ស្នងការដ្ឋាននគរបាលខេត្តព្រះសីហនុ បានចេញផ្សាយលើទំព័ហ្វេសប៊ុកថា ការចុះបង្ក្រាបនេះ សមត្ថកិច្ចរកឃើញសារធាតុញៀន៥៨គីឡូ ក្នុងនោះមានសារធាតុញៀនប្រភេទមេតំហ្វតាមីន (ICE), សារធាតុញៀនប្រភេទមេតំហ្វេតាមីន (WY), សារធាតុញៀនប្រភេទកេតាមីន (K) និងសារធាតុញៀនប្រភេទអ៉ិចស្ដាស៊ី (MDMA)។ 

 

ជាមួយគ្នានេះ សមត្ថកិច្ចរកឃើញជញ្ជីងថ្លឹងគ្រឿងញៀនចំនួន៤គ្រឿង, ផ្លាកលេខរថយន្ដចំនួន៤ផ្លាក, ឧបករណ៍ផលិត កែច្នៃ និងថង់វេចខ្ចប់គ្រឿងញៀនមួយចំនួនធំ។ ក្នុងប្រតិបត្តិការ​នេះ សមត្ថកិច្ចក៏ដកហូត អាវុធបានចំនួន៨ដើម។ អាវុធទាំងនេះ មានអាវុធវែង៣ដើម មានម៉ាកAKM, EKOL 9MM P.A និងម៉ាកLITTLE BADGER-ITALY។ ចំណែកអាវុធខ្លីមាន៥​ដើម មានម៉ាកGLOCK 17 GEN4-AUSTRIA, SIGSAUER, ZORAKI M906-T, ZORAKI 4918-TD និងBERETTA-MCO 950 B-CAL635។ 

 

ទន្ទឹមនឹងនេះ សមត្ថកិច្ចបានរកឃើញគ្រាប់អាវុធប្រភេទអឹមសី ចំនួន១១៣គ្រាប់, គ្រាប់ប្រភេទ AK ចំនួន១០២ គ្រាប់, គ្រាប់អាវុធប្រភេទ៣៨០ ចំនួន២១៩គ្រាប់, គ្រាប់អាវុធប្រភេទ​៩mm ចំនួន១៥០គ្រាប់ និងគ្រាប់អាវុធប្រភេទបេអាតា ចំនួន៧៥គ្រាប់។ ក្រៅពីនេះ មានបំពង់ទប់សំឡេងអាវុធ៣ និងគ្រាប់បែកក្រឡាទាប១ផងដែរ។ 

 

ក្រោមពេលចុះបង្ក្រាប សមត្ថកិច្ចបានឃាត់ខ្លួនជនសង្ស័យ១នាក់ ហើយសមត្ថកិច្ចជំនាញកំពុងរៀបចំសំណុំរឿង ដើម្បីបញ្ជូនជនសង្ស័យទៅសាលាដំបូងខេត្តព្រះសីហនុ៕