លោក ឃឹម ហ្វីណង់ បានប្រាប់ថា ទំហំផលប៉ះពាល់ចំពោះដំណាំនៅពេលនេះ មានត្រឹម១​ទៅ​​២ភាគរយប៉ុណ្ណោះ​ នៃផ្ទៃដីដាំដុះសរុបរបស់កម្ពុជា ហើយភាគច្រើនប្រហែលអាចស្តារ​ឡើង​វិញបាន ព្រោះថាក្រសួងកសិកម្ម បានអន្តរាគមន៍កម្ចាត់ដង្កូវហ្វូងទាន់ពេលវេលា។ មន្រ្តីជាន់ខ្ពស់ក្រសួងកសិកម្មរូបនេះ មិនចាត់ទុកថា ដង្កូវហ្វូងជាឧបសគ្គរាំងស្ទះដល់ការ​ផលិត និងនាំចេញអង្ករកម្ពុជានោះទេ។

 

មកទល់ពេលនេះ មានដំណាំប្រហែល ២៣ ០០០ហិកតា បានរងផលប៉ះពាល់ដោយសារ «ដង្កូវហ្វូង» ក្នុងនោះមានស្រូវ ១៥ ០០០ហិកតា និងដំណាំឧស្សាហកម្មដូចជាពោត និង​ដំឡូងមីប្រហែល ៨ ០០០ហិកតា។ នេះបើតាមការវាយតម្លៃបឋមរបស់ក្រសួងកសិកម្ម។ 

 

លោក ឃឹម ហ្វីណង់ ប្រាប់ដូច្នេះថា៖«ទំហំ២៣ ០០០ហិកតានេះ ជាចំនួនរងផលប៉ះពាល់ មិនមែនជាទំហំខូចខាតនោះទេ។ ហើយប្រហែលជាអាចស្តារឡើងវិញបានភាគច្រើន ព្រោះ​យើងបានអន្តរាគមន៍ទាន់ពេលវេលា និងដំណាំភាគច្រើន ទើបស្ថិតក្នុងដំណាក់កាល​អាច​លូតលាស់ឡើងវិញបាន ក្រោយដង្កូវហ្វូងត្រូវបានកម្ចាត់ ជាពិសេសប្រសិនបើមាន​ភ្លៀង​ធ្លាក់​គ្រប់គ្រាន់»។ 

 

«ដង្កូវហ្វូង»កើតឡើងដោយសារការប្រែប្រួលអាកាសធាតុ ដែលបានធ្វើឱ្យថយចុះចំនួន​សត្វ​មានប្រយោជន៍ និងផ្ទុះ​សត្វបំផ្លាញចង្រៃទាំងនេះ។ ​ដើម្បីបង្ការ និងទប់ស្កាត់ការរាត​ត្បាតរបស់«ដង្កូវហ្វូង» ​នៅឆ្នាំបន្តបន្ទាប់ទៀត ក្រសួង​កសិ​កម្ម នឹងបន្តតាមដាន និងផ្តល់ព័​ត៌មានដល់កសិករឱ្យ​បានលឿន​ជាងមុន​តាម​រយៈ​មន្ត្រី​កសិកម្មឃុំ។ ​លោក ឃឹម ហ្វីណង់ ​ប្រាប់​​បែប​នេះថា៖«បញ្ហាប្រែប្រួលអាកាសធាតុ អាចនឹងបន្តកើតមាន ប៉ុន្តែដោយសារការផ្សព្វផ្សាយបានទូលំទូលាយក្នុងឆ្នាំនេះ ជឿជាក់ថា កសិករភាគច្រើន នឹងមានប្រុង ប្រយ័ត្នទុកជាមុននៅឆ្នាំក្រោយៗ ហើយក្រសួងក៏នឹងបន្តតាមដាន និងផ្តល់ព័ត៌មានបែប បុរេសកម្មជូនដល់កសិករយើង ឱ្យបានលឿនជាងមុនផងដែរ ជាពិសេសតាមរយៈ មន្ត្រី កសិកម្មឃុំរបស់យើង ដែលមានវត្តមាននៅជិតកសិករយើងស្រាប់»៕