ឆ្លងកាត់ការប្រកួតទាំង៣ទឹក កីឡាករទាំង២ បានវាយទៅវាយមក ជាមួយនឹងការបញ្ចេញក្បាច់ និងស្នៀតជាច្រើន។ Luca Lombardo ដែលហាត់ MuoyThai ក៏ចេះក្បាច់ច្រើនមិនចាញ់ ឈឿង ល្វៃ កីឡករគុនខ្មែរ ដែរ។ ប៉ុន្ដែ កីឡាករគុនខ្មែរ ដែលរហស្សនាម «នាគរាជខ្មៅចតុមុខ»រូបនេះ មានកម្លាំងស្ទុះជាង Lombardo។ នៅទឹកទី៣ កីឡាករអ៊ីតាលីរូបនេះ ទន់ និងហត់ជាខ្លាំង។ ចប់ការប្រកួត ល្វៃ ឈ្នះ Lombardo ដែលជាម្ចាស់ខ្សែក្រវ៉ាត់២ស្ថាប័ន ដោយពិន្ទុះ ។
 

ក្នុងការប្រកួតនេះ ល្វៃ បានប្រើកែងផង ជង្គង់ផង ប៉ុន្ដែកីឡាកររូបនេះ យល់ថារូបគេ ធ្វើមិនទាន់បានល្អ ១០០ភាគរយឡើយ ព្រោះនៅមានក្បាច់ជាច្រើនទៀតមិនទាន់បញ្ចេញ។
 

យោងលើវីដេអូសម្ភាសជាមួយ លោក ផន់ សំណាង នាគរាជខ្មៅចតុមុខរូបនេះ បាននិយាយដូច្នេះ៖«ការប្រកួតយប់មិញនេះ គឺស្វិតស្វាញណាស់។ ដៃគូខ្ញុំ ចំណុចល្អរបស់គាត់​ គឺកណ្ដាប់ដៃ ហើយនិងការទាត់។ យប់មិញខ្ញុំ វាយចូលគាត់ច្រើន ប៉ុន្ដែអត់បែក។ ធ្វើបានប៉ុន្នេះ ខ្ញុំ គិតថាមិនទាន់ល្អ ១០០ភាគរយទេ គឺបានត្រឹម ៧០-៨០ភាគរយប៉ុណ្ណោះ ដោយសារយើងនៅស្ទើ យើងចេញបានតែមួយច្រក ២ច្រក វាអត់បានចេញទៅទាំងអស់។ អ្វី ដែលយើងគ្រោងទុក វាមិនបានចេញ។»។
 

ឈឿង ល្វៃ ក៏សោកស្ដាយចំពោះមិនរួមក្លិបគុនខ្មែរអន្ដរជាតិ (KKIF) គឺកីឡាករ សុខ ធី រហ័ស្សនាមមនុស្សឈើ ដោយបានចាញ់កីឡាករ Ali Zarinfar មកពីអ៊ីរ៉ង។ កីឡាករទាំងកម្ពុជាទាំង២នេះ នឹងត្រូវត្រឡប់មកកម្ពុជាវិញ នៅថ្ងៃទី២៧ ខែមិថុនា ឆ្នាំ២០២៤ វេលាម៉ោង ១០ព្រឹក៕