អន្តរជាតិ
ឧបនាយករដ្ឋមន្ត្រីថៃ៖ ចរាចរណ៍កកស្ទះខ្លាំង ដោយសារប្រជាជនមានលុយច្រើនជាងមុន ![](https://image.thmeythmey.com/pictures/2017/02/24/bangkok-traffic-jam.jpg)
×![]()
របាយការណ៍ចរាចរណ៍ថ្មីមួយ បានបង្ហាញថា រាជធានីបាងកក ជាទីក្រុងមួយក្នុងចំណោមទីក្រុងធំៗលើពិភពលោក ដែលមានចរាចរណ៍កកស្ទះខ្លាំង។ ចំពោះមូលហេតុនៃការកកស្ទះដ៏ខ្លាំងនេះ ឧបនាយករដ្ឋមន្ត្រីថៃ Prawit Wongsuwon លើកឡើងថា ប្រជាជនថៃមានជីវភាពកាន់តែធូរធារ ទើបធ្វើឲ្យពួកគេមានលទ្ធភាពទិញឡានកាន់តែច្រើន ខណៈដែលផ្លូវសម្រាប់ធ្វើដំណើរកាន់តែតិចជាងមុន។
ទីក្រុងបាងកក ស្ថិតនៅចំណាត់ថ្នាក់ទី១២ នៃទីក្រុងដែលមានចរាចរណ៍កកស្ទះខ្លាំងជាងគេរបស់ពិភពលោក ហើយប្រជាជនថៃ ចំណាយពេលជាច្រើនម៉ោងលើការធ្វើដំណើរតាមរថយន្ត។ រដ្ឋាភិបាលយោធាថៃ បានបន្ទោស«ភាពមានបាន»របស់ប្រជាជន និងកង្វះផ្លូវថ្នល់ ជាមូលហេតុធ្វើឲ្យទីក្រុងនេះមានស្ថានភាពធ្វើដំណើរកាន់តែមមាញឹកខ្លាំង។
ឧបនាយករដ្ឋមន្ត្រីថៃ Prawit Wongsuwon បាននិយាយថា ប្រជាជនថៃកាន់តែច្រើន មានលទ្ធភាពរកប្រាក់ចំណូលបានច្រើនជាងមុន។ លោក បន្តទៀតថា ដោយសារជីវភាពកាន់តែធូរធារដូចនេះ ទើបពួកគេមានប្រាក់ទិញរថយន្តកាន់តែច្រើនសម្រាប់ធ្វើដំណើរ។
បើតាមកាសែតបាងកកប៉ុស្តិ៍ លោក Prawit Wongsuwon ដែលជាប្រធានគណៈកម្មាធិការរដ្ឋាភិបាលទទួលបន្ទុកដោះស្រាយបញ្ហាចរាចរណ៍ បញ្ជាក់ដែរថា កត្តាមួយទៀតដែលធ្វើឲ្យចរាចរណ៍កកស្ទះដែរនោះ គឺផ្នែកនៃផ្លូវជាច្រើនក្នុងទីក្រុង ត្រូវបានយកធ្វើជាការដ្ឋានសាងសង់ប្រព័ន្ធដឹកជញ្ជូនថ្មី។ ផ្លូវជាច្រើនដែលមានទំហំធំ ប្រែក្លាយជាតូចចង្អៀត ដោយសារតម្រូវការសាងសង់ ដូច្នេះហើយបានជាក្រុងបាងកក ស្ទះខ្លាំងដូចនេះ។
ប្រភពព័ត៌មានដដែលបន្តថា លោកឧបនាយករដ្ឋមន្ត្រី Prawit Wongsuwon ក៏បានសន្យាបង្កើតបទបញ្ញត្តិចរាចរណ៍ថ្មី ដើម្បីដោះស្រាយបញ្ហាកកស្ទះនេះ។
សូមរម្លឹកថា កាលពីថ្ងៃទី២០ ខែកុម្ភៈ ស្ថាប័ន NRIX Global Traffic Scorecard ២០១៦ បានដាក់ទីក្រុងបាងកក ស្ថិតចំណាត់ទី១២ នៃទីក្រុងមានចរាចរណ៍កកស្ទះជាងគេ ខណៈដែលឆ្នាំ២០១៥ ទីក្រុងនេះស្ថិតលេខរៀងទី៣០ ឯណោះ។ នេះបង្ហាញថា ស្ថានភាពចរាចរណ៍ក្នុងរាជធានីមួយនេះ កាន់តែអាក្រក់ខ្លាំង។
ស្ថាប័នដដែលនេះ បន្ថែមថា អ្នកបើកបររថយន្តក្នុងទីក្រុងបាងកក ចំណាយពេលជាមធ្យម៦៤.១ម៉ោងក្នុងមួយឆ្នាំលើការស្ទះចរាចរណ៍។ ចំនួននេះ ខ្ពស់ជាងទីក្រុងផ្សេងទៀតដូចជាការ៉ាកាស់ និងម៉ិស៊ីកូ ដែលត្រូវគេចាត់ទុកជាទីក្រុងមានការកកស្ទះខ្លាំងបំផុតលើពិភពលោក៕
Tag:
ថៃ
ចរាចរណ៍
Prawit Wongsuwon
© រក្សាសិទ្ធិដោយ thmeythmey.com