អន្តរជាតិ
ប្រមុខ UN អំពាវនាវឱ្យពិភពលោកគិតគូរពីបទបញ្ញត្តិដើម្បីគ្រប់គ្រងបណ្តាញសង្គម បណ្តាញសង្គម Facebook។រូបភាព៖ AFP
× លោក អាន់តូនីញ៉ូ ហ្គូតេរ៉េស អគ្គលេខាធិការអង្គការសហប្រជាជាតិ (UN) បានអំពាវនាវឱ្យថ្នាក់ដឹកនាំពិភពលោកគិតគូរៀបចំបទបញ្ញត្តិក្នុងការគ្រប់គ្រងបណ្តាញសង្គមដូចជា Facebook និងTwitter ជាដើម។ ការលើកឡើងរបស់ប្រមុខ UN នេះធ្វើឡើងក្នុងបរិបទមួយដែលក្រុមហ៊ុនបណ្តាញសង្គមកាន់តែមានអំណាចច្រើនជាងមុន ក៏ដូចជាចោលរោមដោយបញ្ហាដូចជាក្នុងការផ្ទុក ការប្រើប្រាស់ និងការលក់ទិន្ន័យអ្នកប្រើប្រាស់ផងដែរ។
អគ្គលេខាធិការ UN លោក អាន់តូនីញ៉ូ ហ្គួតេរ៉េស ជឿថា ក្រុមហ៊ុនបណ្តាញសង្គមមិនគួរមានអំណាចក្នុងការបិទគណនីអ្នកប្រើប្រាស់ឡើយ ហើយលោកក៏លើកឧទាហរណ៍ការបិទគណនី Twitter របស់អតីតប្រធានាធិបតីអាមេរិក ដូណាល់ ត្រាំ ។ លោក ហ្គូតេរ៉េស និយាយថា គេគួរបង្កើតយន្តការមួយ ដែលមានក្រឹត្យក្រមច្បាប់ត្រឹមត្រូវមុននឹងក្រុមហ៊ុនបណ្តាញសង្គមអាចចាត់វិធានការបែបណាមួយលើអ្នកប្រើប្រាស់។
«ខ្ញុំមិនគិតថា យើងអាចរស់ក្នុងពិភពលោកមួយដែលអំណាចជាច្រើនត្រូវបានប្រមូលផ្តុំក្នុងដៃក្រុមហ៊ុនមួយក្តាប់តូចឡើយ»។ នេះជាការលើកឡើងរបស់លោក ហ្គូតេរ៉េស ក្នុងសន្និសីទសារព័ត៌មានមួយនៅថ្ងៃទី២៨ ខែមករា។ លោក បង្ហាញក្ដីបារម្ភពន់ពេកដែលក្រុមហ៊ុនបណ្តាញសង្គមមានអំណាចយ៉ាងច្រើនបែបនេះ។ នេះបើតាមទីភ្នាក់ងារព័ត៌មាន AP ។
បន្ថែមពីនេះ ប្រមុខUN លើកឡើងពីបញ្ហាដែលកើតឡើងនៅលើបណ្ដាញសង្គមដូចជាការប្រើប្រាស់ទិន្នន័យអ្នកប្រើប្រាស់ពីសំណាក់ក្រុមហ៊ុនបណ្តាញសង្គម កង្វះការគ្រប់គ្រងដោយអ្នកប្រើប្រាស់ចំពោះទិន្ន័យរបស់ខ្លួន ក៏ដូចជាការលក់ព័ត៌មានឯកជនឱ្យក្រុមហ៊ុនផ្សាយពាណិជ្ជកម្មដទៃទៀត។ លោកសង្កត់ធ្ងន់ថា គំរូពាណិជ្ជកម្មបែបនេះអាចកែប្រែចរិត និងទម្លាប់របស់អ្នកប្រើប្រាស់ ហើយអ្វីដែលកាន់តែគ្រោះថ្នាក់ គឺការប្រើប្រាស់ក្នុងផ្លូវនយោបាយដើម្បីគ្រប់គ្រងពលរដ្ឋតែម្ដង។
លោក ហ្គូតេរ៉េស ទទូចឱ្យមានការពិចារណាឱ្យបានហ្មត់ចត់លើបញ្ហាខាងលើ ហើយស្នើឱ្យបញ្ចូលដំណោះស្រាយទៅក្នុងគម្រោងផែនទីចង្អុលផ្លូវសម្រាប់កិច្ចសហប្រតិបត្តិការឌីជីថល (Roadmap for Digital Cooperation)។ គម្រោងនេះ បង្កើតឡើងក្នុងបំណងលើកកម្ពស់ពិភពលោកឌីជីថលដែលមានសុវត្ថិភាព និងប្រកបដោយសមធម៌។
កម្មវិធីបណ្តាញសង្គម
គម្រោងខាងលើនេះ លើកឡើងពីផែនការសកម្មភាពគន្លឹះចំនួន៨ ដែលក្នុងនោះមានការភ្ជាប់ទំនាក់ទំនងជាសាកលនៅឆ្នាំ២០៣០ ការធានាការការពារសិទ្ធិមនុស្សក្នុងសម័យឌីជីថល គាំទ្រកិច្ចសហប្រតិបត្តិការជាសាកលលើបញ្ញាសិប្បនិម្មិត និងបរិយាប័ន្នវិស័យឌីជីថលដោយរួមបញ្ចូលក្រុមងាយរងគ្រោះបំផុតជាដើម។
ក្នុងសន្និសីទសារព័ត៌មានដដែល លោក ហ្គូតេរ៉េស បន្ថែមថា បច្ចេកវិទ្យាឌីជីថល មិនសូវត្រូវបានពិភាក្សាក្នុងរបៀបវារៈនយោបាយឡើយ។ ប្រមុខ UN រូបនេះ ក៏អំពាវនាវឱ្យពង្រឹងវេទិកាអភិបាលកិច្ចអ៊ីនធឺណិត តាមរយៈការប្រមូលផ្តុំក្រុមផ្សេងៗគ្នាក្នុងវិស័យសាធារណៈ និងឯកជនដើម្បីពិភាក្សាពីគោលនយោបាយសាធារណៈទាក់ទងនឹងអ៊ីនធឺណិត សំដៅឱ្យគោលនយោបាយទាំងនោះអាចឆ្លើយតប និងមានភាពពាក់ព័ន្ធទៅនឹងបញ្ហាឌីជីថលនាពេលបច្ចុប្បន្ន៕
© រក្សាសិទ្ធិដោយ thmeythmey.com