ជាតិ
បទសម្ភាសន៍
វីដេអូ
ពិការដៃ តែមិនពិការចិត្ត យុវតី ឈឿន សំណាង ប្រឹងនិពន្ធសៀវភៅដោយប្រើជើង ព្រោះចង់ក្លាយជាស្មេរ ![](https://image.thmeythmey.com/pictures/2024/06/22/22620241719nct.jpg)
×![]()
ដោយ៖ តុប វណ្ណារ៉ា
ភ្នំពេញ៖ យុវតី ឈឿន សំណាង ជាសិស្សមួយរូបដែលមានពិការភាពដៃទាំងសងខាង តាំងពីកំណើត។ យុវតីរូបនេះ ជាអ្នកស្រឡាញ់អក្សរសាស្រ្តខ្មែរ និងការតែងនិពន្ធ។ បើទោះលក្ខខណ្ឌធម្មជាតិតម្រូវបែបនេះ ក៏ សំណាង មិនចុះចាញ់នឹងព្រហ្មលិខិតឡើយ។ ពិការដៃ តែមិនពិការចិត្ត កញ្ញា ឈឿន សំណាង បានយកជើងដើម្បីសរសេរសៀវភៅ និងវាយកុំព្យូទ័រ ព្រោះចង់ក្លាយជាស្មេរដ៏ពូកែមួយរូប។
ដើម្បីជ្រាបច្បាស់សូមលោកអ្នកទស្សនាបទសម្ភាសរវាងលោក តុប វណ្ណារ៉ា អ្នកសារព័ត៌មាន និងកញ្ញា ឈឿន សំណាង ដូចតទៅ៖
ក្នុងទិវាជាតិអប់រំបណ្តុះបណ្តាលបច្ចេកវិទ្យា និងវិជ្ជាជីវៈ លើកទី៧ ឆ្នាំ២០២៤ នេះ វិទ្យល័យព្រែកលៀប នារាជធានីភ្នំពេញ បាននាំយកស្នាដៃសិស្សចំនួន ៤ក្រុមមកតាំងបង្ហាញ រួមមានក្រុម ភាសាខ្មែរ រូប គីមី និងជីវវិទ្យា។ ក្នុងចំណោមសិស្សជាច្រើនមកពីសាលារៀនជំនាន់ថ្មី នៃវិទ្យាល័យព្រែកលៀប ក៏មានវត្តមានរបស់យុវតី ឈឿន សំណាងផងដែរ។
![](https://image.thmeythmey.com/pictures/2024/06/22/cdq.jpg)
ស្នាដៃក្រុមរបស់ យុវតី ឈឿន សំណាង និងមិត្តភក្តិ
សំណាង ជាសិស្សថា្នក់ទី ១១ និងជាសមាជិកក្រុមមុខវិជ្ជាភាសាខ្មែរ ស្ថិតក្នុងក្លិបតែងនិពន្ធ នៃសាលារៀនជំនាន់ថ្មី វិទ្យាល័យព្រែកលៀប។ ស្ថិតក្នុងការតាំងពិព័រណ៍នោះ យុវតី ឈឿន សំណាង និងសមាជិកក្រុម បានយកសៀវភៅជាច្រើនចំណងជើង មកដាក់បង្ហាញពីស្នាដៃក្រុមខ្លួនខិតខំកន្លងមក។
ឈឿន សំណាង ជាសិស្សមានពិការភាពដៃទាំងទ្វេ ដែលមានទីកន្លែងកំណើតនៅរាជធានីភ្នំពេញ។ ជាអ្នកចូលចិត្តអាន និងសរសេរ យុវតីវ័យ១៧ឆ្នាំរូបនេះ ចង់ប្រែក្លាយខ្លួនជាអ្នកនិពន្ធ នាពេលអនាគត។ បើទោះកាយសម្បទា មិនដូចគេ ក៏ សំណាង មិនចុះចាញ់នឹងឧបសគ្គនេះឡើយ។ សំណាង បានយកជើងជំនួសដៃ សម្រាប់សរសេរ និងធ្វើកិច្ចការនានា។
សំណាង បានរៀបរាប់ពីបទពិសោធរបស់ខ្លួនថា ទម្រាំនិពន្ធបានសៀវភៅមួយក្បាលៗ គឺពុំងាយស្រួលឡើយ ស្មេរត្រូវយល់ឱ្យច្បាស់ពីមូលដ្ឋានគ្រឹះតែងនិពន្ធ អត្ថន័យ អត្ថរូប អត្ថរស រួមបញ្ចូលជាមួយទេពកោសល្យផ្ទាល់ខ្លួន ការបញ្ចូលអារម្មណ៍ ការតាំងចិត្ត និងចំណាយពេលវេលាច្រើន។ សិស្សវិទ្យាល័យរូបនេះ រៀបរាប់ទាំងទឹកមុខស្រពោនថា៖ «សរសេរនឹងជើងគឺមានផលលំបាក គេមានដៃគេសរសេរស្រួល សរសេរបានលឿន ជាងយើងប្រើជើងសរសេរ»។
ចង់ក្លាយជាអ្នកនិពន្ធជារឿងមួយ កញ្ញា សំណាង បានយកឱកាសនេះជាវេទិកាជំរុញទឹកចិត្ត ដល់សិស្សដទៃទៀត ជាពិសេសអ្នកមានពិការភាពដូចខ្លួន ត្រូវចេះលើកទឹកចិត្ត និងមិនត្រូវបោះបង់ខ្លួនឯងឡើយ។ កញ្ញា បានបន្ថែមថា បច្ចុប្បន្នក្រុមរបស់នាង និពន្ធសៀវភៅបាន ៥ក្បាល ជាប្រភេទសៀវភៅរឿងខ្លីបែបលើកទឹកចិត្ត និងផ្តល់ឱកាសដល់ជនពិការផងដែរ៕
Tag:
ThmeyThmey តាំងពិព័រណ៍
ពិការ
© រក្សាសិទ្ធិដោយ thmeythmey.com