ការសិក្សាមួយបង្ហាញថា ជំងឺកូវីដ-១៩ បំផ្លាញគុណភាពមេជីវិត និងកាត់បន្ថយលទ្ធភាពបង្កើតរបស់មនុស្សប្រុស។ លទ្ធផលនៃការសិក្សាដែលចេញផ្សាយនៅថ្ងៃទី២៩ ខែមករា បានមកពីការសិក្សាលើបុរសកើតជំងឺកូវីដ-១៩ ធៀបនឹងបុរសដែលមានជំងឺនេះ។
ជំងឺកូវីដ-១៩ ដែលអុកឡុកពិភពលោកជាងមួយឆ្នាំមកហើយនោះ នៅមិនទាន់ទៅណាឡើយ។ អ្នកវិទ្យាសាស្ត្រ នាំគ្នាស្រាវជ្រាវពីឥទ្ធិពលរបស់ជំងឺនេះលើមនុស្សនៅរយៈពេលវែង។ ការសិក្សាពីផលប៉ះពាល់នានា ក៏ត្រូវបានធ្វើឡើងជាបន្តបន្ទាប់ដើម្បីវាយតម្លៃពីផលវិបាកលើប្រព័ន្ធនានាក្នុងរាងកាយមនុស្សរាប់ទាំងការបន្តពូជផងដែរ។
បើតាមលទ្ធផលស្រាវជ្រាវដែលផ្សាយលើព្រឹត្តបត្រសុខភាព បន្តពូជ (Reproduction) នៅថ្ងៃទី២៩ ខែមករា កូវីដ-១៩ បង្កផលប៉ះពាល់អវិជ្ជមានដល់លទ្ធភាពបង្កើតកូនរបស់បុរស។ លទ្ធផលបឋមនៃការសិក្សាអះអាងថា ជំងឺនេះ អាចបង្កើនកម្រិតមរណភាពស្ពែម រលាក និងស្ត្រេស ដែលនឹងនាំឱ្យមានផលប៉ះពាល់មិនល្អសម្រាប់ការបង្កើតកូន។
«ការរកឃើញនេះផ្ដល់ព័ស្តុតាងដំបូងថា ប្រព័ន្ធបង្កកំណើតរបស់បុរស អាចជាគោលដៅ និងត្រូវបំផ្លាញដោយកូវីដ-១៩។» នេះជាការបញ្ជាក់របស់អ្នកនិពន្ធដែលស្រង់ផ្សាយដោយទីភ្នាក់ងារព័ត៌មាន AFP ។
សាស្ត្រាចារ្យ Behzad Hajizadeh Maleki និងសាស្ត្រាចារ្យ Bakhtyar Tartibian មកពីសាកលវិទ្យាលមួយនៅអាល្លឺម៉ង់ បានសិក្សាពីឥទ្ធិពលរបស់កូវីដ-១៩ លើលទ្ធភាពបង្កកំណើតនេះ។ ការវិភាគ ធ្វើឡើងរៀងរាល់១០ម្ដងអំឡុងពេល៦០ថ្ងៃ និងលើបុរសកើតកូវីដ-១៩ ៨៤នាក់ ធៀបនឹង១០៥នាក់ដែលមានសុខភាពល្អ។
អ្នកជំនាញដែលមិនចូលរួមក្នុងការសិក្សានេះ ស្វាគមន៍លទ្ធផលខាងលើ ប៉ុន្តែស្នើឱ្យមានការសិក្សាបន្ថែមទៀត មុននឹងឈានដល់ការសន្និដ្ឋានចុងក្រោយដ៏រហ័ស។ លោក Alison Campbell អ្នកជំនាញផ្នែកអំប្រ៊ីយ៉ុងវិទ្យានៅអង់គ្លេស ប្រាប់ឱ្យបុរសៗកុំជ្រួលច្របល់ខ្លាំងនឹងព័ត៌មាននេះ។ លោកស្រីអះអាងថា គេមិនទាន់មានព័ស្តុតាងរឹងមាំដែលបង្ហាញពីផលប៉ះពាល់រយៈពេលវែងរបស់កូវីដ-១៩ លើស្ពែម ឬលទ្ធផលបង្កកំណើតរបស់បុរសឡើយ។
បន្ថែមពីនោះ អ្នកជំនាញខ្លះទៀត ក៏លើកឡើងពីកត្តាផ្សេងដែលប៉ះពាល់លទ្ធផលបង្កើតកូនរបស់បុរសនេះអំឡុងពេលមានកូវីដ-១៩ ។ ទាក់ទងរឿងនេះ លោកស្រី Campbell លើកឡើងថា អ្នកជំងឺកូវីដ-១៩ ភេទប្រុសដែលសះស្បើយ ត្រូវប្រើថ្នាំផ្សេងដែលអាចប៉ះពាល់ដល់ប្រព័ន្ធបន្តពូជដូចជាថ្នាំ corticosteroids ឬថ្នាំប្រឆាំងវីរុស។ ចំណែកលោក Allan Pacey អ្នកជំនាញផ្នែកបន្តពូជរបស់បុរសប្រចាំសាកលវិទ្យាល័យ Sheffield និយាយថា កត្តាគួបផ្សំផ្សេងទៀតអាចជាការលើសទម្ងន់របស់អ្នកជំងឺទៀតផង។
លោកបន្ថែមថា ស្ថានភាពធ្ងន់ធ្ងរនៃសុខភាពរបស់អ្នកជំងឺកូវីដ-១៩ ក៏ជាកត្តាមួយដែរ។ ត្រង់នេះលោកពន្យល់ថា ឱ្យតែស្ថានភាពជំងឺធ្ងន់ធ្ងរ ទោះបង្កមិនអ្វីក៏ដោយ ក៏ប៉ះពាល់ផលិតកម្មទឹកស្ពែមដែរ៕