ភ្នំពេញ៖ ដើម្បីចូលរួមលើកកម្ពស់ការយល់ដឹង របស់ប្រជាពលរដ្ឋកម្ពុជា ទៅលើចំណេះដឹងហិរញ្ញវត្ថុ ក្រុមហ៊ុនពុទ្ធិពល និស្ថាងប័ន-អ្នកពាក់ព័ន្ធ បានសម្រេចរៀបចំកម្មវិធីពានរង្វាន់ផលិតវីដេអូខ្លី ស្ដីពីចំណេះដឹងហិរញ្ញវត្ថុ ប្រចាំឆ្នាំ២០២១ ។
កម្មវិធីនេះ ផ្ដួចផ្ដើមឡើងដោយក្រុមហ៊ុនពុទ្ធិពល ដោយចូលរួមសហការរៀបចំ ដោយសមាគមធនាគារនៅកម្ពុជា ដែលហៅកាត់ជាភាសាអង់គ្លេសABC) និងសមាគមមីក្រូហិរញ្ញវត្ថុកម្ពុជា(CMA) ព្រមទាំងមានការគាំទ្រពីដៃគូផ្សេងទៀត ដូចជាក្រុមហ៊ុន Westline Education Group, សហព័ន្ធសេវាអប់រំនៅកម្ពុជា និងកម្មវិធីគំនិតផ្ដួចផ្ដើមមេដឹកនាំយុវជនអាស៊ីអាគ្នេយ៍(YSEALI) ។
កម្មវិធីពានរង្វាន់ផលិតវីដេអូ ស្ដីពីចំណេះដឹងហិរញ្ញវត្ថុ ប្រចាំឆ្នាំ២០២១ ឬ The Financial Education Awareness Content Creator Award 2021 «FEACA 2021» នេះ បើកឱ្យដាក់ពាក្យប្រកួត ពីសំណាក់សាធារណជន ដែលមានបំណងចូលរួមលើកកម្ពស់ចំណេះដឹងហិរញ្ញវត្ថុនៅកម្ពុជា តាមរយៈស្នាដៃវីដេអូ និងគំនិតអប់រំរបស់ខ្លួន។ ទន្ទឹមនឹងនេះ កម្មវិធីប្រកួតនេះ ក៏មានផ្ដល់ជូនពានរង្វាន់ ជាមួយនឹងថវិកាសម្រាប់ជ័យលាភីលេខ១ ចំនួន ៦ ០០០ ០០០ រៀល, ជ័យលាភីលេខ២ ថវិកា ៤ ០០០ ០០០ រៀល និងជ័យលាភីលេខ៣ ថវិកា ២ ០០០ ០០០ រៀល។
ក្រៅពីស្វែងរកជ័យលាភីចំនួន៣ក្រុម កម្មវិធីក៏ជំរុញលើកទឹកចិត្ត ដល់ការផលិតវីដេអូទាក់ទងទៅនឹងប្រធានបទចំនួន៤ប្រភេទ ដែលរួមមាន សហគ្រាសធុនតូច និងមធ្យម ស្ត្រី យុវជន និងកុមារ។ កម្មវិធី នឹងជ្រើសរើសបេក្ខជនចំនួន ៤ក្រុមផ្សេងទៀត សម្រាប់រង្វាន់លើកទឹកចិត្តចំនួន ១ ០០០ ០០០ លានរៀល សម្រាប់ក្រុមនីមួយៗ ដែលផលិតវីដេអូបានល្អជាងគេ ចូលទៅក្នុងប្រភេទប្រធានបទណាមួយ។ កម្មវិធីនេះ បើកទទួលពាក្យ ពីថ្ងៃទី២៦ខែមករា ដល់ថ្ងៃទី៨ខែកុម្ភៈ ឆ្នាំ២០២១។
លោក ទិត្យ កំរង ស្ថាបនិក និងជាប្រធានក្រុមប្រឹក្សាភិបាលក្រុមហ៊ុនពុទ្ធិពល បានមានប្រសាសន៍ថា ការផ្ដួចផ្ដើមរៀបចំកម្មវិធី ផលិតវីដេអូប្រកួតនេះឡើង គឺស្របនឹងបេសកកម្មមួយ ដ៏សំខាន់របស់ពុទ្ធិពល ដែលធ្វើសកម្មភាពរួមចំណែកបង្កើនការជ្រួតជ្រាប របស់ប្រជាជនកម្ពុជា អំពីចំណេះដឹងហិរញ្ញវត្ថុ ហើយរឹតតែពិសេស កម្មវិធីខាងលើនេះ មានការចូលរួមសហការពីអ្នកពាក់ព័ន្ធជាច្រើន។
លោក ទិត្យ កំរង គូសបញ្ជាក់ដូច្នេះថា៖«យើងចង់ឱ្យគ្រប់គ្នាយល់ដឹង អំពីអត្ថប្រយោជន៍នៃចំណេះដឹងហិរញ្ញវត្ថុ និងអត្ថប្រយោជន៍ ពីការទទួលបានសេវាកម្មហិរញ្ញវត្ថុ ដ៏ត្រឹមត្រូវមួយ។ យើងពិតជាពេញចិត្តយ៉ាងខ្លាំង ដោយសកម្មភាពនេះ ទទួលបានកិច្ចសហការពីសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដែលជាតំណាងឱ្យគ្រឹះស្ថានធនាគារ និងមីក្រូហិរញ្ញវត្ថុនៅទូទាំងប្រទេស ហើយដែលស្របនឹងការចង់បានរបស់រាជរដ្ឋាភិបាលកម្ពុជា ។ ទាំងនេះបង្ហាញពីការចូលរួម ពីគ្រប់វិស័យពាក់ព័ន្ធនានា ដើម្បីរួមចំណែកលើកកម្ពស់ការអប់រំចំណេះដឹងហិរញ្ញវត្ថុ និងជួយធ្វើយ៉ាងណា ឱ្យប្រជាពលរដ្ឋកម្ពុជានៅគ្រប់ស្រទាប់វណ្ណៈ មានឱកាសស្មើគ្នា ក្នុងការទទួលបានអត្ថប្រយោជន៍ ពីផលិតផល និងសេវាកម្មហិរញ្ញវត្ថុ»៕
(អត្ថបទពាណិជ្ជកម្ម)