សន្តិសុខ និងអ្នកចាក់ប្រេង នឹកស្ដាយបុណ្យ តែមិនអាចចោលការងារ

បទយកការណ៍ / បទសម្ភាសន៍

សន្តិសុខ និងអ្នកចាក់ប្រេង នឹកស្ដាយបុណ្យ តែមិនអាចចោលការងារ

29, Sep 2016 , 9:39 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ បុគ្គលិកចាក់ប្រេងឥន្ធនៈ និងសន្តិសុខនៅតាមបណ្តារោងចក្រ សាលារៀន ទីតាំងកម្សាន្ត និងកន្លែងផ្សេងៗទៀត មិនមានពេលឈប់សម្រាកច្រើនថ្ងៃ ក្នុងឱកាសបុណ្យភ្ជុំបិណ្ឌ ឡើយ។ ពួកគេខ្លះមិនបានឈប់សម្រាកសោះ ក្នុងថ្ងៃភ្ជុំធំ និងអ្នកខ្លះបានឈប់មួយថ្ងៃ ឬពីរថ្ងៃ ព្រោះត្រូវផ្លាស់ប្តូរវេនគ្នាឈប់ ដើម្បីឲ្យអ្នកផ្សេងបានទៅជួបជុំគ្រួសារក្នុងពិធីបុណ្យភ្ជុំបិណ្ឌនេះដែរ។ ពួកគេ អះអាងថា សោកស្តាយដែលមិនបានទៅវត្តជុំគ្រួសារនៅថ្ងៃភ្ជុំធំ ប៉ុន្តែមិនអាចទុកចោលការងារបាន។

លោក យ៉ាន់ ចាន់កវី ជាបុគ្គលិកចាក់ប្រេង នៅស្ថានីយប្រេងមួយកន្លែងម្តុំទូរទស្សន៍អាស៊ីអាគ្នេយ៍ បានឈប់សម្រាកតែ២ថ្ងៃប៉ុណ្ណោះក្នុងឱកាសបុណ្យភ្ជុំបិណ្ឌនេះ គឺនៅថ្ងៃភ្ជុំធំ និងក្រោយភ្ជុំមួយថ្ងៃ។ ការឈប់សម្រាកបុណ្យភ្ជុំនេះ កវី ត្រូវផ្លាស់ប្តូរវេនឈប់ជាមួយមិត្តរួមការងារផ្សេងទៀត ដើម្បីបានទៅជួបជុំក្រុមគ្រួសារ។ កវី បញ្ជាក់ថា គេសោកស្តាយណាស់ដែលមិនបានទៅវត្តជួបជុំគ្រួសារនៅក្នុងថ្ងៃភ្ជុំធំ ពីព្រោះព្រឹកថ្ងៃនោះ រូបគេទើបដល់វេនឈប់ ហើយកំពុងធ្វើដំណើរទៅស្រុកកំណើតក្នុងខេត្តកំពត។ យុវជន យ៉ាន់ ចាន់កវី បានបញ្ជាក់យ៉ាងដូច្នេះ ៖«ថ្ងៃភ្ជុំខ្ញុំបានជូនសម្ភារ និងថវិកា ឲ្យម៉ែពុកខ្ញុំ ប៉ុន្តែខ្ញុំមានអារម្មណ៍សោកស្ដាយ ព្រោះមិនបានទៅវត្តជុំគ្រួសារនៅថ្ងៃភ្ជុំបិណ្ឌធំ»។

រយៈជិត១ឆ្នាំហើយ ដែល កវី បម្រើការងារជាអ្នកចាក់ប្រេងនេះ។ រូបគេ រអ៊ូរទាំថា ឲ្យតែបុណ្យទានធំៗ ម្តៗ រូបគេមានពេលខ្លីណាស់ទៅលេងឪពុកម្តាយ និងបងប្អូននៅស្រុក។ ប៉ុន្តែយ៉ាងណាក៏ដោយ ក៏យុវជនរូបនេះ ក៏សប្បាយចិត្តដែរ ព្រោះរូបគេមានវត្តមាននៅស្រុកកំណើត នៅក្នុងឱកាសបុណ្យភ្ជុំបិណ្ឌ ដូចកូនៗអ្នកនៅក្នុងភូមិ ស្រុក ផ្សេងទៀត ដែលគេមកធ្វើការរកប្រាក់នៅ ភ្នំពេញ។ «បានទៅ ប្រសើរជាងអត់»។ នេះជាការបញ្ជាក់របស់ លោក យ៉ាន់ ចាន់កវី ដែលបន្ថែមថា យ៉ាងហោចឪពុកម្តាយយើងបានឃើញមុខកូននៅពេលបុណ្យទានធំៗ ទោះពេលឈប់តិចថ្ងៃក៏ដោយ ក៏ត្រូវឆ្លៀតទៅជួបគ្រួសារដែរ។

