ជាតិ
ភូមិព្រះដាក់ជាប់ជាបេក្ខភាពចូលប្រកួតភូមិទេសចរណ៍ឆ្នើមពិភពលោក ![ការជំរុញការផ្សព្វផ្សាយនំបញ្ចុកព្រះដាក់។ រូបភាព៖ លោក សាំង វត្តនា](https://image.thmeythmey.com/pictures/2024/06/23/lll.jpg)
ការជំរុញការផ្សព្វផ្សាយនំបញ្ចុកព្រះដាក់។ រូបភាព៖ លោក សាំង វត្តនា
×![]()
សៀមរាប៖ ភូមិព្រះដាក់ នៃស្រុកបន្ទាយស្រី ត្រូវបានជ្រើសរើសជាភូមិ១ក្នុងចំណោមភូមិ៩ តំណាងកម្ពុជា ជាបេក្ខភាពដើម្បីប្រកួតជាភូមិទេសចរណ៍ឆ្នើម (Best Tourism Villages) របស់អង្គការទេសចរណ៍ពិភពលោក (UNWTO) ឆ្នាំ២០២៤។
លោក សាំង វត្តនា អភិបាលរងស្រុកបន្ទាយស្រី បានឱ្យដឹងថា មានកត្តាសំខាន់ៗចំនួន៥ ដែលធ្វើឱ្យភូមិព្រះដាក់មានលទ្ធភាព និងស្របតាមលក្ខខណ្ឌតម្រូវរបស់អង្គការទេសចរណ៍ពិភពលោក សម្រាប់ចូលប្រកួតប្រជែងភូមិទេសចរណ៍ឆ្នើមកម្រិតអន្ដរជាតិនេះបាន។ លក្ខខណ្ឌទាំងនោះរួមមាន ភូមិព្រះដាក់ ស្ថិតនៅតំបន់រមណីយដ្ឋានអង្គរ មានភូមិសាស្រ្តនៅជិតក្រុង ជាចំណុចឆ្លងកាត់សម្រាប់ភ្ញៀវទេសចរមុននឹងទៅដល់ប្រាសាទបន្ទាយស្រី និងភ្នំគូលែនជាដើម។ ក្រៅពីនេះភូមិព្រះដាក់ជាភូមិបុរាណ ដោយការរៀបចំមានរចនាបថបែបខ្មែរបុរាណសុទ្ធសាធ ដូចជាសង់ផ្ទះខ្ពស់ពីដី ដាំផ្កាលម្អ ប្រជាជនរស់នៅប្រមូលផ្ដុំគ្នាតាមមាត់ផ្លូវ និងមានវាលស្រែ ចម្ការ នៅក្រោយភូមិ។
![](https://image.thmeythmey.com/pictures/2024/06/23/ll1.jpg)
នំអាកោត្នោតភូមិព្រះដាក់
អភិបាលរងស្រុកបន្ទាយស្រីបន្ថែមថា ការប្រកបរបរដូចជាសិប្បកម្មតម្បាញ និងការបន្តគោរពជំនឿប្រពៃណីទំនៀមបុរាណ ក៏ចូលទៅក្នុងលក្ខខណ្ឌសម្រាប់បេក្ខភាពប្រកួតប្រជែងខាងលើផងដែរ។ ជាងនេះទៅទៀតនោះ បរិស្ថាន ការរស់នៅស្អាត ប្រជាជនមានអនាម័យ ចេះទុកដាក់សំរាមបានត្រឹមត្រូវ ។ ហើយចំណុចចុងក្រោយនោះ គឺម្ហូបប្រចាំតំបន់ មាននំបញ្ចុក អាកោត្នោត និងជ្រូកអាំង។ល។
លោក សាំង វត្តនា បន្ថែមថា៖« យើងសង្ឃឹម ដោយសារឯកសារដែលយើងរៀបចំ វាស្របនឹងលក្ខខណ្ឌនៃការវាយតម្លៃរបស់អង្គការទេសចរពីភពលោក»។
![](https://image.thmeythmey.com/pictures/2024/06/23/ll2.jpg)
