អន្តរជាតិ
អាមេរិក នឹងពង្រាយខែលការពារមីស៊ីលនៅកូរ៉េខាងត្បូង «ឆាប់ៗនេះ» ![រដ្ឋមន្ត្រីការពារជាតិ និងរដ្ឋមន្ត្រីការបរទេស អាមេរិក ជួបជាមួយសមភាគីកូរ៉េខាងត្បូង (រូបភាព AFP)](https://image.thmeythmey.com/pictures/2016/10/20/ccdd.jpg)
រដ្ឋមន្ត្រីការពារជាតិ និងរដ្ឋមន្ត្រីការបរទេស អាមេរិក ជួបជាមួយសមភាគីកូរ៉េខាងត្បូង (រូបភាព AFP)
×![]()
ប្រមុខការទូតអាមេរិក បានប្រកាសនៅថ្ងៃទី១៩ ខែតុលា ថា ប្រព័ន្ធការពារមីស៊ីលអាកាស (THAAD) នឹងត្រូវពង្រាយនៅលើទឹកដីកូរ៉េខាងត្បូង នៅពេលខ្លីខាងមុខ បើទោះជាមានការប្រឆាំងពីសំណាក់ចិន និងរុស្សីក៏ដោយ។ ចាប់តាំងពីអាមេរិក និងកូរ៉េខាងយល់ព្រមលើផែនការពង្រាយប្រព័ន្ធការពារនេះ ចិនក៏បានទាមទារឲ្យអាមេរិកលុបចោលការគម្រោងពង្រាយប្រព័ន្ធការពារនេះ ដោយអះអាងថា ប៉ះពាល់ដល់សន្តិសុខរបស់ខ្លួន និងតំបន់ដែរ។
រដ្ឋមន្ត្រីការបរទេសអាមេរិក លោក ចន ឃែរី (John Kerry) បានបញ្ជាក់ក្នុងជំនួបជាមួយរដ្ឋមន្ត្រីកូរ៉េខាងត្បូង ថា ប្រព័ន្ធការពារអាកាសដែលប្រទេសទាំងពីរឯកភាពគ្នានាពេលកន្លងមក នឹងត្រូវបញ្ជូនទៅកាន់កូរ៉េខាងត្បូងនាពេលឆាប់ៗខាងមុខ។ ចំណែកទីតាំងនៃការពង្រាយប្រព័ន្ធការពារមីស៊ីលអាកាស ក៏ត្រូវបានក្រុងសេអ៊ូលកំណត់រួចហើយដែរ ដោយរង់ចាំដែលប្រព័ន្ធនេះទៅដល់ប៉ុណ្ណោះ។
គោលដៅនៃការពង្រាយប្រព័ន្ធការពារនេះ ត្រូវបានអាមេរិក និងកូរ៉េខាងត្បូង អះអាងថា ដើម្បីការពារការវាយប្រហារណាមួយពីសំណាក់កូរ៉េខាងជើង ដែលជានិច្ចកាលតែងតែគំរាមប្រើមីស៊ីលវាយប្រហារកូរ៉េខាងត្បូងនោះ។ ប៉ុន្តែចិនដែលជាសម្ព័ន្ធមិត្តកូរ៉េខាងជើង បានប្រឆាំងដាច់ខាតនឹងការពង្រាយនេះ និងបានព្រមានថា ជាគំរាមមកលើសន្តិសុខរបស់ខ្លួន ក៏ដូចជាតុល្យភាពអំណាចនៅអាស៊ីផងដែរ។
យ៉ាងណាក្ដី លោក ចន ឃែរី បញ្ជាក់ថា អាមេរិកនឹងធ្វើអ្វីគ្រប់យ៉ាង ដើម្បីការពារខ្លួន និងសម្ព័ន្ធមិត្តរបស់ខ្លួន ហើយអាមេរិកនឹងបញ្ជូនថ្មថាមពលនៃប្រព័ន្ធការពារអាកាសទៅកាន់កូរ៉េខាងត្បូងឲ្យកាន់តែឆាប់តាមតែអាចធ្វើបាន។ រដ្ឋមន្ត្រីការបរទេសអាមេរិកបញ្ជាក់ដូចនេះ ខណៈលោក និងរដ្ឋមន្ត្រីមន្ត្រីការពារជាតិAsh Carter បានជួបប្រជុំជាមួយរដ្ឋមន្ត្រីការបរទេសកូរ៉េខាងត្បូង Yun Byun-se និងរដ្ឋមន្ត្រីការពារជាតិ Han Min-koo។
ការកើនឡើងសមត្ថភាពនៃមីស៊ីលរបស់ក្រុងព្យុងយ៉ាង ធ្វើឲ្យក្រុងសេអ៊ូល និងក្រុងវ៉ាស៊ិនតោន បារម្ភយ៉ាងខ្លាំង។ សម្ព័ន្ធមិត្តទាំងពីរក៏កាន់តែបារម្ភ ក្រោយកូរ៉េខាងជើងសាកល្បងនុយក្លេអ៊ែរ និងបាញ់មីស៊ីលជាបន្តបន្ទាប់ ដែលបានបង្ហាញពីការរីកចម្រើនរហ័សនៃសព្វាវុធរបស់ខ្លួន។ កូរ៉េខាងជើង បានសាកល្បងនុយក្លេអ៊ែរចុងក្រោយ កាលពីថ្ងៃទី៩ ខែកញ្ញា ហើយក៏ជាការសាកល្បងលើកទី៥ដែរ។
ក្រុមប្រឹក្សាសន្តិសុខអង្គការសហប្រជាជាតិ បានដាក់ទណ្ឌកម្មជាច្រើនលើក ដ្បិតរដ្ឋក្រីក្រមួយនេះ បានល្មើសនឹងបម្រាមក្រុមប្រឹក្សាសន្តិសុខជាច្រើនដងមកហើយដែរ។ រីឯសហរដ្ឋអាមេរិក ក៏គំរាមដាក់ទណ្ឌកម្មជាឯកតោភាគីដើម្បីបង្ខំកូរ៉េខាងជើង ឲ្យដើរតាមការណែនាំរបស់អន្តរជាតិ។ ប៉ុន្តែកូរ៉េខាងជើង មិនបានខ្វល់ខ្វាយនឹងការដាក់ទណ្ឌកម្មខ្លាំងៗទាំងនោះឡើយ ហើយជាញឹកញយបានគំរាមកម្ទេចក្រុងសេអ៊ូល និងវាយប្រហារអាមេរិកវិញដែរ៕
Tag:
អាមេរិក
កូរ៉េខាងត្បូង
THAAD
ចិន
© រក្សាសិទ្ធិដោយ thmeythmey.com