លោក ម៉ិច សុទ្ធា ស្ថាបត្យករជាន់ខ្ពស់ នៅសសរ ស្ថាបត្យកម្ម បានលើកឡើងថាស្មារតីក្រុម ពិតជាផ្នែកមួយដ៏សំខាន់ណាស់ ដើម្បីជំរុញឱ្យរាល់ការងាររបស់ សសរ ស្ថាបត្យកម្ម សម្រេចបានដោយជោគជ័យ។
ដើម្បីស្វែងយល់កាន់តែច្បាស់ សូមលោកអ្នកនាង តាមដានកិច្ចសម្ភាស រវាងសារព័ត៌មានថ្មីៗ និងលោក ម៉ិច សុទ្ធា ដូចតទៅ៖
សារព័ត៌មានថ្មីៗ៖ ហេតុអ្វីបានជាលោក សុទ្ធា ចាប់អារម្មណ៍ធ្វើការនៅក្នុងវិស័យស្ថាបត្យកម្ម?
លោក ម៉ិច សុទ្ធា៖ ចាប់តាំងពីខ្ញុំធំដឹងក្តីមក ខ្ញុំចាប់ផ្តើមចាប់អារម្មណ៍យ៉ាងខ្លាំង ក្នុងការចាប់យកអាជីព នៅក្នុងវិស័យស្ថាបត្យកម្ម ពីព្រោះខ្ញុំបានកត់សម្គាល់ឃើញថា វិស័យស្ថាបត្យកម្មដើរតួយ៉ាងសំខាន់ ហើយក៏ជានិមិត្តរូបនៃប្រទេសជាតិ ដែលវាអាចឆ្លុះបញ្ចាំងពីវប្បធម៌ និងរបៀបរស់នៅរបស់ប្រជាជន កាលពីអតីតកាលដូចជា៖ ប្រាសាទអង្គរវត្តជាដើម។
សារព័ត៌មានថ្មីៗ៖ ហេតុអ្វីបានជាលោក សុទ្ធា ចាប់អារម្មណ៍ធ្វើការ នៅក្រុមហ៊ុន សសរ ស្ថាបត្យកម្ម?
លោក ម៉ិច សុទ្ធា៖ នៅប្រទេសកម្ពុជា មានក្រុមហ៊ុនស្ថាបត្យកម្ម និងរចនាផ្នែកខាងក្នុងជាច្រើនគួរឱ្យកត់សម្គាល់ ប៉ុន្តែខ្ញុំបានសម្រេចចិត្ត ធ្វើការនៅ សសរ ស្ថាបត្យកម្ម ដោយសារតែខ្ញុំដឹងច្បាស់ថា ក្រុមហ៊ុននេះ មានបទពិសោធន៍ក្នុងវិស័យស្ថាបត្យកម្ម អស់រយៈពេលជាច្រើនឆ្នាំណាស់មកហើយ។ អ្វីដែលទាក់ចិត្តខ្ញុំខ្លាំងបំផុតនោះ គឺបរិយាកាសការងារ និងវប្បធម៌ នៅក្នុងក្រុមហ៊ុន ដែលធ្វើឱ្យមិត្តរួមការងារទាំងអស់ ព្រមទាំងខ្ញុំ មានអារម្មណ៍កក់ក្តៅដូចជាគ្រួសារតែមួយ។
សារព័ត៌មានថ្មីៗ៖ តើជំនាញ និងចំណេះដឹងអ្វីខ្លះ ដែល លោក សុទ្ធា ទទួលបានពីកន្លែងធ្វើការនេះ?
លោក ម៉ិច សុទ្ធា៖ ធ្វើការនៅក្រុមហ៊ុន សសរ ស្ថាបត្យកម្ម ក្រៅពីជំនាញ និងចំណេះដឹងដែលខ្ញុំមានស្រាប់ ខ្ញុំអាចអភិវឌ្ឍខ្លួនឯង និងបង្កើនវិជ្ជាជីវៈ នៅក្នុងខ្លួនបន្ថែមទៀត។ ពីមុនតួនាទីខ្ញុំត្រឹមតែជាអ្នករចនាធម្មតា បន្ទាប់មកខ្ញុំត្រូវបានដំឡើងជាអ្នករចនាជាន់ខ្ពស់។ ជាមួយនឹងតួនាទីនេះ ខ្ញុំទទួលបានជំនាញជាច្រើនទៀត ដូចជា ការទំនាក់ទំនង ការដោះស្រាយបញ្ហា និងការគ្រប់គ្រង ក្នុងការដឹកនាំគម្រោងនីមួយៗ។
សារព័ត៌មានថ្មីៗ៖ តើអ្វីដែលជាបញ្ហាប្រឈមបំផុតសម្រាប់ លោក សុទ្ធា ពេលធ្វើការក្នុងវិស័យនេះ? តើលោកអាចដោះស្រាយវា ដោយរបៀបណាឱ្យមានប្រសិទ្ធភាព?
លោក ម៉ិច សុទ្ធ៖ តាមបទពិសោធន៍របស់ខ្ញុំ ធ្វើការនៅក្នុងវិស័យស្ថាបត្យកម្ម មានការលំបាកបន្តិច ព្រោះវាទាមទារឱ្យយើងចេះបត់បែន និងមានគំនិតច្នៃប្រឌិតខ្ពស់ ដើម្បីជំរុញគម្រោងនីមួយៗ ឱ្យទៅមុខដោយរលូន។ ឧទាហរណ៍ថា មុនពេលខ្ញុំដាក់គម្រោងឱ្យអតិថិជនត្រួតពិនិត្យ ខ្ញុំត្រូវតែច្បាស់ជាមួយខ្លួនឯង និងប្រុងប្រយ័ត្ន ជាមួយនឹងការរចនាស្ថាបត្យកម្មទាំងនោះ ។ ដូច្នេះវាមានសារៈសំខាន់ណាស់ ក្នុងការសិក្សាពីគម្រោងនីមួយៗ ឱ្យបានល្អិតល្អន់។
ដើម្បីទប់ទល់នឹងបញ្ហាប្រឈមទាំងនេះដោយជោគជ័យ យើងត្រូវតែខិតខំបន្ថែមទៀត ក្នុងការសិក្សាពីតម្រូវការរបស់អតិថិជន និងបច្ចេកវិទ្យាថ្មីៗ ដើម្បីអាចបញ្ចូលទៅក្នុងការរចនារបស់យើង។ សំខាន់ជាងនេះទៅទៀត ប្រសិនបើយើង ធ្វើទៅលើគម្រោងធំៗ ខ្ញុំគិតថាស្មារតីក្រុម គឺមានសារៈសំខាន់ណាស់ ព្រោះយើងត្រូវការ ការសហការកាន់តែច្រើនពីអតិថិជន និងក្រុមការងាររបស់យើង ដើម្បីសម្រេចបានគម្រោងទាំងអស់នេះជាមួយគ្នា៕
(អត្ថបទពាណិជ្ជកម្ម)