ជាតិ
វត្ថុបុរាណខ្មែរ៥រូប បានត្រឡប់មកដល់មាតុភូមិវិញហើយ ![](https://image.thmeythmey.com/pictures/2021/09/30/picsart_09-30-12_12_14.jpg)
×![]()
ភ្នំពេញ៖ ក្នុងដំណាក់កាលដំបូងនេះ វត្ថុបុរាណខ្មែរដែលជារតនៈវត្ថុដ៏ល្អឯក ចំនួន៥រូប ក្នុងនោះមានបដិមាថ្ម ព្រះសិវស្កន្ទ(ព្រះឥសូរនិងព្រះស្កន្ទ) មកពីប្រាសាទកោះកេរ។ បដិមាថ្មព្រះអឌ្ឍនារីស្វរៈ (ព្រះឥសូរនិងនាងឧមា) និងកន្សៃទូកសំរឹទ្ធ ត្រូវបានបញ្ជូនពីប្រទេសអង់គ្លេស មកដល់មាតុភូមិកម្ពុជា នៅថ្ងៃទី២៩ ខែកញ្ញា ឆ្នាំ២០២១។ នេះបើតាមក្រសួងវប្បធម៌ និងវិចិត្រសិល្បៈ។
ក្រសួងបានបញ្ជាក់ថា រូបចម្លាក់ទាំង៥រូបនេះ នឹងយកទៅរក្សាទុក នៅសារមន្ទីរជាតិភ្នំពេញ ដើម្បីឱ្យក្រុមជំនាញពិនិត្យវាយតម្លៃ សម្អាត ជួសជុល និងដំឡើងជើងទម្រចាំបាច់នានា សម្រាប់ត្រៀមរៀបចំពិធីប្រគល់-ទទួលជាផ្លូវការ នៅពេលវេលាណាមួយសមស្រប តាមការសម្រេចរបស់រាជរដ្ឋាភិបាល។
សូមបញ្ជាក់ថា ការប្រគល់រូបចម្លាក់ទាំង៥រូបនេះ មកកម្ពុជាវិញ ធ្វើឡើងបន្ទាប់ពីការចុះហត្ថលេខាលើកិច្ចព្រមព្រៀង រវាងរាជរដ្ឋាភិបាលកម្ពុជា និងគ្រួសារលោក ឌូគ្លាស ឡាចហ្វត (Douglas Latchford) ស្ដីពីការបញ្ជូនត្រឡប់មកវិញនៃសម្បត្តិវប្បធម៌ខ្មែរ។ កាលពីថ្ងៃទី២៩ ខែមករា ឆ្នាំ២០២១ ក្រសួងវប្បធម៌បានចេញសេចក្ដីជូនព័ត៌មានថា វត្ថុបុរាណខ្មែរចំនួនជាង ១០០រូប សាងពីថ្ម និងសំរឹទ្ធ នឹងត្រូវបញ្ជូនត្រឡប់មកកម្ពុជាវិញជាបន្តបន្ទាប់៕
Tag:
វប្បធម៌
រូបចម្លាក់
វត្ថុបុរាណ
© រក្សាសិទ្ធិដោយ thmeythmey.com