យោងទៅលើការផ្សាយរបស់អគ្គនាយកដ្ឋានកីឡា កាលពីថ្ងៃទី២៥ ខែមិថុនា ឆ្នាំ២០២៤ លោក ហង់ ជួន ណារ៉ុន បានចូលរួមពិធីប្រគល់ប្រាក់រង្វាន់គ្រូបង្វឹក គ្រូជំនួយ កីឡាករ កីឡាការិនីជ័យលាភីពីការប្រកួតកីឡាអាស៊ី លើកទី១៩ និងព្រឹត្តិការណ៍អន្ដរជាតិនានា នៅមជ្ឈមណ្ឌលជាតិហ្វឹកហ្វឺនកីឡា ក្រសួងអប់រំ យុវជន និងកីឡា ។
 

ក្នុងពិធីនេះដែរ លោករដ្ឋមន្ត្រីអប់រំ បានជំរុញឲ្យសហព័ន្ធកីឡាជាតិទាំងអស់ បន្ដការរៀបចំការប្រកួតក្នុងស្រុក និងយកចិត្តទុកដាក់ក្នុងការរើសសមត្ថភាពជម្រើសជាតិ ជាពិសេសការបណ្ដុះធនធានកីឡាករ-កីឡាការិនីថ្នាល ដើម្បីជោគជ័យក្នុងការប្រកួតប្រជែងជ័យលាភីអន្ដរជាតិ នាពេលអនាគត។
 

បន្ថែមពីនេះ រដ្ឋមន្ដ្រីរូបនេះ លើកទឹកចិត្តឲ្យកីឡាករ-កីឡាការិនី គ្រូបង្វឹក ប្រកាន់នូវគោលការខ្ជាប់ខ្ជួន ការគោរពវិន័យ ការហ្វឹកហាត់ទៀងទាត់ ការដកស្រង់បទពិសោធន៍ ដើម្បីបង្កើនសមត្ថភាពរបស់អត្តពលិកជាតិ។
 

គួរបញ្ជាក់ផងដែរថា កីឡាការិនីការ៉ាតេ ពុទ្ធា ស្រីណុច មេដាយសំរិទ្ធ១ កីឡាអាស៊ីលើកទី១៩ ទទួលបានថវិកា២៤លានរៀល, ប្រាក់រង្វាន់ប្រគល់ជូនក្រុមកីឡាប៉េតង់ ដែលឈ្នះមេដាយសំរិទ្ធ ៣ពី World Championship 2023 នៅទីក្រុងបេនីន និងក្រុមអត្ដពលិកគុនល្បុក្កតោ ឈ្នះមេដាយមាស៤ ប្រាក់៥ និងសំរិទ្ធ២។ ទឹកប្រាក់រង្វាន់សរុបលើកីឡា ៣ប្រភេទនេះ មានចំនួន៤២៣,៧០០,០០០រៀល៕