អន្តរជាតិ
ប្រជាជននេប៉ាល់ត្រូវរងគ្រោះដោយជំងឹឆ្លងធ្ងន់ធ្ងរក្រោយរញ្ជួយដី ![](https://image.thmeythmey.com/pictures/2015/05/02/portal_child_on_a__3281579b.jpg)
×![]()
បន្ទាប់ពីរួចផុតពីគ្រោះថ្នាក់ក្រោយគ្រោះមហន្តរាយរញ្ជួយដី កាលពីចុងសប្តាហ៍មុន ប្រជាជននេប៉ាល់ស្រាប់តែត្រូវប្រឈមមុខជាមួយជំងឺឆ្លងរាតត្បាតថែមទៀត។ បើតាមអាជ្ញាធរអ្នកនៅរស់រានមានជីវិតជាច្រើននាក់កំពុងស្ថិតក្នុងគ្រោះថ្នាក់ហើយអាចធ្លាក់ខ្លួនកើតជំងឺអាសន្នរោគដោយសារតែកង្វះខាតទឹកស្អាត ចំណីអាហារ អនាម័យ និង បង្គន់ប្រើប្រាស់ថែមទៀត។ ខាងស្ថាប័នសុខភាពបានអំពាវនាវអោយមានការយកចិត្តទុកដាក់ជាបន្ទាន់ចំពោះបញ្ហានេះ។
ប្រជាជននេប៉ាល់ដែលនៅរស់រានមានជីវិតក្រោយគ្រោះមហន្តរាយរញ្ជួយដី កំពុងស្ថិតក្រោមគំរាមកំហែងដោយសារបញ្ហាជំងឹឆ្លងធ្ងន់ធ្ងរ។ ជំងឹឆ្លងបានចាប់ផ្តើបន្តរាតត្បាត និងរុកគួនប្រជាជននេប៉ាលក្មេងចាស់ប្រុសស្រី ហើយប្រជាជននេប៉ាល់ខ្លះចុះរាគ ចុកពោះ ស្បែកប្រែជាស្លេកស្លាំងខ្លាំង។ អាជ្ញាធរភ័យខ្លាចថា ជំងឺឆ្លងនឹងបង្កគ្រោះមហន្តរាយធ្ងន់ធ្ងរដល់ជីវិតប្រជាជន ហើយបង្កជាជំងឺអាសន្នរោគផងដែរ។
នៅភូមិ Dukuchap ដែលជាភូមិមួយដែលដាច់ស្រយាលពីគេនោះ មានប្រជាជនជាច្រើននាក់ស្ថិតក្នុងស្ថានភាពគ្រោះថ្នាក់ដោយសារជំងឺឆ្លងនេះ។ ខ្លះបន្តរាគរូស ខ្លះបន្តចុកពោះស្រែកទ្រហ៊រយំ ខណៈខ្លះទៀតស្លេកស្លាំងអស់កម្លាំងកំហែងផងដែរ។ អាជ្ញាធរមូលដ្ឋានដែលកំពុងស្វះស្វែងជួយអ្នករងគ្រោះ ដោយផ្តល់ថ្នាំសង្កូវនោះបានបញ្ជាក់ថា ជំងឺឆ្លងដែលបង្កអោយមនុស្សរាគរូសនិងចុកពោះនេះ ដោយសារតែពួកគាត់មិនមានទឹកស្អាតសម្រាប់បរិភោគ ហើយម្យ៉ាងគ្មានបង្គន់អនាម័យសម្រាប់បន្ទោរបង់ថែមទៀត។ ប្រជាជននេប៉ាល់ ដែលទើបរងគ្រោះដោយសារគ្រោះមហន្តរាយរញ្ជួយដីកាលពីសប្តាហ៍មុន បង្ខំចិត្តបរិភោគទឹកដែលមិនស្អាតមានមេរោគ ដោយសារតែខ្វះខាតខ្លាំង ហើយបង្គន់អនាម័យក៏ត្រូវគ្រោះរញ្ជួយដីបំផ្លិចបំផ្លាញចោលអស់ទៀត។
ជុំវិញការរីករាលដាលនៃជំងឺឆ្លងនេះ មន្ត្រីជំនាញបានព្រមាន ពីគ្រោះថ្នាក់ប្រសិនគ្មានចំណាត់ការទប់ស្កាត់ទេនោះ។ ជំងឺឆ្លងនេះនឹងក្លាយជាជំងឺអាសន្នរោគដែលអាចឆក់យកអាយុជីវិតមនុស្សច្រើនសន្ធឹកសន្ធាប់ទាំងក្មេងទាំងចាស់ថែមទៀត។
ឧត្តមសេនីយ៍ម្នាក់ដែលដឹកនាំក្រុមសង្គ្រោះនិងពេទ្យស្ម័គ្រចិត្ត Kishore Rana បានអោយដឹងថា លោកកំពុងប្រឹងប្រែងបញ្ជូនពេទ្យស្ម័គ្រចិត្តរួមទាំងថ្នាំសង្កូវទៅកាន់តំបន់ដែលរងគ្រោះថ្នាក់ខ្លាំង ហើយបញ្ហាដែលលោកបារម្ភគឺជំងឺឆ្លងវារាតត្បាតខ្លាំង។ លោកបានសង្កត់ធ្ងន់ថាការលំបាកពេលបច្ចុប្បន្នគឺមន្ទីពេទ្យនៅតាមតំបន់ គ្រឿងបរិក្ខាសម្រាប់ជំនួយនានា រងការបំផ្លិចបំផ្លាញស្ទើរអស់ផង។
ចំណែស្ថាប័នសុខភាពពិភពលោក បានសម្តែងក្តីបារម្ភចំពោះការកើនឡើងនៃជំងឺឆ្លងផងដែរ ប៉ុន្តែស្ថាប័ននេះបញ្ជាក់ថា ទោះមន្ទីពេទ្យនៅតំបន់ដែលរងការវាយប្រហារខ្លាំងដោយជំងឺត្រូវខូចខាតខ្លាំងក៏ដោយ គ្រែពេទ្រ បុគ្គលិកពេទ្យ មានគ្រប់គ្រាន់ហើយ ប៉ុន្តែអ្វីដែលសំខាន់គឺថ្នាំសង្កូវសម្រាប់ជូនប្រជាពលរដ្ឋដែលរងគ្រោះ។ អង្គការអន្តរជាតិនេះបានលើកឡើងផងដែរពីលទ្ធភាពនៃការបន្តឆ្លងរីករាលដាលនៃជំងឺ ប៉ុន្តែបច្ចុប្បន្នអ្នកជំនាញពាក់ព័ន្ធកំពុងផ្តោតលើវិធានការទប់ស្កាត់មិនអោយជំងឺអាសន្នរោគកើតឡើងក្នុងចំណោមប្រជាជននេប៉ាល់ ២.៨លាននាក់ដែលបាត់បង់លំនៅ និងត្រូវរស់នៅពឹងផ្អែកជំរកនិងជំនួយមនុស្សធម៌៕
© រក្សាសិទ្ធិដោយ thmeythmey.com