នាជំនួបចុងក្រោយបិទរដូវកាល ដែលជាជំនួបកាត់ក្តីរកជើងឯក រវាង Man City និង Arsenal នៅយប់ថ្ងៃទី១៩ ខែឧសភា ក្រុមម្ចាស់ការពារតំណែងជើងឯក ពិតជាមិនធ្វើឱ្យអ្នកគាំទ្រខ្លួនខកចិត្តឡើយជាមួយទម្រង់លេងវាយសម្រុកលើគូប្រជែង West Ham United។ 
 

Phil Foden រកបានពីរគ្រាប់ម្នាក់ឯងនៅ២នាទីដំបូង និងនាទី១៨ ជួយក្រុមលោក Pep Guardiola នាំមុខ ២-០ មុនពេល Mohammed Kudus តាមបាន១គ្រាប់នៅនាទី៤២។ Rodri សម្រេចគ្រាប់ទី៣ ឱ្យមេឃខៀងនៅនាទី៥៩ ខណៈលទ្ធផល ៣-១ រក្សារហូតចប់ការប្រកួត។
 

តាមរយៈលទ្ធផលនេះ បានជួយក្រុមលោក Guardiola បន្តគ្រងជើងឯកលីគកំពូលអង់គ្លេស៤រដូវកាលជាប់គ្នា និងជាលើកទី៦ ក្រោមការដឹកនាំរបស់ខ្លួន។
 

ចំណែក Arsenal ទទួលបានត្រឹមខកចិត្តសម្រាប់ការប្រជែងជើងឯកលីគកំពូលអង់គ្លេសលើកដំបូងក្នុងរយៈពេល២០ឆ្នាំ បើទោះពួកគេវាយបកឈ្នះ Everton ២-១ ក្តី។ Idrissa Gana Gueye រកបានគ្រាប់នាំមុខឱ្យ​ Everton មុនពេល Takehiro Tomiyasu និង Kai Havertz រកបានម្នាក់១គ្រាប់តាមពីក្រោយ។
 

Haaland ខ្សែប្រយុទ្ធអន្តរជាតិន័រវែស ដែលស៊ុតបញ្ចូលទី២៧គ្រាប់ឱ្យ Man City ក្លាយជាម្ចាស់ស្បែកជើងមាស ប្រចាំរដូវកាលនេះ និងជាលើកទី២ជាប់គ្នាក្រោយធ្វើបានកាលពីរដូវកាលមុនចំនួន៣៦គ្រាប់។ កីឡាករអង់គ្លេស Cole Palmer ស្ថិតនៅចំណាត់ថ្នាក់ទី២ ក្រោយរកបាន២២គ្រាប់ឱ្យ Chelsea ខណៈលេខ៣ Alexander Isak កីឡករអន្តរជាតិស៊ុយអែត ដែលស៊ុតឱ្យ Newcastle United ចំនួន២១គ្រាប់។
 

Watkins ខ្សែប្រយុទ្ធឆ្នើម Aston Villa ជាប់ជាកីឡាករបញ្ជូនបាល់ឱ្យមិត្តរួមក្រុមសម្រេចទីច្រើនជាងគេប្រចាំលីគកំពូលអង់គ្លេស ចំនួន១៣លើក។ មិនត្រឹមបញ្ជូនបាល់ច្រើនជាងគេ កីឡាករអន្តរជាតិអង់គ្លេសរូបនេះ​ រកស៊ុតបញ្ចូលទី ១៩គ្រាប់ផងដែរ។
 

Palmer ឈរលេខ២ ក្រោយបញ្ជូន១១លើក ស្របពេល Kevin De Bruyne ខ្សែបម្រើឆ្នើម Man City ដែលធ្លាប់ជាប់អ្នក assists ច្រើនជាងគេពីររដូវកាលជាប់គ្នា បញ្ចប់ក្នុងចំណាត់ថ្នាក់ទី៣ ក្រោយបញ្ចូនបាន១០លើករដូវកាលនេះ។
 

កីឡាករ Arsenal ៣រូប ជាប់ជាអ្នករារាំងមិនឱ្យគូប្រជែងស៊ុតបញ្ចូលទីច្រើនជាងគេ ក្នុងនោះមានខ្សែការពារបារាំង William Saliba ចំនួន១៨លើក អ្នកចាំទីអេស្ប៉ាញ David Raya ចំនួន១៦លើក និងខ្សែការពារប្រេស៊ីល Gabriel Magalhães ចំនួន១៥លើក៕