អេស្ប៉ាញ ជាក្រុមកំពូលតារាង ដែលបានកក់កៅទៅកាន់វគ្គ ១៦ក្រុម រួចរាល់ ក្រោយឆ្លងកាត់ ២ប្រកួត យកឈ្នះបានទាំង ២ប្រកួត។ ជំនួបចុងក្រោយ អេស្ប៉ាញ ត្រូវជួបអាល់បានី ដែលស្ថិតនៅលេខ៣ ជាក្រុមត្រូវការឈ្នះចាំបាច់ ដើម្បីដណ្តើមចំណាត់ថ្នាក់លេខ២ ឬលេខ៣ល្អ។ ដោយឡែកក្រូអាស៊ី បច្ចុប្បន្នឈរនៅចំណាត់ថ្នាក់បាតតារាងមាន១ពិន្ទុស្មើអាល់បានី រំពៃចង់ឈ្នះការប្រកួតខ្លាំងបំផុត ព្រោះតែជាផ្លូវតែមួយសម្រាប់ក្រុមនឹងមានឱកាសទៅកាន់វគ្គ ១៦ក្រុម ហើយជំនួបសំខាន់ចុងក្រោយគឺប្រជែងអ៊ីតាលី ដែលនៅចំណាត់ថ្នាក់លេខ​២ ក្នុងពូលមាន៣ពិន្ទុ។ អ៊ីតាលីត្រូវការត្រឹមស្មើប៉ុណ្ពោះដើម្បីឈានទៅវគ្គបន្ត។
 

អាល់បានី ក្នុងការប្រកួត Euro 2024 មានកំណត់ត្រាជាក្រុមស៊ុតបញ្ចូលទីលឿនជាងគេបង្អស់ក្នុងប្រវត្តិសាស្ត្រ Euro 2024 ហើយពួកគេក៏បានធ្វើឱ្យក្រូអាស៊ី ខកចិត្តផងដែរ នៅការប្រកួតកន្លងមក ដែលទាញឱ្យក្រុមក្រូអាស៊ី ឈានមកជួបរឿងកាន់តែពិបាក ដើម្បីកាត់សេចក្តីគ្នានៅការប្រកួតចុងក្រោយ។ 
 

អេស្ប៉ាញឈ្នះក្រូអាស៊ី ៣-០ និងអ៊ីតាលី ១-០ កំពុងធ្វើឱ្យក្រុមដទៃមានភាពភ័យខ្លាច ខណៈពួកគេរំពឹងធ្វើបានកំណត់ត្រាជាលើកទី៣ ក្នុងនាមជាក្រុមដែលឈ្នះវគ្គចែកពូល ៣ប្រកួតជាប់គ្នា ជាលើកទី៣ ក្នុងប្រវត្តិសាស្ត្រ ចាប់តាំងពីធ្វើបានកាលឆ្នាំ ២០០៨ ដែលកាលនោះពួកគេឈ្នះពាន។ 
  

ជួបគ្នា ៨លើក កន្លងមក អាល់បានី គ្មានប្រវត្តិយកឈ្នះអេស្ប៉ាញម្តងឡើយ រួមទាំងលទ្ធផលស្មើ។ ជំនួបស្ថិតក្នុងកីឡដ្ឋាន Merkur Spiel Arena រាត្រីនឹង អេស្ប៉ាញ ត្រូវបានគេរំពឹងថានឹងយកឈ្នះការប្រកួតបន្តទៀត ខណៈអាល់បានី មានសង្ឃឹមតិចតួចបំផុតក្នុងការដណ្តើម ៣ពិន្ទុពីអេស្ប៉ាញ។ 
 

អ៊ីតាលី នឹងមានភារកិច្ចលេងការប្រកួតចុងក្រោយនៅក្នុងវគ្គចែកពូលពានរង្វាន់ Euro 2024 ពូល B ក្រោយពីប្រកួត ២លើក កន្លងមកពួកគេរកបាន ៣ពិន្ទុ ពីការឈ្នះ១ និងចាញ់១។ អ៊ីតាលី នឹងត្រូវទប់ទល់ក្រូអាស៊ី ដែលត្រូវការឈ្នះដាច់ខាតបំផុតពីពួកគេ ដើម្បីបន្តក្តីសង្ឃឹមឡើងវគ្គ ១៦ក្រុម។ អ៊ីតាលី ក៏ចង់រក្សាកៅអីខ្លួននៅក្នុងពូល B ក្នុងនាមជាក្រុមលេខ២ ឡើងទៅវគ្គបន្ទាប់ដូចគ្នា។
 

កីឡដ្ឋាន Red Bull Arena នឹងក្លាយជាទីកន្លែងកាត់សេចក្តីរវាងក្រុមទាំងពីរ ហើយថានរណានឹងមានឱកាសទៅវគ្គបន្ត ឬក៏ត្រូវធ្លាក់នៅត្រឹមវគ្គចែកពូលលើកនេះ។ អ៊ីតាលី មានភាគរយខ្ពស់ជាងព្រោះមាន ៣ពិន្ទុក្នុងដៃ រករង់ចាំអុតមើលជាក្រុមលេខ ៣ល្អយ៉ាងណាការប៉ះក្រុមអ៊ីតាលី ក៏នឹងមិនមែនជារឿងដែលងាយស្រួលមួយប៉ុន្មានឡើយ សម្រាប់ក្រូអាស៊ី ដ្បិតកំណត់ត្រាការប្រកួតកន្លងមក ពួកគេធ្វើបានល្អច្រើនទល់អ៊ីតាលី។ ក្រូអាស៊ីបានយកឈ្នះការប្រកួតបាន ៣លើក ពីការជួបគ្នា ៩លើក ជាមួយអ៊ីតាលី ចំណែកអ៊ីតាលី យកឈ្នះមកវិញត្រឹមតែ ១លើក ប៉ុណ្ណោះ។ អ៊ីតាលី ជាក្រុមកីឡាករមានមធ្យមអាយុក្មេងជាងគេក្នុងការប្រកួតលើកនេះ ក៏កំពុងតែបង្ហាញពីទម្រង់លេងដ៏មានប្រសិទ្ធិភាពមួយរបស់ខ្លួនដូចគ្នា ខណៈក្រូអាស៊ី មានបញ្ហាទម្រង់លេង៕