រដ្ឋបាលស្រុកមង្គលបូរី ឱ្យពលរដ្ឋប្រុងប្រយ័ត្ន ក្រោយទឹកស្ទឹងមង្គលបូរី ហក់ឡើងខ្លាំង

ជាតិ

រដ្ឋបាលស្រុកមង្គលបូរី ឱ្យពលរដ្ឋប្រុងប្រយ័ត្ន ក្រោយទឹកស្ទឹងមង្គលបូរី ហក់ឡើងខ្លាំង

21, Sep 2021 , 3:29 pm

រូបភាព

ទឹក_ស្ទឹង_មង្គល_បូរី_។ រូបភាព_ពី_ហ្វេសប៊ុក_ Sokhom Sek

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ រដូវវស្សាចូលមកដល់ ភ្លៀងធ្លាក់កាន់តែច្រើន រួមផ្សំនឹងស្ថានភាពទឹកហូរធ្លាក់ពីផ្នែកខាងលើ តាមបណ្ដោយដងស្ទឹងនៃស្រុកបរវេល ខេត្តបាត់ដំបង និងទឹកហូរធ្លាក់ពីស្រុកម៉ាឡៃ បានធ្វើឱ្យកម្រិតទឹកក្នុងស្ទឹងមង្គលបូរី ខេត្តបន្ទាយមានជ័យ ហក់ឡើងខ្លាំង។ ស្ថានភាពបែបនេះ អាចបង្កឱ្យមានផលប៉ះពាល់ដល់ប្រជាពលរដ្ឋ ផ្ទះសម្បែង សត្វ និងផលដំណាំផ្សេងៗ។

រដ្ឋបាលស្រុកមង្គលបូរី បានចេញសេចក្ដីប្រកាសព័ត៌មានដល់ប្រជាពលរដ្ឋឱ្យមានការប្រុងប្រយ័ត្ន ក្រោយស្ថានភាពទឹកក្នុងស្ទឹងមង្គលបូរី មានការហក់ឡើងខ្លាំង ដែលអាចបង្កគ្រោះថ្នាក់ដល់ប្រជាពលរដ្ឋ។ ដើម្បីបង្ការការពារនូវគ្រោះទឹកជំនន់ រដ្ឋបាលស្រុកមង្គលបូរី អំពាវនាវដល់ពលរដ្ឋ ត្រៀមស្បៀង រួមទាំងថ្នាំសង្កូវ ក្នុងករណីមានការជន់លិចផ្សេងៗ។

សេចក្ដីប្រកាសរបស់រដ្ឋបាលស្រុកមង្គលបូរីចេញផ្សាយថ្ងៃទី២០ កញ្ញា បន្តថា ពលរដ្ឋត្រូវរៀបចំទុកឯកសារសំខាន់ៗ និងត្រៀមមធ្យោបាយដឹកជញ្ជូន ឬមធ្យោបាយទុកជម្លៀសនៅពេលទឹកជំនន់មកដល់។ ជាមួយគ្នានេះ ថែរក្សាកុមារតូច និងមិនត្រូវឱ្យកុមារចុះលេងទឹក តែម្នាក់ឯង ដោយគ្មានមនុស្សធំនៅក្បែរ ពិសេសត្រូវប្រុងប្រយ័ត្នសត្វអសិរពិស និងប្រព័ន្ធអគ្គិសនី។

សូមបញ្ជាក់ថា នៅព្រឹកថ្ងៃទី២១ ខែកញ្ញានេះ ក្រសួងធនធានទឹក និងឧតុនិយម បានព្យាករណ៍ថា រាជធានីភ្នំពេញ និងខេត្តចំនួន១១ នឹងអាចរងជំនន់ទឹកភ្លៀង ពីថ្ងៃទី២២-២៨ កញ្ញ៕