សៀមរាប៖ មន្ទីរពេទ្យកុមារអង្គរនឹងរៀបចំពិធីបុណ្យផ្កាប្រាក់មហាសាមគ្គី ក្នុងគោលបំណងរៃអង្គាសថវិកាទ្រទ្រង់ដល់ការថែទាំកុមារកម្ពុជា នៅក្នុងមន្ទីរពេទ្យកុមារអង្គរ។ ពិធី បុណ្យនេះ
ជាឆ្នាំទី១១ហើយ ដែលមន្ទីរពេទ្យកុមារបានរៀបចំពិធីបុណ្យផ្កានេះពោលចាប់តាំងពីឆ្នាំ២០១៣មក ដើម្បីរៃអង្គាសថវិកាជួយទ្រទ្រង់ដល់ប្រតិបត្ដិការនៃមន្ទីរពេទ្យកុមារអង្គរ និងការផ្ដល់សេវាថែទាំ ព្យាបាលដោយឯកទេស និងទូទៅដល់កុមារនៅទូទាំងប្រទេស។
នាយកមន្ទីរពេទ្យកុមារអង្គរ លោក ងួន ច័ន្ទភក្ត្រា លើកឡើងថាជារៀងរាល់ឆ្នាំមន្ទីរពេទ្យ តម្រូវការថវិកាសម្រាប់ប្រតិបត្តិការប្រមាណ៦លានដុល្លារអាម៉េរិក ដោយ៧០ភាគរយបានពីសប្បុរសធម៌ក្រៅប្រទេស និង៣០ភាគរយទៀតបានពីសប្បុរសធម៌ក្នុងប្រទេស និងថវិកាបានពីបុណ្យផ្កាប្រាក់សាមគ្គី។
រូបភាព មន្ទីរពេទ្យកុមារអង្គរ
នេះបើតាមសេក្ដីប្រកាសព័ត៌មាន របស់មន្ទីរពេទ្យកុមារអង្គរ។ ក្នុងសេចក្ដីប្រកាសព័ត៌មាន បានស្រង់សម្ដីលោកវេជ្ជបណ្ឌិតច័ន្ទភក្ត្រា ដូច្នេះ៖ «ថវិកាដែលទទួលបានពីការរៀបចំពិធីបុណ្យផ្កាប្រាក់នេះ គឺជាចំណែកសំខាន់បំផុតក្នុងការជួយ សង្រ្គោះជីវិតកុមារប្រកបដោយក្ដីមេត្ដា ករុណា និងគុណភាពខ្ពស់នៅក្នុងមន្ទីរពេទ្យកុមារអង្គរ»។
លោកវេជ្ជបណ្ឌិតរូបនេះក៏បានអំពាវនាវ ដល់សប្បុរសជនទាំងក្នុង និងក្រៅប្រទេស ឱ្យចូលរួមពិធីបុណ្យ និងចូលរួមបរិច្ចាគថវិកាតាមសទ្ធា ឬជួយផ្សាយដំណឹងពិធីបុណ្យឱ្យកាន់តែទូលំទូលាយនៅតាមបណ្តាញសង្គមនានា។
រូបភាព មន្ទីរពេទ្យកុមារអង្គរ
លោកអ្នកនាង ដែលមានបំណងចូលរួមបរិច្ចាគថវិកាអាចទំនាក់ទំនងតាមប្រព័ន្ធទូរស័ព្ទ ០៩៨ ៧២៥ ៧៤៥ និង ០១៧ ៧២៥ ៧៤៥ ឬតាមគណនី វីង។
គួរជម្រាបផងដែរថា មន្ទីរពេទ្យកុមារអង្គរគឺជាស្ថាប័នមិនស្វែងរកប្រាក់ចំណេញមួយ បង្កើតឡើងដោយជនជាតិជប៉ុនតាំងពីឆ្នាំ ១៩៩៩ដែលគិតមកដល់សព្វថ្ងៃនេះ បានផ្តល់សេវាពិនិត្យព្យាបាលកុមារបានជិត បីលានករណី និងបានផ្តល់ការបណ្តុះបណ្តាលនូវជំនាញ និងចំណេះដឹងដល់មន្ត្រីសុខាភិបាល សិស្សនិស្សិតវេជ្ជសាស្ត្រមកពីទូទាំងកម្ពុជារាប់រយនាក់ក្នុងមួយឆ្នាំៗ។
ក្រុមបុគ្គលិកមន្ទីរពេទ្យកុមារអង្គរក៏ចូលរួមធ្វើឲ្យមានភាពប្រសើរឡើងនូវសុខុមាលភាពប្រជាពលរដ្ឋនៅតាមសហគមន៍ក្នុងខេត្តសៀមរាប តាមរយៈការចុះអប់រំសុខភាព និងពង្រឹងសមត្ថភាពមន្ត្រីសុខាភិបាលនៅតាមមណ្ឌលសុខភាពអ្នកស្ម័គ្រចិត្តសុខភាពភូមិ សិស្សានុសិស្ស គ្រូបង្រៀន និងប្រជាពលរដ្ឋបានរាប់ពាន់នាក់ក្នុងមួយឆ្នាំៗ៕