អន្តរជាតិ
អង្គការសហប្រជាជាតិ៖ អ៊ីតាលីអាចសង្គ្រោះជនអន្តោប្រវេសន៍ដែលលង់ទឹក ២០០ នាក់បាន តែមិនធ្វើ
×![]()
ដោយ: VOA
រូបតំណាង៖ ជនភៀសខ្លួនរង់ចាំការជួយពីអង្គការអេស្ប៉ាញមួយ ខណៈដែលពួកគេរត់ភៀសខ្លួនតាមទូកពីប្រទេសលីប៊ី ថ្ងៃទី៣ ខែកុម្ភៈ ឆ្នាំ២០១៧។
អ៊ីតាលីបានបរាជ័យក្នុងការការពារជីវិតជនអន្តោប្រវេសន៍ជាង ២០០ នាក់នៅលើទូកមួយគ្រឿងដែលបានលិចក្នុងសមុទ្រមេឌីទែរ៉ាណេកាលពីឆ្នាំ ២០១៣។ នេះបើតាមការរកឃើញរបស់គណៈកម្មាធិការសិទ្ធិមនុស្សរបស់អង្គការសហប្រជាជាតិកាលពីថ្ងៃពុធ។
គណៈកម្មាធិការនោះបានរកឃើញថា អ៊ីតាលី«បានបរាជ័យក្នុងការឆ្លើយតបភ្លាមៗទៅនឹងការហៅទូរស័ព្ទឲ្យជួយពីទូកដែលកំពុងលិចនោះ ដែលដឹកមនុស្សវ័យកណ្ដាលនិងកុមារជាង ៤០០ នាក់»។
គណៈកម្មាធិការសិទ្ធិមនុស្សនោះបានឲ្យដឹងទៀតថា អ៊ីតាលី«ក៏បានបរាជ័យក្នុងការពន្យល់ពីការពន្យារពេលក្នុងការបញ្ជូននាវាកងទ័ពជើងទឹករបស់ខ្លួនដែលមានឈ្មោះ ថា ITS Libra ទៅកាន់កន្លែងកើតហេតុ ដែលស្ថិតនៅចម្ងាយត្រឹមតែប្រមាណ ១ម៉ោងពីកន្លែងនោះតែប៉ុណ្ណោះ»។
ជនជាតិស៊ីរីបីនាក់ និងជនជាតិប៉ាឡេស្ទីនម្នាក់ ដែលបានរស់រានជីវិតពីហេតុការណ៍នោះប៉ុន្តែបានបាត់បង់សមាជិកគ្រួសាររបស់ខ្លួន បានប្ដឹងរួមគ្នាទៅកាន់គណៈកម្មាធិការសិទ្ធិមនុស្សអង្គការសហប្រជាជាតិនេះ។
គណៈកម្មាធិការនេះមានអ្នកជំនាញឯករាជ្យចំនួន ១៨ នាក់ដែលមានភារកិច្ចត្រួតពិនិត្យការអនុវត្តន៍សន្ធិសញ្ញាអន្តរជាតិស្ដីពីសិទ្ធិស៊ីវិល និងសិទ្ធិនយោបាយ។
ហេតុការណ៍នោះបានកើតឡើងកាលពីថ្ងៃទី១១ ខែតុលា ឆ្នាំ២០១៣។ ទូកនោះចេញដំណើរពីកំពង់ផែនេសាទ Zuwarah នៃប្រទេសលីប៊ី ដែលដឹកមនុស្សភាគច្រើនរត់ភៀសខ្លួនពីប្រទេសស៊ីរី៕
© រក្សាសិទ្ធិដោយ thmeythmey.com
