ជាតិ
សិល្បះ
ម្ចាស់បទ”កម្មករឆ្លងដែន” លោក សែម សង្វាត កំពុងធ្លាក់ខ្លួនឈឺធ្ងន់ ![](https://image.thmeythmey.com/pictures/2021/09/30/sangvath.jpg)
×![]()
ភ្នំពេញ៖ លោក សែម សង្វាត ម្ចាស់បទ “កម្មករឆ្លងដែន” កំពុងធ្លាក់ខ្លួនឈឺធ្ងន់ ដោយសារជំងឺថ្លើមប្រភេទB ។ ដោយសារតែគ្រួសារអស់លទ្ធភាព កូនប្រុសច្បងរបស់លោក សែម សង្វាត បានអំពាវនាវសុំជំនួយពីសប្បុរសជនជិតឆ្ងាយ ដើម្បីមានប្រាក់បន្តព្យាបាលជំងឺឪពុក។ ទោះជាយ៉ាងណា លោក សង្វាត រតនៈ ត្រូវជាកូនច្បង ដែលទើបតែមានអាយុ២១ឆ្នាំនោះ ថាលោកមិនចង់ស្នើសុំជំនួយឡើយ ប៉ុន្តែពេលនេះលោកពិតជាអស់លទ្ធភាព។
ឆ្លើយប្រាប់សារព័ត៌មានថ្មីៗ តាមទូរសព្ទ លោក សង្វាត រតនៈ ដែលត្រូវជាកូនប្រុសច្បងរបស់លោក សែម សង្វាត ថាឪពុករបស់ខ្លួនទើបតែធ្លាក់ខ្លួនឈឺធ្ងន់ កាលពីម្សិលមិញប៉ុណ្ណោះ។ បើតាមលោក រតនៈ ដែលត្រូវជាកូនប្រុសច្បង លោក សែម សង្វាត មានអាការខ្សោយខ្លាំង អស់កម្លាំង និយាយមិនសូវបាន ឆ្អល់ពោះ ពិបាកដកដង្ហើម និងទទួលទានបបរបានតិចតួច។
លោក រតនៈ ថាឪពុករបស់លោក រស់នៅជាមួយជំងឺថ្លើម ប្រហែល២០ឆ្នាំមកហើយ ដោយលោក សែម សង្វាត ត្រូវចូលពេទ្យព្យាបាលជំងឺជាញឹកញាប់។ យ៉ាងណាក៏ដោយ ការព្យាបាលកន្លងមក គ្រួសាររបស់លោកនៅមានលទ្ធភាពអាចចំណាយបាន ព្រមទាំងមានសមាគមជួយខ្លះផង។
«ប៉ាគាត់ថាគាត់ចង់ច្រៀងបន្តទៀត។ ខ្ញុំចង់ឱ្យប៉ាបានត្រឡប់មកដូចដើមវិញ។ កាលពីមុនយើងធ្លាប់សុំជំនួយដែរ។ មុននឹងខ្ញុំសម្រេចចិត្តសុំជំនួយ ខ្ញុំក៏បានគិតណាស់ដែរ ព្រោះខ្ញុំមិនចង់ឱ្យគេរិះគន់។ ប៉ុន្តែពេលនេះខ្ញុំពិតជាអស់លទ្ធភាពមែន។ ពេទ្យថាត្រូវបូមទឹកចេញពីពោះរបស់ប៉ា ព្រោះទឹកនោះមានជាតិពុរ។ ដូច្នេះប៉ាអស់កម្លាំងខ្លាំង ត្រូវប្រើសេរ៉ូមដើម្បីឱ្យមានកម្លាំងឡើងវិញ។ ក្នុងមួយថ្ងៃយើងត្រូវចំណាយអស់ជិត៤០០ដុល្លារ ព្រោះពេទ្យថាត្រូវប្រើថ្នាំថ្លៃៗ»។ នេះជាការត្អូញត្អែររបស់លោក សង្វាត រតនៈ។
កូនប្រុសច្បងអាយុ២១ឆ្នាំ ដែលជាបង្គោលក្នុងគ្រួសារបន្ទាប់ពីឪពុករូបនេះ ទីពឹងមុខរបរលក់ផ្លែឈើតាមអនឡាញផង លក់នៅផ្សារផង និងលក់ផលិតផលផ្សេងៗទៀតតាមអនឡាញ ដើម្បីរកប្រាក់ព្យាបាលជំងឺឪពុក និងផ្គត់ផ្គង់ជីវភាពគ្រួសារ។
បុរសកំព្រាម្ដាយរូបនេះ បញ្ជាក់បន្ថែម៖«ព្រោះតែកូវីដ ប៉ាមិនមានរោងការច្រៀងទេ ដូច្នេះប៉ាលក់ផ្លែឈើតាមអនឡាញ។ ចំណែកខ្ញុំក៏លក់ផ្លែឈើ និងផលិតផលផ្សេងទៀតតាមអនឡាញ និងនៅផ្សារដែរ។ យើងជួលផ្ទះគេ។ គិតទាំងផ្ទះនិងថ្លៃជួលកន្លែងលក់នៅផ្សារ ក្នុងមួយខែចំណាយអស់ប្រហែល៦០០ដុល្លារ។ ដូច្នេះចំណូលដែលពួកយើងរកបាន គ្រាន់តែដោះទាល់ពីមួយថ្ងៃទៅមួយថ្ងៃប៉ុណ្ណោះ»។
លោក សែម សង្វាត ដែលប្រឡូកក្នុងវិស័យសិល្បៈចម្រៀង តាំងពីក្នុងអំឡុងឆ្នាំ១៩៩៧នោះ បច្ចុប្បន្នមានវ័យ៤៨ឆ្នាំ។ ចម្រៀងដែលធ្វើឱ្យមហាជន ស្គាល់លោកភាគច្រើននោះ គឺបទ “កម្មករឆ្លងដែន” សំបុត្រស្នេហ៍ក្នុងសៀវភៅអូន” “រាជនីកំពូលដួងចិត្ត” និងបទ “ស្នេហ៍តែអូន” ជាដើម៕
Tag:
សិល្បៈ
ចម្រៀង
តន្ត្រី
សែម សង្វាត
© រក្សាសិទ្ធិដោយ thmeythmey.com