ក្រោយបែកធ្លាយវីដេអូបាញ់ប្រហារលើជនរងគ្រោះ អ្នកប្រើប្រាស់បណ្តាញទំនាក់ទំនងសង្គម ,អ្នកផលិតមាតិកា,ក្រុម MMO និង​ស្ថាប័នព័ត៌មានមួយចំនួន បានចែកចាយវីដឹអូនេះយ៉ាងព្រោងព្រាត។ លោក នេត្រ ភក្ត្រា ចាត់ទុកទង្វើបែបនេះ មិនគប្បីដល់គ្រួសារសពជនរងគ្រោះឡើយ ខណៈពួកគេកំពុងកាន់ទុក្ខ។ 

 

" ខ្ញុំសូមបងប្អូនអ្នកសារព័ត៌មានបញ្ឈប់ការចែកចាយផ្សព្វផ្សាយបន្ត និងស្នើដល់បងប្អូនអ្នកប្រើប្រាស់បណ្តាញសង្គមទាំងអស់កុំចែករំលែកបន្តនូវរូបភាពដ៏សាហាវឃោរឃៅនេះ ខណៈក្រុមគ្រួសារសាច់ញាតិនៃប្អូនស្រីប្អូនប្រុសដែលបានស្លាប់ កំពុងកាន់មរណទុក្ខយ៉ាងក្រៀមក្រំចំពោះការបាត់បង់កូនក្មួយជាទីស្រឡាញ់របស់ខ្លួន"។ នេះបើតាមសំណេរលើហ្វេសប៊ុករបស់រដ្ឋមន្ត្រីព័ត៌មាន។

 

បើតាមលោក នេត្រ ភក្ត្រា ការផ្សព្វផ្សាយពីរូបភាពនេះ ជាការធ្វើឱ្យប៉ះពាល់ដល់ផ្លូវចិត្តរបស់គ្រួសារជនរងគ្រោះ និងប៉ះពាល់ដល់សេចក្តីថ្លៃថ្នូរនៃជនរងគ្រោះ។ ជាពិសេសការផ្សព្វផ្សាយឃ្លីបវីដេអូនេះ ពីសំណាក់ប្រព័ន្ធផ្សព្វផ្សាយ គឺប៉ះពាល់ដល់ក្រមសីលធម៌វិជ្ជាជីវៈសារព័ត៌មាន។ 

 

"ដូច្នេះ ខ្ញុំសូមបងប្អូនបញ្ឈប់ការផ្សព្វផ្សាយនិងការចែកចាយបន្តនូវវីដេអូឃ្លីបទាំងអស់នោះ។ សូមបងប្អូនទាំងអស់មេត្តាទទួលនូវការគោរពនិងស្រឡាញ់រាប់ពីខ្ញុំ និងសូមចូលរួមទប់ស្កាត់ការចែកចាយឃ្លីបវីដេអូទាំងនេះ"។ រដ្ឋមន្ត្រីព័ត៌មាន បន្ថែម។

 

នៅល្ងាចថ្ងៃនេះដែរ តុលាការសម្រេចចោទ លោក ស្រី ស៊ីណា ពីបទឃាតកម្ម បទប៉ុនប៉ងឃាតកម្ម និងប្រើប្រាស់អាវុធដោយគ្មានច្បាប់អនុញ្ញាត ខណៈជនសង្ស័យពីនាក់ទៀត ត្រូវបានដោះលែង ក្រោយរកពុំឃើញថាមានជាប់ពាក់ព័ន្ធនឹងការប្រព្រឹត្តបទល្មើស។