ជាតិ
ក្រសួងព័ត៌មាន ឱ្យទូរទស្សន៍អនឡាញស្លឹករឹត បញ្ឈប់ការផ្សាយព័ត៌មានប្រើពាក្យអសុរោះ
×![]()
ដោយ: សារព័ត៌មានថ្មីៗ
ក្រសួងព័ត៌មាន បានប្រាប់ទៅចាងហ្វាងគេហទំព័រ www.srtv.asia (ទូរទស្សន៍អនឡាញ ស្លឹករឹត) ឱ្យបញ្ឈប់រាល់ការផ្សព្វផ្សាយព័ត៌មាន ដោយប្រើប្រាស់ពាក្យពេចន៍មិនសមរម្យ អសុរោះ មិនគប្បី។ នេះបើតាមលិខិតចុះថ្ងៃទី១៩ ឧសភា ដែលលោក នេត្រ ភក្ត្រា រដ្ឋមន្ត្រីក្រសួងព័ត៌មាន ផ្ញើទៅ លោក សែម សារឿន ចាងហ្វាងទូរទស្សន៍អនឡាញ ស្លឹករឹត។ 
ការព្រមាននេះ ធ្វើឡើងបន្ទាប់ពីក្រុមការងារជំនាញរបស់ក្រសួងព័ត៌មាន បានរកឃើញថា ការផ្សាយរបស់ទូរទស្សន៍អនឡាញនេះ មានការអត្ថាធិប្បាយ និងការអនុវត្តតួនាទីលើសពីអ្នកសារព័ត៌មាន ដែលបំពានក្រមសីលធម៌វិជ្ជាជីវៈ នាំឱ្យសាធារណជនមានការយល់ច្រឡំ។
«ក្រសួង សូមព្រមានឱ្យអង្គភាពសារព័ត៌មានខាងលើនេះ គោរពឱ្យបានខ្ជាប់ខ្ជួន នូវក្រមសីលធម៌ វិជ្ជាជីវៈ និងបញ្ឈប់នូវរាល់ការផ្សព្វផ្សាយព័ត៌មាន ដោយប្រើប្រាស់ពាក្យពេចន៍មិនសមរម្យ អសុរោះមិនគួរគប្បី បំពានលើក្រមសីលធម៌ វិជ្ជាជីវៈសារព័ត៌មាន»។ រដ្ឋមន្ត្រីក្រសួងព្រមានដូច្នេះ មុននឹងបញ្ជាក់ពីការចាត់វិធានការតាមផ្លូវច្បាប់ ស្ថាប័ននេះ នៅតែមិនញញើត ហើយបន្តបំពានលើក្រមសីលធម៌ វិជ្ជាជីវៈសារព័ត៌មាននោះ៕
© រក្សាសិទ្ធិដោយ thmeythmey.com
