ស្រ្តីចំណាស់រូបនេះ បានប្រកបរបរត្បាញកន្ទេលនេះប្រមាណ២០ឆ្នាំមកហើយ គឺនៅពេលលោកយាយអាយុ៤៩ឆ្នាំ។ ដើម្បីបានកន្ទេល គេត្រូវចំណាយពេលពី៤ទៅ៥ថ្ងៃ រាប់ចាប់ពីរកវត្ថុធាតុដើម រហូតត្បាញរួច។ ចំពោះកន្ទេលមួយអាចលក់បានតម្លៃចាប់ពី

៣៥,០០០ ទៅ៤០,០០០រៀល។ 

 

បើតាមការរៀបរាប់របស់លោកយាយ ម៉ៅ មឿត ក្នុងបទសម្ភាសជាមួយសារព័ត៌មានឌីជីថលថ្មីៗ បច្ចុប្បន្ននេះនៅក្នុងភូមិមិនសូវសម្បូរដើមរំចេកទេ ហើយអ្នកភូមិផ្សេងទៀត ក៏មិនសូវប្រកបរបរនេះច្រើនដូចមុនៗដែរ។ ទោះបីបែបនេះក្ដី លោកយាយនៅតែលក់កន្ទេលតម្លៃដូចធម្មតា មិនឡើងថ្លៃឡើយ ដោយហេតុចង់ឱ្យពលរដ្ឋខ្មែរ​ជួយគាំទ្រផលិតផលក្នុងស្រុក និងផលិតដោយស្នាដៃពលរដ្ឋខ្មែរទាំងអស់គ្នា។ 

 

សូមបញ្ជាក់ថា គណៈកម្មាធិការជំរុញចលនាភូមិមួយផលិតផលមួយ សហការជាមួយរដ្ឋបាលខេត្តសៀមរាប និងស្ថាប័នពាក់ព័ន្ធ បានរៀបចំវេទិកាផ្គូផ្គងរវាងអ្នកលក់ និងអ្នកទិញ និងការតាំងបង្ហាញផលិតផលក្នុងស្រុក ក្រោមគម្រោងទទួលបានទីផ្សារសម្រាប់អ្នកផលិត ក្នុងស្រុក និងសហគ្រាសធុនមីក្រូ តូច និងមធ្យម នៅផ្សារម៉ាក្រូ រយៈពេល៣ថ្ងៃ គឺពីថ្ងៃទី២១ ដល់២៣ មិថុនា៕