ចំណែកឯ បុគ្គលិកចាក់ប្រេងម្នាក់ទៀត នៅម្តុំផ្សារដីហុយ គឺ លោក ប៊ុនថេត ជាក៏សោកស្តាយដែរ ដែលមិនបានទៅលេងស្រុកឲ្យចំថ្ងៃបុណ្យភ្ជុំធំ។ បើតាម ប៊ុន ថេត រូបគេបានឈប់តែមួយថ្ងៃប៉ុណ្ណោះ ក្នុងឱកាសបុណ្យភ្ជុំនេះ ហើយ ប៊ុតថេត សុខចិត្តធ្វើការនៅថ្ងៃបុណ្យ ដើម្បីទទួលបានប្រាក់បន្ថែមចំនួន ២០ ដុល្លារ ពីក្រុមហ៊ុន។ តែយ៉ាងណាក៏ដោយបុរសមានស្រុកកំណើតនៅក្នុងខេត្តព្រៃវែងរូបនេះ បានទៅស្រុកម្តងហើយ នៅមុនបុណ្យភ្ជុំ។ យ៉ាងណាក៏ដោយ បុគ្គលិកចាក់ប្រេងរូបនេះ ក៏បានបង្ហាញអារម្មណ៍នឹករលឹកស្រុកកំណើតដែរ ខណៈពេលបុណ្យទាន ភាគច្រើនក្រុមគ្រួសារអ្នកផ្សេងជួបជុំគ្នានោះ។ ប៊ុតថេត អះអាងយ៉ាងដូច្នេះថា៖ «អារម្មណ៍នឹកផ្ទះ នឹកស្រុក នឹកស្រែ នឹកម្ដាយឪពុក នឹកបងប្អូន ចេះតែនឹកហើយ សំខាន់គឺគ្មានពេល ព្រោះការងាររវល់ មិនអាចបោះបង់ការងារចោលបាន»។

រីឯលោក ការ៉េ ពៅ ជាសន្តិសុខនៅមជ្ឈមណ្ឌលកម្សាន្តមួយ នៅម្តុំបឹងត្របែក រាជធានីភ្នំពេញ វិញ មិនបានឈប់សម្រាកឡើយ នៅក្នុងថ្ងៃភ្ជុំ។ បើតាម លោក ពៅ លោកត្រូវនៅយាមកន្លែងធ្វើការ នៅថ្ងៃដែលអ្នកផ្សេងរីករាយជាមួយក្រុមគ្រួសារ នៅឯស្រុកកំណើតនេះ។ បុរសមានស្រុកកំណើតនៅខេត្តកំពង់ចាមរូបនេះ បានរៀបរាប់ទាំងទឹកមុខស្រងូតស្រងាត់ថា៖ «ឆ្នាំនេះ ខ្ញុំមិនបានទៅលេងស្រុក និងផ្ញើលុយឲ្យអ្នកផ្ទះទេ ព្រោះកន្លែងធ្វើការមិនទាន់បើកប្រាក់ខែ ណាមួយគេឲ្យខ្ចីលុយត្រឹមតែ៣០ ដុណ្លរប៉ុណ្ណោះ»។ មានវ័យ២៩ ឆ្នាំ លោក ការ៉េ ពៅ បានឲ្យដឹងទៀតថា នៅថ្ងៃភ្ជុំបិណ្ឌ លោកទទួលបានប្រាក់បន្ថែមគុណនឹងពីរ ពោលគឺលោក ទទួលបានកម្រៃជិត១០ដុល្លារដែរ ក្នុងមួយថ្ងៃ។ លោក ពៅ និយាយថាលោក នៅធ្វើការយកប្រាក់បន្ថែមនៅថ្ងៃភ្ជុំបិណ្ឌ ហើយលោកនឹងឆ្លៀតទៅលេងស្រុក នៅពេលបុណ្យភ្ជុំបិណ្ឌបញ្ចប់វិញ។

ដោយសារឱកាសបុណ្យទានម្តងពួកគាត់ មិនសូវមានពេលវេលាច្រើន ឈប់សម្រាក ដូច្នេះ ពួកគេ ចង់មានពេលឈប់សម្រាកច្រើន ដើម្បីបានទៅលេងស្រុកកំណើត ជួបជុំបងប្អូន ដូចអ្នកធ្វើការផ្សេងៗទៀតដែរ៕