធិដោយ thmeythmey.com