ផលិតផលកែច្នៃនៅក្នុងភូមិព្រះដាក់
ក្នុងនាមរដ្ឋបាលស្រុក និងអាជ្ញាធរមូលដ្ឋាន លោក សាំង វត្តនា បង្ហាញមោទកភាព ដែលភូមិព្រះដាក់ មានភាពល្បីល្បាញថ្នាក់ជាតិកន្លងមកនោះ ត្រូវបានជ្រើសរើសឱ្យចូលរួមជាលក្ខណៈអន្ដរជាតិដូច្នេះ។ ក្រៅពីភូមិព្រះដាក់ ក្នុងនោះរដ្ឋបាលស្រុកកំពុងរៀបចំភូមិមួយចំនួនទៀត សម្រាប់ការប្រកួតប្រជែងនាពេលខាងមុខ នោះគឺភូមិវត្ត នៃឃុំត្បែង។ លោក វត្តនា ពន្យល់ថា ភូមិនេះមានសក្តានុពលទេសចរណ៍មួយចំនួន ជាភូមិបុរាណ មានប្រជាជនចាស់រស់នៅច្រើន និងមានព្រៃសហគមន៍ ដែលភ្ញៀវទេសចរនិយមទៅកម្សាន្ត និងសិក្សាស្វែងយល់ពីទំនៀមទម្លាប់ និងប្រពៃណីក្នុងភូមិនេះ។
![](https://image.thmeythmey.com/pictures/2024/06/23/ll3.jpeg)
ភូមិព្រះដាក់ មើលពីលើអាកាស។ រូបភាព៖ សាំង វត្តនា
លោក ហួត រិទ្ធី ប្រធាននាយកដ្ឋានសេវាគាំពារទីក្រុងស្អាត និងអគ្គលេខាធិការរងទីក្រុងស្អាត នៃក្រសួងទេសចរណ៍ បានឱ្យដឹងថា ក្រៅពីភូមិព្រះដាក់មានភូមិមួយចំនួនទៀត ដែលដាក់ចូលរួមប្រកួតដែរ ក្នុងនោះរួមមានតំបន់សំបូរព្រៃគុក តំបន់ខ្នងផ្សារ និងតំបន់ពាមក្រសោប ខេត្តកោះកុងជាដើម។ លោក រិទ្ធី បញ្ជាក់ថា នេះជាលើកទី២ហើយ ដែលក្រសួងទេសចរណ៍សម្របសម្រួលដាក់ការប្រកួតភូមិទេសចរណ៍ឆ្នើម នៅអង្គការទេសចរណ៍ពិភពលោកនេះ។
![](https://image.thmeythmey.com/pictures/2024/06/23/ll4.jpg)
លោក សាំង វត្តនា អភិបាលរងស្រុកបន្ទាយស្រី។ រូបភាព៖ ថោង ប្រណី
មន្រ្តីក្រសួងទេសចរណ៍រូបនេះបញ្ជាក់ថា៖« យើងឃើញថាបេក្ខភាពរបស់យើង គាត់ប្រឹងក្នុងការរៀបចំឯកសារ ថតវីដេអូ។ យើងសង្ឃឹមថា យើងអាចនឹងជាប់បានចូលរួមជាមួយសមាជិក ជាមួយអង្គការទេសចរណ៍ពិភពលោក ព្រោះការប្រឡងប្រណាំងនេះ មាន១៩១ប្រទេស ហើយលទ្ធផលអាចនឹងប្រកាសចុងឆ្នាំនេះ»។
សូមបញ្ជាក់ថា ភូមិព្រះដាក់ស្ថិតនៅចំណោមភូមិទាំង៦ នៃឃុំព្រះដាក់ ស្រុកបន្ទាយស្រី។ ភូមិនេះ មានប្រជាជនសរុប៦០០គ្រួសារ ភាគច្រើនមានមុខរបរកសិកម្ម សំណង់ និងបម្រើសេវាកម្មផ្សេងៗ ពិសេសក្នុងវិស័យទេសចរណ៍៕
Tag:
ភូមិព្រះដាក់
ភូមិទេសចរណ៍ឆ្នើមពិភពលោក
UNWTO
© រក្សាសិទ្ធិដោយ thmeythmey.com